Mo Matua

Galuega Faafaifeautalai i Aso Amuli

alii talavou o loo tilotilo i le lau o le komepiuta

Matua Pelē,

E ui i le gaogaosa o le lalolagi, ae o loo faaauau pea ona agai i luma le galuega a le Alii. Ua matou molimauina le galuega a le Alii a o fofogaina atu ma fausia malumalu, a o auauna atu ma le filiga tagata o le ekalesia i le lalolagi atoa, ma o ni faifeautalai e ofo atu o latou taimi e faasoa atu ai le talalelei a Iesu Keriso. Ua poloaiina foi i tatou e le Alii e auauna atu i le toatasi. Pe o se tagata o le Ekalesia o loo i ai nei po o se uo fou ua faaalia le fiafia i o tatou talitonuga, e silafia i latou e le Alii, ma Na te silafia oe.

Talanoaga o le Talalelei

Feagaiga ma le Faapotopotoina o Isaraelu

Faasoa atu i lou aiga nisi o upusii mai le tusiga musuia a Peresitene Russell M. Nelson i le itulau e 4 ma talanoaina pe faapefea e le tausia o a tatou feagaiga ona fesoasoani ia i tatou “ia maua le malosi e tetee atu ai i faatosinaga faifai pea a le lalolagi.” Afai e i ai sau fanau o loo sauniuni e auauna atu i se misiona, faasoa atu ana aoaoga e uiga i faifeautalai o loo faia “le galuega aupito silisili i le lalolagi i aso nei.”

E Silafia e le Atua i Tatou Taitoatasi

O i tatou uma o fanau a le Tama Faalelagi, ma e alofa o Ia ia i tatou. Ona o lenei mea, e popole foi o Ia i lo tatou liua patino. Faitau le savali a Elder Jorge T. Becerra o loo i le itulau e 40 e uiga i le aafiaga o lona tamamatua i le liua patino ma talanoaina pe faapefea ona e iloa e silafia ma alofa le Alii ia te oe.

Mauaina o le Taulaiga Sa’o i le Ola ai i le Talalelei

Ina ia fesoasoani i lau fanau ia malamalama atili i mea e taulai i ai a o latou taumafai e ola i le talalelei, faitau le tusiga o loo i le itulau e 30 e aoao ai pe na faapefea ona suia e se talavou matua lona mafaufau e vaai ai i le faamoemoega o poloaiga taitasi ma mataupu faavae o le talalelei.

Mea Malie Faaleaiga o leSau, Mulimuli Mai ia te A’u

O Sootaga o le Alofa

Isaia 52

I le Isaia 52:7, o loo ta’u mai ai e le perofeta ia i tatou o le a tuuina mai e Keriso ia i tatou le filemu, le talalelei, ma le faaolataga.

1. Ia talanoaina ni auala e mafai ona e faasoa atu ai nei faamanuiaga silisili e ala i le galuega faafaifeautalai. Lisi le tele e mafai ona mafaufau i ai lou aiga. (Faataitaiga: faasoa atu le talalelei i au uo; ave igoa o ou tuaa i le malumalu e faamaea ai o latou sauniga.)

2. Tuu se Tusi a Mamona i se tasi itu o le potu. Tuu atu i se tagata e toatasi e tu i le isi itu ma, e aunoa ma le faaminoiina o ona vae, aapa atu mo le tusi. (Ia mautinoa ua uma ona tuu le tusi ia le mafai ona aapa atu iai.)

3. Tuu atu i tagata taitoatasi o lou aiga e laina i le va o le tagata i autafa o le potu ma le Tusi a Mamona. Uu lima, e fatu ai se filifili o tagata, ma pasi atu le Tusi a Mamona i le tagata muamua. (E ala i le iloaina pe toafia tagata o loo i lau vaega, e mafai ona e fuafuaina po o le a le mamao e amata ai le tagata muamua.)

Talanoaga: O a ituaiga o faatinoga i o tatou olaga e ono fatuina ai “sootaga” e fesoasoani ai i isi ia iloa faamanuiaga o le talalelei?

O nisi nei o saunoaga o le konafesi e mafai e lou aiga ona faitau pe faalogologo ai i lenei autu:

• Dieter F. Uchtdorf, “O Le A Faia e le Atua se Mea E Le’i Mafaufauina,” Liahona, Nov. 2020, 51–54

• Ahmad S. Corbitt, “E Mafai Ona E Faapotopotoina Isaraelu!” Liahona, Me 2021, 61–64.

Auina mai e Brenda Slade

Mai le Mekasini Mo Le Malosi o le Autalavou

E Faapotopoto e le Alii Lona Nuu ma Taitai ese i Latou mai le Nofopologa

Ua aoao mai e Elder Quentin L. Cook le ala e mafai ai ona tatou aloese mai le nofopologa e ala i le faapotopoto faatasi ma le nuu o le Alii ma mulimuli ia te Ia. Ma e tatau foi ona tatou faasusulu atu lo tatou malamalama ma taitai atu isi ia Keriso.

Tekinolosi ma le Faapotopotoina

Ua faasoa mai e Peresitene Bonnie H. Cordon ni auala se lima e faaaoga ai tekinolosi e faapotopoto ai Isaraelu.

Aga Malie Lelei

Faitau nisi o manatu i aga malie lelei ma le aafiaga lelei e mafai ona i ai i o tatou olaga.

taifau o loo inu se vai suamalie

Mai le Mekasini o le Uo

Ia Matapoto i Ala o Faasalalauga

Faitau se tala e uiga ia Natano, o lē na aoao e faatulaga ni tapulaa maloloina i lana taimi o taaloga vitio. Ona sue lea o nisi fautuaga lelei o ala o faasalalauga i le vaega Mo Tamaiti Matutua.

Fesoasoani i le Sau, Mulimuli Mai Ia Te A’u

Saili gaoioiga faalevaiaso e fesoasoani ia malie ai le suesueina e lou aiga o tusitusiga paia.

Mekasini o Talafaasolopito o Aiga

Aoao i le auala na faia ai e Liv ma Melanie mai Taiuani la laua lava mekasini e faamaumau ai le la talafaasolopito o aiga.

Fesoasoani e pei o Iesu

Feiloai ia Edrick mai Kuatemala ma aoao i le ala e fesoasoani ai o ia i isi, e pei ona sa faia e Iesu. Ona fesoasoani lea i lou alo e fai le lu’i o lima fesoasoani o lenei masina.

Mo Uo Laiti

Saili ni tala ma gaoioiga i lenei vaega na faia faapitoa lava mo a tatou aufaitau aupito laiti.