“Vaai atu i le Lagi,” Mo Le Malosi o le Autalavou, Oke. 2022.
Vaai atu i le Lagi
O le vaavaai mo fetu ma nisi paneta ua na o le tasi lea o le auala e faapupula ai e Laysa P. o Pasila lana vaaiga i le lagi.
Ata na tusia e Peter Bollinger; ata na pueina e Barbara Leite
O le tilotilo atu i le lagi i le po e masani ona faatumulia ai tagata i le ofo—o na fetu uma, ma lena vateatea tele. O Laysa P., 18, o Minas Gerais, Pasila, sa vaavaai atu i le lagi i lona olaga atoa.
A o laitiiti, “Sa ou fia iloa e uiga i le atulaulau ma le auala e galulue ai mea uma,” o lana tala lea. Sa fiafia o ia i le vateatea, ma ata o le Star Wars, ma le Star Trek. Sa ia matamata i le Cosmos ma Carl Sagan ma faitau tusi a Stephen Hawking.
O lena fiailoa na taitai atu ai o ia i se malaga fiafia i fetu—e ui e lei tuua lava e ia le siosiomaga o le lalolagi.
Vaega i le Vateatea
O Laysa e auai i se vaega e fiafia i le vanimonimo i Pasila. I se tasi aso sa faasoa mai ai e se tagata o le vaega se sootaga i se avanoa e faavasega ai ata meavaai e vaavaai ai mo fetu mo le NASA. Na lesitala ai Laysa.
“Latou te auina mai ni ata mai le meavaai o le Pan-STARRS i le Iunivesite o Hawaii,” o lana tala lea. “Sa ou faaaogaina le polokalama o le astrometric e iloilo ai nei ata, ma sa ou sailia pe i ai se vaega e minoi ai i uiga o se fetu.”
Ina ua uma sailiiliga auiliili i ata ma auina atu lipoti mo suesuega, i se tasi aso sa ia maua ai se faamaoniga. Sa ia mauaina se fetu. Mo le taimi nei, ua taua o le LPS0003. Ae mulimuli ane o le a ia maua se avanoa e filifili ai sona igoa tumau.
O lenei aafiaga na tuua ai o ia ma se manao mo nisi. “Ou te fia maua ni paneta,” o lana tala lea. “O se tasi lea o a’u miti silisili.”
Ua faateteleina ai foi lona manao e faaauau ana suesuega faasaienitisi. O loo i ai o ia i le taimi nei i se iunivesite a le malo o loo sailia se faailoga maualuga i le fisiki.
Ae o le suesuega faalevateatea e le na o le pau lea o le mea e fesoasoani ia Laysa e liliu atu ai lana vaaiga i le lagi.
Avanoa Fatufatua’i
A o umia ma le mitamita e Laysa lona tulaga o se saienisi atamai, o le upu e tasi na ia fai mai e faamatala ai le mea sili na te mafaia o le fatufatuai.
“O musika o se vaega tele lea o lo’u tagata,” o lana tala lea. Sa tata o ia i musika talu mai lona laitiiti—muamua le piano ona sosoo ai lea ma le vaiolini, lea ua ia taina nei i se faailipu a le setete. Ma e fiafia o ia i le tofiga faalemasina a le taitai pese e tusi se fasi musika puupuu.
O tusi faitau foi e faatupuina ai lona fatufatuai. “Ou te fiafia e faitau i tusi masani mai le lalolagi atoa,” o lana tala lea. “Ma ou te fiafia e tusi tala ma solo. Ou te tusia i taimi uma se mea.
O lenei naunau e fatufatuai o se vaega o lana vaaiga i le olaga. “Ou te talitonu moni lava i le mana o le fatufatuai ma le vaai faalemafaufau,” o lana tala lea. “Ou te fiafia e fatufatuai i vaega uma o lo’u olaga, e oo lava i le fisiki.”
Ma o lenei fatufatuai e fesoasoani ia te ia e vaai atu ai i le lagi. “Pe a ou fatuina ni mea, ua ou latalata atili atu i lo’u Faaola ma lo’u Foafoa. Ou te manatua lo’u Tama Faalelagi ma le malamalama na Ia tuuina mai ia te a’u, o nei avanoa e aoao ai, ma ou te matuai faafetai lava.”
Vaavaai Atu i le Lagi mo se Fesoasoani ma se Taitaiga
Mo Laysa, o le auala sili ona taua na te liliuina ai lana vaaiga i le lagi e ala lea i le tatalo e le aunoa ma le suesueina o tusitusiga paia.
Mo se faataitaiga, a o ia sauniuni mo le suega ulufale mo le iunivesite, “o le mea muamua lava sa ou faia o le tatalo ma faitau muamua tusitusiga paia,” o lana tala lea. “Sa mafai ona ou vaai i le Alii o fesoasoani mai ia te au e aoao, ia taulai atili atu.”
Ua musuia o ia i le faataitaiga a Nifae. Ina ua le tatalo ona uso aua sa latou le talitonu o le a latou maua ni tali, sa faamanatu atu e Nifae ia i latou le folafolaga a le Alii: “Afai tou te le faamaaa o outou loto, ma ole mai ia te au i le faatuatua, ma le talitonu o le a outou maua, ma le filiga i le tausiga o a’u poloaiga, e moni o le a faailoa atu nei mea ia te outou” (1 Nifae 15:11).
“Pe a ou faitauina lenei mea, e musuia au e fesili atu i lou Tama Faalelagi po o le a se mea ou te manao ia iloa, mea e tatau ona ou iloa mo lou olaga ma mo le taimi nei,” o le tala lea a Laysa.
Fai mai o ia o le tatalo ma le suesueina o tusitusiga paia “e fesoasoani ia te au ia malosi ma ia i ai se vaaiga lelei mo le lumanai.” Na te iloa o loo i ai le Atua iina ma o le a taialaina ma fesoasoani ia te ia.
Fesoasoani i Isi e Vaai Atu i le Lagi
O le tele lava o lona faamanuiaina i le vaai atu i le lagi, o le tele foi lea o le manao o Laysa e fesoasoani i isi ia faia lea lava mea e tasi—e amata i lona lava aiga.
“Ou te fia fesoasoani i lo’u aiga, aemaise lava lo’u tuagane laitiiti, e mulimuli ia Iesu Keriso,” o lana tala lea. E na o Laysa, lona tuagane, ma lo la tinamatua sa toaaga i le Lotu. O lea o le faia o se faataitaiga lelei ma fesoasoani i lona aiga “o se tasi lea o a’u sini aupito sili i lo’u olaga atoa,” o lana tala lea.
E fiafia foi o ia e faasoa atu le talalelei i ana uo. Sa papatisoina foi se tasi o ana uo ina ua uma ona valaaulia o ia e Laysa ina ia aoaoina e faifeautalai. “Ou te fia faia lenei mea i lou olaga atoa,” ua ia fai mai ai, “e faasoa atu musumusuga ma le malamalama ua tatou maua i isi tagata. E manaomia ona latou maua lenei fiafia, lenei faamafanafanaga, ma nei tali ua tatou maua.”
E le o se mea la e faateia ai, ona ua ia fuafua e auauna atu i se misiona pe a atoa lona 19 tausaga ina ia mafai ai ona ia faasoa atu le talalelei a Iesu Keriso i le tele o tagata.
Ma e manao o ia e galue i lona talafaasolopito o aiga ina ia mafai ona ia fesoasoani e faapotopoto Isaraelu i le isi foi itu o le veli. Sa alu o ia i le Malumalu o Campinas Pasila ma ua fiafia mo le malumalu ua fofogaina mai e latalata atu i le aiga i Bela Horizonte.
Toafimalie ma Fetu, saunia e Yongsung Kim, Havenlight.com
Vaavaai Atu Pea i le Lagi
Afai e mafai e Laysa ona faasoa atu se savali se tasi i tagata uma, fai mai o ia o le savali lenei: “Aua le fiu.”
“Aua le fiu i mea e te alofa i ai, i mea amiotonu e te manao ai,” o lana tala lea. “A o tatou taumafai pea, a o tatou faaauau pea ona talitonu ma suesue pea, e mafai ona tatou faalagolago i le fesoasoani a le Alii.”
Ua ia vaaia lenei mea i lona aiga. Ina ua 10 ona tausaga, sa talosagaina o ia e tuuina atu se molimau o le papatisoga i le polokalama o le sauniga faamanatuga a le Peraimeri. Na pau lava le mea, e lei papatisoina lava o ia. E lei tuuina atu e lona tina lana faatagaga. O lea sa le mautinoa ai e Laysa le mea o le a ia fai mai ai i lana molimau, ae sa muamua o ia i luma. Ona tupu lea o se vavega. “Sa i ai lo’u tina i le lotu i lena aso,” o le tala lea a Laysa. “Ou te lei faamoemoe e i ai o ia iina. O lena aso, sa ou maua ai lana faatagaga e papatiso ai.
“Ua tele lo matou alualu i luma i lo’u aiga i le talalelei,” o lana tala lea. Ua papatisoina lona tuagane. Sa latou faitauina faatasi foi tusitusiga paia ma lo latou tina, ma o nisi taimi e sau ai o ia i le lotu.
Ona o aafiaga faapenei, ua iloa ai e Laysa “e mafai e le Atua ona faia vavega i o tatou olaga.”
“Ou te talitonu e faigofie—aua le fiu, ma faalagolago i le Alii,” o lana tala lea. “O le a Ia aveina i tatou i se nofoaga e le mafai ona tatou mafaufauina.”