Fesili ma Tali

“E faapefea ona ou tausisia o’u faamoemoega pe a ou le maua faamanuiaga sa ou faamoemoe i ai?”

“Afai e lei mauaina se faamanuiaga e manaomia mai le Atua—ae … ‘ia faia ma le fiafia mea uma o loo i ai i [lou] mana; ona mafai lea … tutu’ [Mataupu Faavae ma Feagaiga 123:17]. … O nisi faamanuiaga e faapolopolo mo se taimi o mulimuli mai, e oo lava i fanau sili ona totoa a le Atua.”

Elder Dale G. Renlund o le Korama a Aposetolo e Toasefululua, Konafesi Aoao Ape. 2019 (Ensign po o le Liahona, Me 2019, 72).

Ia e Faatuatua ma ia Talitonu.

“E mafai ona tatou tausisia o tatou faamoemoega e ala i le i ai o le faatuatua ma tuu atu lo tatou faalagolago i le Atua. E tusa lava pe le o faamanuiaina i tatou i le taimi nei, e mafai lava ona tatou maua na faamanuiaga i le taimi atofaina.”

Poerani S., 15, Tahiti

Tatalo mo le Faamafanafanaga

“E mafai ona ou tausisia le faamoemoe e ala i le tatalo faamaoni mo le faamafanafanaga mai le Tama Faalelagi. E mafai foi ona ou faitau i lauga o le konafesi po o molimau mai isi tagata o e sa ola e ala i tulaga faapena, ina ia mafai ona ou vaai i le ala na mafai ai ona tausisia lo latou faamoemoe.”

Heinarii S., 16, Tahiti

Taulai atu ia Iesu Keriso

“E taua le i ai o le faamoemoe, aemaise lava pe a taulai atu lena faamoemoe ia Iesu Keriso. O nisi taimi o faamanuiaga tatou te faamoemoe i ai e le oo mai i le taimi tatou mananao ai. Pe a i ai lo tatou faamoemoe i le Alii—ae le na o faamanuiaga tatou te mananao e maua mai ia te Ia—o le a sili atu mea tatou te maua nai lo mea na tatou faamoemoe i ai.”

Nilton R., 19, Atenitina

Ia Tausisia se Vaaiga e Faavavau

“O nisi taimi, e faanoanoa ma e le afaina. Ia tulimatai i luma ma tausia se vaaiga e faavavau. E fesoasoani i le tausia o se uiga faaalia lelei. Sa i ai se taimi ou te lei au ai i le au pasiketipolo a le aoga ma sa faigata. Ae a o faagasolo pea le tausaga, sa ou iloaina semanu o le a faigata atu ia te au le pasiketipolo nai lo le leai. Vaai loloto atu ma vaai i faamanuiaga laiti e mafai ona maua mai ai.”

Candice L., 16, Iuta, ISA

Ia Iloa e I Ai Sana Fuafuaga

“Ou te tausia o’u faamoemoega e ala i le iloaina e alofa pea le Tama Faalelagi ia te a’u ma faamanuiaina a’u i isi auala. Ae lei maliu lo’u uso, sa ou tatalo ia ola o ia, ae sa ou iloa e ese le fuafuaga a le Tama Faalelagi mo ia ma a’u. Sa faamanuiaina a’u e le Tama Faalelagi i le filemu, ma ou te iloa o le a ou toe vaai i lo’u uso.”

Aaron P., 12, Iuta, ISA

E Tuuina Mai e le Atua ia i Tatou Mea Tatou te Manaomia

“E fesoasoani ou te manatua ai o le a tuuina mai e le Atua ia i tatou mea tatou te manaomia, ae le o taimi uma o mea tatou te mananao ai. E mafai ona tatou vaai i faataitaiga o tagata i tusitusiga paia o e na teena faamanuiaga sa latou manatu na latou mananao i ai ae mulimuli ane maua faamanuiaga sa latou manaomia moni lava—o faamanuiaga sa tonu mo i latou.”

Maria B., 18, Iurukuei

O tali ua faamoemoe mo se fesoasoani ma se vaaiga, ae e lē o se faalauiloaga aloaia o aoaoga faavae o le Ekalesia.

O Le A Sou Manatu?

“E mafai faapefea ona avea au ma se faatupu filemu pe a le fealofani tagata o siomia au?”

Auina mai lau tali ma le ata ae lei oo i le aso 15 o Tesema, 2022.

Imeli mai ia i matou i le [e-mail]. Pe alu i le ftsoy.ChurchofJesusChrist.org ma kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “Mo Le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina mai ai ia i matou lau faila.

E ono sui ia tali mo le uumi po o le manino.