Ua Na’o Tusiga Faaeletonika: Autalavou Matutua
Toe Mauaina o le Auai i le Malumalu
Ou te lei alu i le malumalu mo le tele o tausaga, ae sa ou liliu atu i le Faaola e fesoasoani ia te au ia ou agavaa e toe ulu atu i ai.
Ata na pueina e Megan Barnum
Sa ou tu i le faataumata ao fesili mai ia te au le fesoasoani lua i le au epikopo ou te lauga i le sauniga faamanatuga e uiga i le taua o malumalu. Faatasi ai ma ou mata i lalo ma se soloa’i maasiasi i o’u alafau, sa ou talosagaina ai se isi autu ese e lauga ai. Sa ou lei auai i le malumalu i ni nai tausaga ona o filifiliga o le olaga na ou motu ese ai mai lo’u Tama Faalelagi, ma ou te lei lagonaina le agavaa e talanoa e uiga i le malumalu.
Ina ua mavae lena aafiaga, sa faaauau pea ona oo mai le malumalu i lo’u mafaufau, ma sa ou lagonaina se manao faateleina ia i ai iina ae sa tauivi foi ma lagona o le le agavaa. Sa ou lagona le fefe nei le manao le Tama Faalelagi ia te au i ttonu o Lona maota paia.
Faia o Laasaga e Sui Ai
A o latalata mai le konafesi aoao, sa ou faalogologo ma le popole i failauga, ma le faamoemoe o le a ou lagonaina sina faailoaga o loo alofa pea le Atua ia te au e ui lava i au mea sese. O le taimi lena na saunoa ai Peresitene Dieter F. Uchtdorf, Fesoasoani Lua i le Au Peresitene Sili: “E le afaina po o le a le tele o le faaleagaina atoa o o tatou olaga. E le afaina pe ‘ula’ula a tatou agasala, pe matuitui foi le oona, pe tuuatoatasi, tuulafoaiina, po o le nutimomoia o o tatou loto e ono oo i ai. E leai se olaga e matua nutimomoia ma e le mafai ona toefuataiina.”1
Sa manino lo’u lagonaina na fetalai mai le Atua ia te a’u. Sa ou mafaufau mo ni masina pe faapefea ona toe foi mai ia Keriso, ma o lena savali o le konafesi o Lana valaau lea mo au e faia ni suiga e toe ulufale atu ai i Lona maota.
Sa ma feiloai ma lo’u epikopo e talanoa i le toe ulu atu i le malumalu. Sa ia fesoasoani mai ia te au ia malamalama i le matafaioi a Iesu Keriso e mafai ona faia i lo’u olaga ma le ala e mafai ai e le taliaina o Lana Togiola ona fesoasoani ia te a’u e tuu atu la’u avega o le tiga ma le agasala ia te Ia. Sa amata ona ou tatalo mo le malamalama, malosi, ma le onosai ia te au lava ia. E ala i le faatuatuaina atili o le Atua ma faia sina lelei teisi atu i aso taitasi, sa faasolosolo malie ai lava ona ou toe fesootai ma le malamalama o le Faaola.
O le galulue faatasi ma lo’u epikopo ma le aoao atili e uiga i lo’u Faaola na faalolotoina ai la’u molimau i lo’u faasinomaga o se afafine o le Tama Faalelagi. Sa ou malamalama o le a le fai mai lava lo’u Togiola alofa ia ou vavaeeseina a’u lava mai ia te Ia, ae o le a taumafai Satani e faia ia ou lagona e le tatau ona auai i le malumalu. Faatasi ai ma lenei malamalamaaga, sa iu ina ou lagona le saunia e toe ulu atu i le maota o le Atua.
O Le Toe Foi atu i le Malumalu
Faatasi ai ma se pepa faataga fou na gaugau ma uu i lo’u lima, sa ou laa atu ai i le malumalu mo le uluai taimi i le tele o tausaga, sa faafuasei ona ou popole e uiga i lo’u tulaga i le maota o le Atua. O lo’u latalata atili atu i faitotoa na atili oo mai ai foi le le mautonu ia te a’u. Pe o le a ou foliga faavalevalea ona o le le iloa po o fea e alu i ai po o le a le mea e fai? Pe ua ou matua tele ea e alu i le malumalu mo papatisoga?
Sa ataata le tamaloa i le kesi i luma a o ou ulu atu, ma faafeiloai au i le malumalu. O lena taeao na toe faafouina ai lo’u agaga a o faamautinoa mai e tagata faigaluega o le malumalu ia te a’u lo’u tulaga i le maota o le Atua.
A o ou tuua le malumalu, sa talotalo mai se tasi o le aufaigaluega ia te au a o ou savali atu i le auala savali e aluese mai le potu papatiso. Faatasi ai ma se leo musumusu ma le fiafia na ia faapea mai, “Faafetai mo lou sau i le malumalu i le asō—sa matou manaomia oe iinei!” Sa ou folafola atu ia te ia o le a ou toe foi mai i le vaiaso na sosoo ai a o ou tulimatai atu i le toe lagonaina o le mafanafana o le malumalu.
Ona o o tatou faasinomaga paia o ni afafine ma ni atalii o ni matua faalelagi, ua mafai ai e i tatou taitoatasi ona maua le auai i le malumalu. E leai se mea e mafai ona taofia tumau ai i tatou mai le aapa atu ma le alofa o le Atua pe afai tatou te mananao ia i ai i Lona afioaga. E finagalo o Ia ia tatou i ai iina, ma a o tatou faia ni laa laiti ia avea atili ai e faapei o lo tatou Faaola i aso taitasi, e mafai ona tatou faaogatusa o tatou olaga ma Lona olaga ma tumau pea le agavaa mo le malumalu. Ou te iloa ona o le Togiola a Iesu Keriso, ua mafai ai ona tatou ulu atu i le maota paia o le Atua ma maua faamanuiaga o loo faatalitali mai mo i tatou i totonu, ma, e pei ona ou oo i ai, o na faamanuiaga e taua mea uma.