“Auaunaga o le Tusi a Mamona,” Mo Le Malosi o le Autalavou, Oke. 2021.
O le Autu ma A’u
Auaunaga o le Tusi a Mamona
“Ou te taumafai e … auauna atu i isi i Lona suafa paia.”
A o ou laitiiti, sa ou faia se uo e le o se tagata o le Ekalesia. Sa valaaulia muamua o ia ma lona aiga i le lotu, ae latou te lei fiafia i ai. Sa ou tatalo e uiga i ai ma lagonaina e tatau ona ou alu i lo latou fale ma tuu atu ia i latou se kopi o le Tusi a Mamona.
O le aso na sosoo ai sa ou tuuina atu ai le Tusi a Mamona i la’u uo ma lona aiga ma fesili atu pe latou te naunau e faitau na o le tasi se mataupu. Sa ou alu i le fale ma ta’u atu i lo’u tina ou te le o mautinoa pe latou te faia. Ina ua mavae sina taimi, sa fesili mai la’u uo pe ou te manao e faaalu le po i lona fale. A o i ai iina, sa fai mai lona aiga sa latou faitau teisi mai le Tusi a Mamona ae latou te lei lagonaina o le taimi sao lea e aoao atili ai e uiga i le Ekalesia.
I le taumafataga o le afiafi, sa fesili mai le tama o la’u uo po o a mea e masani ona fai e tagata o le Ekalesia a o lei aai. Sa ou faamalamalama atu i ai matou te tatalo e uiga i meaai. Sa ia fesili mai pe o le a ou naunau e tatalo. Sa ou te’i! Ae sa ou fiafia foi e faasoa atu mea sa ou talitonu i ai. Sa latou faafetai mai ia te a’u mo la’u tatalo, ma sa fai mai la’u uo sa ia lagonaina se mea a o ou tatalo lea na ia maua ai se lagona lelei i totonu. Sa matou talanoa mo le vaega o totoe o le taumafataga o le afiafi e uiga i le tatalo ma le tele o mea ou te talitonu i ai.
O le taeao na sosoo ai i le taumafataga o le taeao, sa tatalo ai le tama o lau uo mo se faamanuiaga i meaai. Ona ia ta’ua lea sa ia tatalo foi a o lei moe i le po na muamua atu.
E ui latou te lei auai i le Ekalesia, ae ou te fesootai pea ma i latou ma tali a latou fesili e uiga i le Ekalesia ma uunaia i latou e faitau le Tusi a Mamona.
Ou te fiafia e mafai ona avea au ma se faifeautalai ma fesoasoani ia latou lagonaina le Agaga. Ou te iloa o le auauna atu ia i latou ma fesoasoani ia latou lagonaina le Agaga, ua ou fesoasoani ai ia i latou ia latalata atili atu ia Keriso.
E alala le tusitala i Idaho, ISA.