O Leo o le Au Paia o Aso e Gata Ai

Loimata o le Faanoanoa, Loimata o le Olioli

Saunia e Celmer Charles Villareal, Cebu, Filipaina

O le maliu o lo’u tina sa tiga, ae o lo’u tiga ua “tofatumoana i le olioli ia Keriso.”

I se tasi aoauli o le Aso Sa, sa amata ona ou mafaufau e uiga ia Iesu Keriso ma Lana taulaga togiola. O na mafaufauga na fesoasoani ou te lagona ai le saogalemu ma le filemu.

Ae peitai, sa faafuasei ona ou manatuaina tulaga faatupulaia o le KOVITI-19 i lo’u atunuu. O le taimi lava lena, sa ou lagona ai le faanoanoa mo tagata i le lalolagi atoa o e sa mafatia. Sa ou faapea ifo ia te a’u lava, “Latou te le lagonaina le saogalemu ma le filemu lea ou te lagonaina.” O na lagona na ou tootuli ai, ma sa amata ona ou tatalo.

Sa ou tatalo mo i latou o e ua maliliu, faapea foi mo i latou ua maliliu ē pele ia i latou. Sa ou tagi mo i latou aua ou te iloa le tiga e oo mai i le maliu o se tasi e te alofa i ai. I le taimi o le faama’i oti o le KOVITI-19 i le lalolagi atoa, e toatele ua tauaveina na o i latou le avega o le maliu o sē pele.

Ona liliu atu lea o o’u mafaufauga i lo’u tina, o lē na maliu ina ua lima o’u tausaga. A o faaauau pea ona tafe ifo loimata i o’u alafau, sa ou tatalo i le Tama Faalelagi e uiga i le tele o lo’u misia o ia. Ona ou manatua ai lea sa fetagisi Iesu ma Maria ma Mareta ina ua maliu Lasalo, lo la tuagane ma Lana uo (tagai Ioane 11:19–35). Sa faamafanafanaina au e Lona agaalofa, ae na oo mai pea loimata a o ou mafaufau i le tele o lo’u misia o lo’u tina.

A o faaauau pea ona ou tatalo, sa ou faaaofia ai lo’u tina i la’u tatalo. Sa ou mafaufau ia te ia ma vaai faalemafaufau ia te ia i o’u luma. Sa ou ta’u atu i le Tama Faalelagi le tele o lo’u alofa ia te ia ma misia o ia. Sa ou faafetai ia te Ia mo le taimi na ou maua faatasi ai ma lo’u tina i lenei lalolagi. Ua ou misia o ia, ae ou te talitonu o le a i ai se aso o le a matou toe feiloai ai ma faatasia o se aiga e faavavau.

Sa ou tu, ma sa faatumulia lo’u loto i le faamoemoe. Sa ou tatalo i le Tama Faalelagi e faamanuia ma’ua ma lo’u tama ia tumau seia oo ina mafai ona ma toe vaai i lo’u tina. Ona maligi ai lea o o’u loimata o le olioli ma le faamoemoe mo lena faapotopotoina mamalu ua mafai ona o le Toetu o le Faaola.

Ou te lagona le lotofaafetai tele i le Tama Faalelagi mo le ata o le faaolataga. O le maliu o lo’u tina sa tiga, ae o lo’u tiga ua “tofatumoana i le olioli ia Keriso” (Alema 31:38). Ou te faafetai mo Ia. Na te faafouina lo’u faamoemoe i le olaga a sau. O Lona Toetu e sili atu lona uiga ia te a’u i le taimi nei nai lo se isi lava taimi muamua. O le a ou toe vaai i lo’u tina ona o lo’u Faaola.