“Tekinolosi, o le Faapotopotoina, ma Oe,” Mo le Malosi o le Autalavou, Oke. 2022.
Fesoasoani o le Olaga
Tekinolosi, o le Faapotopotoina, ma Oe
O oe o se vaega o le autau talavou a le Alii. Ma e mafai ona fesoasoani tekinolosi!
E te iloa pe a e maua ni mea se lua e tatau ona o faatasi, e pei o le tuufaatasiga atoatoa o le pata pinati ma le sukalati, po o pateta tipitipi ma le sosi salsa? O le tuufaatasiga e aumaia ai le olioli tele!
Ua valaaulia i tatou e lo tatou perofeta e faapotopoto Isaraelu, ia auai “i le lu’i aupito silisili, le pogai silisili, ma le galuega silisili i le lalolagi.”1 O le a se foliga o le tuufaatasia o le galuega o le faapotopotoina o Isaraelu ma tekinolosi?
Ina ua valaaulia oe e Peresitene Russell M. Nelson e fesoasoani e faapotopoto Isaraelu, sa ia tuuina atu ni valaaulia se tele. Sei o tatou vaaii i mataupu faavae e lima e faavae i nei valaaulia, ma le tekinolosi i le mafaufau.
Ata na tusia e Jarom Vogel
1 Faamotu ina ia Fesootai
Sa mua’i valaau mai lo tatou perofeta mo se anapogi faaagafesootai e fitu aso. Sa ou fiafia e fai lea mea! O nisi taimi e manaomia ona tatou faafilemuina mea uma ina ia faalogo moni lava.
Pe a ou faaaluina se taimi e filemu ai, e mafai ona ou lagonaina le filemu o le Agaga Paia. Ma e masani lava o le a oo mai se uunaiga i se tasi e finagalo le Tama Faalelagi ou te auauna atu i ai. O le alu ese mai ala o faasalalauga faaleagafesootai ina ia fesootai ma le Agaga e mafai ona tuuina atu ia te oe ni manatu ma se taitaiga fou.
2 Ositaulaga Teisi e Foai Atu ni Mea Se Tele
O le valaaulia lona lua a Peresitene Nelson o le “faia o se ositaulaga faalevaiaso o le taimi i le Alii,” ia “lafoai se mea e te manao e fai ma faaaoga i lena taimi e fesoasoani ai e faapotopoto Isaraelu.”2
A o e mafaufau i mea e te ono lafoaia, mafaufau foi i ai o le foai atu i le Alii ma Lana galuega. E mafai ona e ositaulaga le matamata i le vitio siva aupito lata mai ma tuu atu lena taimi i tekinolosi i le faavasegaina o igoa, talafaasolopito o aiga, suesueina o le talalelei, po o le faasoa atu o mea ua e aoaoina i isi?
Ou te folafola atu o le mea e te manatu o loo e ositaulagaina o le a le faatusalia i faamanuiaga e te maua.
3 Tutu Malosi
O le isi valaaulia a Peresitene Nelson o le faia lea o se “iloiloga maeaea o le olaga faatasi ma le Alii”3 ia mautinoa o loo e i ai i luga o le ala o feagaiga. O se vaega o le faapotopotoina o Isaraelu o le faapotopotoina lea o oe lava ia latalata atili atu i le Faaola!
E tele naua mea lelei i luga o le initoneti. Ae e le o se mea lilo le i ai foi o le tele o anotusi faataumaoi. O le tu malosi o lona uiga o le matua’i mataala. A o e faalogo i uunaiga a le Agaga Paia, o le a e iloa pe a i ai se mea e le talafeagai, faalumaluma, pe na o se faamaumau taimi. Ole atu i le Tama Faalelagi e faateleina lou silafia ma avatu ia te oe le malosi e liliu ese ai pe tape.
4 Tepa i Luga ma Aapa Atu
Ona toe valaaulia lea o i tatou e lo tatou perofeta ina ia “tatalo i aso faipea ina ia maua e fanau uma a le Atua faamanuiaga o le talalelei a Iesu Keriso.”4 Ioe, sa ia fesili atu ia te oe ona o oe o se vaega o lenei galuega tele, ma o au tatalo e faia ai se eseesega.
Vaai i luga mai lau telefoni ma tilotilo atu ia i latou o siomia oe. Vaai i luga i le lagi e saili le taitaiga i le auala e mafai ona e fesoasoani ai. Ona aapa atu lea—pe ala i le vitio, tesi, tuu i luga, valaau, po o talanoaga—ma faatino au tatalo ma uunaiga a le Alii.
5 Avea ma Malamalama
Mulimuli lava, na valaaulia i tatou e Peresitene Nelson ina ia “tutu matilatila. Ia ese. Avea o se malamalama.”5 Ma e aofia ai le auala e te faaaogaina ai tekinolosi! Manatua o oe o se atalii/afafine faapelepele a ni matua faalelagi, e i ai se natura paia ma se taunuuga e faavavau. Ia faasusulu atu lo outou malamalama i nofoaga uma ma tulaga uma.
Sa faaiuina e Peresitene Nelson ana valaaulia i se faamanatu faapea “o outou o nisi o tagata silisili ua auina mai le Alii i lenei lalolagi. Ua ia te outou le gafatia ina ia sili atu le atamamai ma sili atu le popoto ma tele atu la outou uunaiga i le lalolagi nai lo soo se isi lava tupulaga ua mavae atu!”6
A o outou faaaogaina tekinolosi mo le lelei, o le a avea outou ma se vaega taua o le autau a le Alii o loo taumafai e faapotopoto Isaraelu. E manaomia e le lalolagi lo outou lelei ma le malamalama o le Alii! Ia, o se tuufaatasiga matuai mamana lena!