“Fatuina o se Aganuu Faatekinolosi Maloloina i o tatou Aiga,” Liahona, Oke. 2022.
Fatuina o se Aganuu Faaketinolosi Maloloina i o tatou Aiga
E mafai ona tatou fesoasoani e faasalalau atu le upumoni ma le malamalama pe a tatou faaaogaina meafaigaluega faaeletonika mo le lelei.
Ua tatou ola i se lalolagi e faigofie ona maua tekinolosi. E oo lava a o lei oo i le faama’i pipisi o le korona vairusi, o tekinolosi na mafai ai ona tatou fesootai pea ma aiga, aoao ni tomai fou, ma faasoa atu le talalelei i luga o le initoneti.1
Ina ua faamalosia i tatou e le faama’i pipisi ia faavavamamao le tasi mai le isi, sa fesoasoani tekinolosi ia i tatou e sii atu nisi o gaoioiga taua o le olaga i luga o le initoneti. Na fesootai ai aiga, mafai ai le aoga ma le galuega, ma na oo lava ina faatagaina ai i tatou e auai i pati faatekinolosi o aso fanau! Peitai, e pei lava o soo se meafaigaluega mamana, e oo mai luitau i tekinolosi. O lo tatou lalolagi faatekinolosi e mafai foi ona avea o se punavai o faamatalaga sese, le lelei, ma le faamaumauina o le taimi. E oo lava i polokalama lelei, afai e soona faaaogaina, e mafai ona tulei ese isi gaoioiga maloloina. Na uunaia i tatou e Elder Peter M. Johnson o le Fitugafulu ia “faaeteete ma aua le faasamasamanoa i lo tatou faaaogaina o tekinolosi.”2
O le faavaeina o se aganuu faatekonolosi maloloina i o tatou aiga e mafai ona luitauina. O le mea e lelei ai, o loo i ai ni auala faigofie e mafai ona fesoasoani ia i tatou e saunia ai a tatou fanau ia ola lauusiusi i se lalolagi faatekinolosi.
Aloese mai Mailei Masani
Vaavaai mo ni mailei se lua: o le le lelei ma le vaapiapi o le taulaiga.
1. O le le lelei o lona uiga o le ova faamamafaina o mea e le faatatau i tekinolosi (o le “aua le faia”) ae galo ai ona faataitai ni auala lelei e faaaoga ai tekinolosi (o le “mea e fai”). O le aoaoina o tomai o le faaaogaina lelei o tekinolosi e manaomia ai le faataitai; e te le aoao lava e ta le piano i le na o le tau atu o nota e aua le taina. I le avea ai ma matua, e mafai ona tatou faaaluina le tele o le taimi e talanoaina ai ma faataitai ituaiga o gaoioiga tatou te mananao i tagata talavou e fai i meafaigaluega faatekinolosi ae faaitiitia le taimi e faasino atu ai mea e aloese ai.
2. O le vaapiapi tele e tupu pe a taulai atu a tatou taumafaiga i se tomai faatekinolosi se tasi, e pei o le saogalemu i luga o le initoneti, ma faagalo isi vaega o le faaaogaina maloloina o tekinolosi. E pei o le aveina o se taavale, e muamua le saogalemu. E fai a tatou fusipau ae tatou te lei o i soo se mea. Ae e tatau ona tatou faia le isi laasaga o le filifili po o fea tatou te mananao e o i ai ma po o ai tatou te fia o i ai. O le i ai o se aganuu lelei faatekonolosi i o tatou aiga o lona uiga o le aoao ia faailoa atu, faapaleni, faaaofia, ma auai faatasi ma o tatou aiga ma alalafaga faapea foi ma le saogalemu.
Faatulagaina o Tuutuuga mo le Manuia
O la’u galuega ua mafai ai ona ou malaga i le lalolagi atoa e faasoa atu auala e fesoasoani ai i aiga ma tagata taitoatasi e aoao ni mausa lelei faatekinolosi. O fesili nei e lima ou te fautuaina atu e talanoaina faatasi e aiga pe a filifili le ituaiga o faaaogaina faatekonolosi e sao mo le aiga.
1. E mafai faapefea e tekinolosi ona aumaia faatasi lo tatou aiga?
O loo i ai ni auala maoae e faaaoga ai tekinolosi e faamalolosia ai aiga. Mo se faataitaiga, i lo matou aiga, sa tonu ia i matou e mafai ona fesoasoani le ma fanau e pue ata ma vitio o mea e tutupu i le aiga. I le faaaogaina o se polokalama o le tamai api, latou te tusia ai i lalo ni mea malie e fai mai ai o latou tei. Mai lea taimi i lea taimi, tatou te iloilo ai manatuaga ma matamata i vitio na latou aoina mai. Matou te faaaogaina foi polokalama o talafaasolopito o aiga e aoao ai e uiga i o tatou tuaa ma a latou tala. Ma e matou te auai i fonotaga faaleaiga faatekinolosi faatasi ma tagata o lo matou aiga o e nonofo mamao mai ia i tatou.
2. E mafai faapefea ona tatou faaaogaina le tekinolosi e faaleleia atili ai o tatou alalafaga?
O le faatekonolosi e sili ona mamana pe a faaaogaina o se meafaigaluega e faaleleia ai le lalolagi. O le iloiloina e le aunoa o saite e pei o le JustServe.org e fesoasoani ia i tatou e maua ai avanoa e auauna atu ai i le alalafaga. E mafai ona tatou faaaogaina o tatou leo faaeletonika e faasoa atu ai le talalelei ma faasalalau atu ai savali faagaeetia, e pei o le toe faaaogaina o ala o faasalalauga faaagafesootai mai le Ekalesia po o le faasoa atu o tala na musuia ai i tatou. E mafai foi ona aofia ai le tutu atu mo isi i luga o le initoneti pe a tatou vaai ua taulimaina ma le le faaaloalo i latou. O le tele o sauaga i luga o le initoneti e mafai ona taofia e ala i le tu atu mo le tagata ua afaina. Faaaoga lou leo faatekinolosi mo le lelei.
3. E mafai faapefea ona tatou faapaleniina lo tatou faaaogaina o tekinolosi?
O le paleni o lona uiga o le iloaina pe a faaaluina e se gaoioiga faaeletonika le tele o lo tatou taimi nai lo le mea e tatau ai. Ina ia faatapulaaina le faaaogaina o tekinolosi, e toatele aiga e liliu atu i le uati o se meafaigaluega autu mo le faalelei. E ui o le auala “taimi i luga o le lau” e faatapulaa ai le tekinolosi e mafai ona fesoasoani, e manaomia foi ona tatou aoao atu i tupulaga talavou e le tutusa le taua o le faaaogaina o tekinolosi. O le talanoa i le vitio ma se matua o matua matutua po o le faitauina o tusitusiga paia i luga o le initoneti e sili atu ona taua nai lo le na o le taaalo i taaloga, e ui lava e tutupu na mea e lua i luga o se lau.
E taua foi le faatutu o taimi ina ia saoloto ai i mea faatekonolosi. Sa aoao mai Peresitene Russell M. Nelson le mana o le faia o anapogi faavaitaimi o ala o faasalalauga faaagafesootai ina ia paleni pea i o tatou olaga.3 E manaomia ona aoao tamaiti e le o se faasalaga le faia o se malologa mai le faaaogaina o se masini. I lo matou aiga, ua tonu ia i matou o masini e le tatau ona momoe i le potu lava e tasi faatasi ma i matou. Sa matou fatuina se nofoaga tutotonu lea e mafai ai e masini ona momoe i le po e aunoa ma le faalavelaveina o la matou moe.
4. E mafai faapefea ona tatou faaaogaina tekinolosi i a tatou tuutuuga?
E oo lava i gaoioiga faatekinolosi lelei e mafai ona avea ma se faafitauli pe afai e faaaoga e sui ai ni gaoioiga lelei atu pe tatou te lagona foi le faamalosia e auai i ai. O se tasi o motugaafa faigofie o le tapeina lea o faasilasilaga mo polokalama uma e leai se taua. E faaaoga e tagata e atiina ae le polokalama faalauiloa e pu’e ai la tatou gauai ma toe toso mai i tatou i tua. O le tapeina o lapataiga e faafaigofie ai mo i tatou ona filifili pe a tatou mananao e faaaoga se polokalama ma pe a tatou le faia. E tatau ona tatou nofouta i polokalama e i ai taui po o polokalama e taumafai e uunaia i tatou e faaaoga. O le tapeina o le otometi-le-taalo i taaloga vitio uma e taofia ai i latou mai le faaalia o vitio pe a tatou le filifili e matamata.
5. E mafai faapefea e matua ona faataitai le faaaogaina lelei o tekinolosi?
E aoao tamaiti mai le matamata i o latou matua o faataitaia amioga lelei. E faigofie le matauina o se matua o aumaia ni meaai i se tuaoi pe fesoasoani foi i se tasi e tauaveina se mea mamafa. Ae i gaoioiga faatekinolosi, e sili atu ona faigata mo tamaiti le matauina o amioga a matua. E taua le faasoa atu o auala o loo tatou faaaogaina ai tekinolosi e siitia ai ma auauna atu ai i isi. Atonu tatou te faia ni faamatalaga faapenei, “O loo ou tesi atu i tagata o le uarota e vaai po o ai e mafai ona ave ni meaai ia Sister Sanchez, o le na faatoa alu ese mai le falemai” po o le “O le a sou manatu e uiga i lenei feau faalauiloa o loo ou faia e aumai ai tagata ia o mai i le tuiga toto e foai atu i le vaiaso a sau?”
E mafai foi ona tatou faataitaia le suesueina o le talalelei. E mafai ona tatou faalogologo i tusitusiga paia po o lauga o konafesi aoao, ma e mafai ona tatou aoao a tatou fanau i le auala e faaaoga ai fuafuaga mo suesuega ma meafaigaluega e tusitusi ai faamatalaga i le polokalama o le Gospel Library.
A o tatou talanoaina nei fesili e lima, e mafai ona tatou fesoasoani e fausia le aganuu faatekinolosi tatou te mananao ai i o tatou aiga. Afai tatou te faaaogaina meafaigaluega faatekinolosi mo le lelei, e mafai ona tatou faanatinatia le salalau atu o le upumoni ma le malamalama. Ou te toe faaleoina lenei valaaulia na tuuina mai i le konafesi aoao: “Ia faaauau pea ona saili mo auala e mafai ai e tekinolosi ona faalatalata atili atu i tatou i le Faaola ma faatagaina ai i tatou e faataunuu Lana galuega.”4