O se Aso Sili e Lotofaafetai Ai

Oketopa 2022

“O se Aso Sili e Lotofaafetai Ai,” Liahona, Oke. 2022.

Ua Na‘o Tusiga Faaeletonika: Atatosi o le Faatuatua

O se Aso Sili e Lotofaafetai Ai

Saunia e Cristi ma James Koch, San Antonio, Texas, ISA

Sa ma iloa o le faasoa atu o le faamoemoe, na ma maua ai le faamoemoe. O la ma’ua sini o le fesoasoani lea i isi, faapea foi ma i ma’ua lava, ia saunia mo le faavavau.

Ata

placeholder altText

Atapue mai faaaloaloga a le aiga o Koch

Cristi: Sa latou fai mai pe a ma le lua tausaga ou te ola ai. Sa ou ta’u atu ia James o le a ou malamalama pe a ua tele atu lenei mea nai lo le mea sa ia manao e fai. “O lou avanoa lenei e te alu ese ai,” sa ou fai atu ai. Ae sa ia fai mai, “E sili atu lo’u faatasi ma oe. O le a ta tauina faatasi le kanesa ma faia soo se mea ta te mafaia. O le a ta faaaluina po o le a lava le taimi i lenei olaga o le a tuuina mai e le Tama Faalelagi ia i ta’ua. Tau lava ina manatua, ua ta i ai i lenei mea mo le faavavau. Ma e te iloa, e sa’o o ia. E le muta se faaipoipoga e faavavau ona o se tasi o oulua e siitia atu i le olaga a sau.

James: Sa ou iloa o ia lea sa ou manao ia faamauina i ai. Sa ma faaipoipo uma muamua, ma sa ou anapogi ma tatalo mo se taimi umi e sue o ia. Sa ou saunia ina ia agavaa mo ia ma ia avea ma se tane o le a tausia o ia. O le a ou le savali ese lava mai lena mea.

Sa faamauina Cristi ma James i le Malumalu o Draper Iuta.

Cristi: Sa tonu ia i ma’ua ma te mananao e faia mea uma ma te mafaia ina ia fiafia ai nei ma fiafia i le faavavau.

James: Sa ma taufai malolosi uma faaletino, ma sa tonu ia i ma’ua e faia pea mea ma te fiafia i ai i le umi ma te mafaia—tamomoe, savaliga sopo, aau, malaga, tietie uila palapala, ma tietie i uila afi. Ma e ma te fiafia e faaalu le taimi ma lo matou aiga. E oo lava i le maea ai o taotoga e aveese ai patu lapopoa mai lona fatafata ma lona tua, sa faaauau pea ona faia e Cristi le tele na te mafaia i le umi na te mafaia ai. I le taimi lava lea, sa amata ona ia faia isi mea sa ia lagona e manaomia foi ona faia.

Ata

o se ava ma se tane o loo fiafia i fafo

Cristi: Mai faaipoipoga talu ai, sa toalima le fanau a James ae toafa la’u fanau. Sa tonu ia te au e tatau ona ou tusia ni tusi ia i latou. O lea, sa ou tusia ai lenei pusa atoa o tusi, ma mate po o le a—na mavae tausaga talu mai lena taimi, o lenei ua matua fula lo’u lima ma tumu i patu lapopoa ua le mafai ai ona ou toe tusitusi. I ni nai aso talu ai, sa ou taumafai ai e tusi atu se tusi i la’u tama teine mo lona aso fanau, ma sa matuai tiga lo’u lima ma sa ou le mānava ai. O lea, o le tusiaina o na tusi ina ua ou faia o se musumusuga. Ou te fiafia sa ou faalogo i lena uunaiga aua o le taimi nei o le a le mafai ona ou faia.

James: Ua i ai ia Cristi lenei tomai faaKeriso e vaai ai i le lelei i isi. E i ai sana molimau loloto e uiga i lona Faaola ma se naunautaiga tele e faia le galuega faafaifeautalai.

Cristi: Ou te manatua lo’u taumafai e filifili faatasi ma le Alii. Mo sina taimi, sa faapea, “Se, faamalolo a’u. Ou te fia faapotopotoina Isaraelu!” Sa ou taumafai e faatonutonu le Atua, ae sa lei aoga. Ona ou mafaufau lea, ”Ia, o lo’u igoa, o Cristi, o lona uiga ‘o le soo o Keriso.’ A o ou i ai pea iinei, ou te fia aumaia le tele o agaga ia Keriso i le mea ou te mafaia.

James: Ma na taitai atu ai i se isi uunaiga.

Sa faasoa atu e Cristi ona luitau ae sa ia faasoa atu foi ni savali fiafia o le faatuatua.

Cristi: Sa amata ona ou faia se savali o ala o faasalalauga faaagafesootai i aso taitasi, o se savali itiiti o le faamoemoe ma le alofa. Sa ou ta’ua “O se Aso Sili e Ola Ai.” Sa amata ona faalogo i ai tagata. O lo’u uso faaletulafono o se tagata e le talitonu i le Atua, ae sa ia fai mai, “E mafai ona e amata auina mai au savali?” I le aluga o taimi sa avea o ia ma tagata talitonu, ma o lea ua avea nei o ia ma se tagata o le Ekalesia. Ma sa amata ona faitau e lo’u uso ia savali. Sa fesoasoani ia te ia e toe maua le faatuatua. Ua toaga nei o ia i le Ekalesia.

James: Sa tele ni mea sa ou faimalaga ai mo le galuega, ma alu i ni taulaga laiti i Texas ma Georgia. Sa masani ona ma o ma Cristi. Ma te feiloai i tagata na ma mananao e fesootai i ai, ma na te faapea atu, “E mafai ona ou auina atu ia te oe se tasi o a’u savali? “Ona mafai lea ona e filifili pe e te manao e maua pea.”

Cristi: O le aofai o tagata sa mananao i a’u savali sa faaauau pea ona tuputupu ae. O le taimi nei ua 200. O nisi o tagata o le Ekalesia; o nisi e leai. Mo se taimi umi lava, sa ou auina atu ai se manatu i aso uma, ae o le taimi nei ua faasolo ina faigata ma faigata atu. Ou te manatu o savali o le a pei o se talafaasolopito laitiiti. Pe a ou alu, o le a i ai pea i lo’u aiga ma uo la’u molimau e uiga i mea ou te iloa e moni.

Sa malilie uma James ma Cristi, “Ua ta i ai i lenei mea mo le faavavau.”

James: O mea ua ia tusia o le a fesoasoani ia i ma’ua e tausia ai se vaaiga e faavavau. Na te tau mai pea ia te au o le a ia leoleo mai ia te au, ma vaavaaia i matou. Matou te mananao e avea o se aiga e faavavau O le sini moni lena.

Cristi: Ua fitu tausaga talu ona maua au i le kanesa. A o faasolo ina faigata ona tusi la’u savali, o nisi taimi ou te ta’ua ai, “O se Aso Sili e Lotofaafetai ai.” Ou te matua faafetai lava mo Iesu Keriso ma Lana Togiola. Ou te mafaufau i upu o le viiga “Faitau Ou Manuia.”¹ Afai tatou te le maua mea uma i lenei olaga, o loo i ai pea ia i tatou le folafolaga e mafai ona faavavau aiga. E mafai ona tatou faitauina i taimi uma lena faamanuiaga, ma o le a siitia ai i tatou.

Sa faatumulia e Cristi lona olaga i le faamoemoe ma fesoasoani i isi ia faia foi faapea.

Taumafai Pea!

Loto Malamalama

Talu ina oo mai le kanesa i lo’u ala, ua ou aoaoina ai se lotomalamalama loloto mo isi. Ou te alofa atu ia i latou uma o e mafatia. Ou te molimau atu o loo i ai se Atua, o i tatou o Ana fanau, ma e alofa o Ia ia i tatou taitoatasi. O le a Ia fesoasoani mai ia i tatou e ui atu i tiga ma tofotofoga o le olaga nei.

Vaavaai mo le Lelei

Ia mautinoa e te tilotilo i le lelei i le asō ma vaai i le aao o le Atua o galue i lou olaga!

Manatua O Ai Oe

E mafai ona tatou liliu atu i lo tatou Tama Faalelagi i le tatalo ma saili le upumoni i le talalelei a Lona Alo, o Iesu Keriso. Ona tatou manatua lea po o ai i tatou ma saili lo tatou faamoemoega i le olaga.

Faitau O Tatou Faamanuiaga

E susulu le la, e tusa lava pe moeiini o tatou mata. A aunoa ma le Atua, e muiti le malamalama ma faigata ona maua le faamoemoe. Ae e susulu o tatou aso pe afai tatou te saili atu ia te Ia e ala i le suesue, tatalo, ma le faitauina o o tatou faamanuiaga uma. Faaalu se taimi e mafaufau ai i le lelei i le olaga. Ou te folafola atu o faamanuiaga e sili atu i taimi uma nai lo le leaga.

O Se Lumanai Mamalu

Pe ana mafai ona tatou vaai i talaatu o le tafailagi o le olaga faaletino i le mea o loo faatalitali mai mo i tatou i talaatu o lenei olaga. Mata e mafai ona vaai faalemafaufau i se lumanai e sili atu ona mamalu nai lo le lumanai ua saunia mo i tatou e lo tatou Tama Faalelagi? Ona o le taulaga a Iesu Keriso, e le tatau ai ona tatou fefefe, aua o le a tatou ola e faavavau, e le toe tofo lava i le oti. Ma ona o Lana Togiola e le iu, ua mafai ai ona faamamaina i tatou mai agasala ma tutu ma le mama ma le paia i luma o le pa faamasino a le Atua. “O mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou o e alofa ia te ia” (1 Korinito 2:9).

O Le Fomai Sili

O Iesu Keriso o le Fomai Sili, ma o ai i lenei lalolagi e le manaomia se Fomai Sili? O loo tatou mama’i uma, tiga, pe tiga i nisi o itu po o se isi itu. Ua ia silafia le ala e faamalolo ai i tatou. Ou te fiafia e mafai ona faamafanafanaina au e se Faaola e alofa ia te au ma silafia lelei au. Ou te iloa e mafai ona ou faatuatuaina o Ia.

E Mafai Lava Ona Ou Setusetu

Sa ou alu e tamoe. Ia, ia tatou faamaoni ma ta’u po o le a moni lava—o le setusetu a le patu. Ou te faamalositino e manava pea ma ia kilia o’u mama. Peitai, e faigata pe a tiga tele ou patu. Sa ou tagi, ona tatalo lea mo le Tama Faalelagi e fesoasoani mai ia te au. Sa oo mai i lo’u mafaufau upu o se pese Kerisimasi, ma sa amata ona ou pese:

Ia e latalata mai ia te a’u, le Alii e Iesu; Ou te fai atu ia te oe e te nofo

Faalatalata mai ia te au e faavavau, ma alofa mai ia te au, ou te tatalo.²

Masalo o la’u vaai ma foliga e malie, ae e le afaina lena mea i lenei taimi. Ou te faafetai mo upu o lenei pese.

Ona valaau mai lea o lo’u tausoga e faamatala mai ia te au e uiga i lana tama teine lea faatoa uma lava lona taotoga lona lua o le faiai. Sa ia faamanatu mai ia te au o se faamanuiaga e mafai lava ona ou setu! E leai se mea na suia. Sa i ai pea lo’u tiga iina, ae sa siitia au. Sa ou iloaina e mafai ona maea lenei aso.

Pe a fetaomi mai i lalo mea ia te oe ma e te manatu e faigata tele ona onosaia mea, usu le fuaiupu lona tolu o le “I se Faatanoa Vao,” ma o le a faatasi lo tatou Alii ma oe.

O le Lotofaafetai o le Olioli Lea

O le lotofaafetai e mafai ona faamaloloina ai o tatou loto, ma aumaia faalatalata atili ai i tatou i le Atua. E puapuagatia tagata uma, ae o le lotofaafetai e faamafanafanaina ai. A aunoa ma lo’u saolotoga e filifili le lotofaafetai, o le a ou matamuli ma oti. Lotofaafetai o le olioli lea! Ia taumafai pea, faateleina le lotofaafetai, ma o le a e maua le olioli tusa lava po o le a le mea e oo mai i lou ala!

Ata

tamaitai e toalua o loo ataata a o siiina e le tasi se pepe

O le fanau mai o se pepe a le fanau na aumaia ai le tele o le olioli.

E Pule lava Tatou

O le a le tofotofoga po o le faavae faamaonia e faigofie? E oo mai tofotofoga fanau uma a le Atua. O nisi taimi tatou te puapuagatia ai ona o mea sese a isi, o nisi taimi ona o a tatou lava mea sese. Ma o nisi taimi e tutupu mea ona ua tatou ola i se lalolagi e le atoatoa. Ae o i tatou lava e filifili pe faapefea ona tatou taulimaina mea e oo mai i lo tatou ala.