Ua Na’o Tusiga Faaeletonika: Autalavou Matutua
O Mataupu Faavae e 3 Na Fesoasoani ia te A’u e Toe Foi Atu ai ia Keriso
O le auauna atu, alofa mama, ma le onosai o ki ia i le tele o loto ma agaga e foliga mai e le oo i ai lo tatou malosi.
Ina ua 15 ou tausaga, sa i ai sa’u fegalegaleaiga i le lotu lea na tuua ai au ma le lagona tiga. Ou te lei manao lava e toe foi i tua i lena aso. Sa faasolo ina lofituina lo’u faatuatua muamua ma lo’u faamoemoe ina ua faifaimalie lo’u taulai atu i lo’u faasinomaga paia. Sa ou lagonaina le tele o le masalosalo ma sa le mafai ona maua ni tali.
O lea, sa ou taumafai ai e saili le uiga i fafo atu o le talalelei. Sa ou pau atili ese atu a o vaavaai mai le toatele o e pele ia te au ma le popole. Sa taumafai ou matua e fesoasoani i soo se itu. E toatele uo na aofia ai au i gaoioiga. Ae ou te lei mauaina “se liuga tele na oo mai i [lo’u] loto” (Alema5:12). Ae, i le aluga o taimi, a o faasoa mai e tagata i lo’u olaga le alofa faaKeriso ma tuuina mai ni faataitaiga lelei, sa ou aoaoina ai le uiga o le fuafuaga a le Atua mo au.
Afai e i ai se e pele ia te oe o loo tauivi ma lo latou faatuatua, atonu o loo e mafaufau pe mafai faapefea ona e fesoasoani ia i latou. I lo’u tulaga, o e pele ia te a’u sa galulue o ni auauna a le Alii. O lo latou alolofa ma le tuuto lea na toe aumaia ai au i le talalelei.
E mafai foi ona e faia lea lava mea e tasi mo se tasi e te alofa i ai.
O mataupu faavae nei e tolu na faataitaia e e pele ia te au na fesoasoani ia te au e vaai ai i le alofa o le Tama Faalelagi mo au:
1. Auaunaga
“Aua ou te manatua le afioga a le Atua ua fetalai mai o a latou galuega tou te iloa ai i latou; aua afai ua lelei a latou galuega, ua lelei foi i latou” (Moronae 7:5).
O lo’u epikopo, o se uo ma se faataitaiga maoae ia te a’u, sa faaauau pea ona valaaulia a’u ma te auauna atu faatasi e tusa lava pe ou te le o toe auai i le Lotu. O ia o se tagata taua tele ia te au lea sa le mafai ai ona ou teena ana valaaulia. Sa le mafaitaulia o ma aafiaga matagofie i le auauna atu ia i latou sa maua asia, ma sa ia ofo mai i taimi uma e faasoa mai ni malamalamaaga loloto o le talalelei ia i latou ina ia ou le maua ai se lagona lelei.
Sa ia auauna mai ia te au a o valaaulia foi au e auauna atu i isi, ma sa faia ai se eseesega tele i le toe foi mai ia Keriso.
2. Alofa Mama
“Ma o le alofa mama e loa ona tali-tiga, ma e agalelei, ma e le losilosivale, ma e le faafefeteina, e le sailia e ia ana lava [mea], e le faaitagofie. … “E ufiufi i mea uma, e talitonu i mea uma, e faamoemoe i mea uma, e onosai i mea uma” (Moronae 7:45)
O lo’u tama o se faataitaiga sili lea ia te a’u o le alofa mama. Na te faaali mai pea ia te au le alofa mama, tusa lava po o a ou talitonuga po o filifiliga. I se taimi sili ona pogisa i lo’u olaga, sa ou talanoa ai i lo’u tama, ma sa ia faafeiloaia a’u i le “alofa mama o Keriso” (Moronae 7:47). Sa faalogo o ia i o’u atugaluga e aunoa ma se faamasinoga ma tuuina mai ia te a’u se fautuaga faigofie ma le taua.
O se tasi o mea e sili ona mamana e mafai ona e faia mo e pele ia te oe o le faaali atu lea ia i latou o le alofa faaKeriso, e tusa lava po o a a latou filifiliga.
3. Onosai
“A ia atoatoa le galuega a le onosai, ina ia atoatoa ai ma ia sao ona lelei ai outou, ia leai se mea e tasi e mativa ai” (Iakopo 1:4).
Sa ou toe foi i le Ekalesia i le mavae ai o le sefulu tausaga o le le auai, ma sa alu atu lo’u tina i luga ma talaatu o le onosai faaKeriso. Na te lei tuleia lava a’u pe na amata ona le fiafia ia te a’u. Sa ia alofa ia te a’u, manatua lo’u taua, ma sa ia iloa sa faatosinaina a’u e le Agaga ma le Tama Faalelagi.
E le mafai ona tatou faanatinatia le galuega a le Alii pe faamalosia le faitalia a se isi tagata. Nai lo lena, e mafai ona tatou faalatalata atu i le Agaga ia iloa le taimi e valaaulia pe auauna atu ai ia i latou tatou te alolofa i ai.
Pe a filifili isi e auauna atu, alofa, ma onosai ia te au, sa faamanuiaina au i avanoa ma mafutaga semanu e le mafai e aunoa ma la latou fesoasoani. O le malamalama o le Faaola, aemaise lava pe a faaalia i a tatou faatinoga, lea e toe taitai atu ai isi i le olioli o Lana talalelei. O la’u molimau faatauvaa e alofa le Atua ia i tatou uma e tusa lava po o fea o tatou i ai i le olaga po o mea ua tatou faia, ae e mafai ona Ia faamanuiaina atili i tatou pe a tatou o mai ia te Ia. Ou te matua faafetai lava mo le talalelei, ma ou te molimau atu sa ala moni lava i faataitaiga faaKeriso a i latou i lou olaga na mafai ai ona ou toe foi mai.