“Auala e Aloese Ai mai le Faanoanoa e Maalofia,” Mo le Malosi o le Autalavou, Oke. 2022.
Sau, Mulimuli Mai ia te A’u
Ieremia; Auega
Auala e Aloese Ai mai le Faanoanoa e Maalofia
Ua aoao mai i tatou e se perofeta anamua ma ona po nei o le liliu atu i le Atua o le auala sili lava lea e alu ai.
Ata na tusia e Michael Mullan
“Ua oo mai le faatafunaga!”
Oka se savali faigata e tuuina mai! Ae sa manaomia ona tuuina mai. Sa liliuese tagata o Ierusalema mai le Atua, teena Ana perofeta, ma sa ola i le agasala ma le le usiusitai. Sa finagalo le Atua ia latou iloa sa Ia taumafai e fesoasoani ia i latou, ae o lea ua oo mai taunuuga leaga.
Na valaauina e le Atua Ieremia e lapatai atu i tagata. O se galuega faigata lenei ona sa leai se tasi na faalogo. I le iuga, o le salalau solo o le amioletonu na taitai atu ai i le faatafunaga o Ierusalema ma sa ave faatagataotaua tagata i Papelonia.
O Le Mana o Filifiliga
O nisi taimi o le faanoanoa e sau mai mea e tutupu e le mafai ona tatou puleaina pe mai filifiliga a isi. Ae o le tele o faanoanoaga e mafai ona alofia e ala i filifiliga tatou te faia.
Na lapataia e Ieremia tagata o la latou filifiliga e liliu ese mai le Atua ma le amanaia Ana aoaoga o le a taitai atu ai i le faanoanoa. O le mea e faafetai ai, o tusitusiga paia ma upu a perofeta o aso nei e fesoasoani ia i tatou e iloa ai po o a filifiliga o le a taitai atu ai i le olioli ma fesoasoani ia i tatou e aloese ai mai faanoanoaga e mafai ona alofia. O nisi nei o faataitaiga:
Uai Atu i le Afioga a le Atua
Na ala mai ia Ieremia, na ta’u atu ai e le Atua i le nuu o Ierusalema “ua latou tuua au le puna o vai ola” (Ieremia 2:13). E taua le vai e faatumauina ai le ola faaletino. I tusitusiga paia, o le vai o se faatusa o Iesu Keriso ma Ana aoaoga, lea e taua mo le ola e faavavau.
Na aoao mai Peresitne Russell M. Nelson a tatou gauai atu i le afioga a le Atua, “e tuuina mai e le Atua ia i tatou le mamanu mo le manuia, fiafia, ma le olioli i lenei olaga. …
“… Ou te folafola atu o le a faamanuiaina outou i le mana faaopoopoina e taulima ai faaosoosoga, faigata, ma vaivaiga. Ou te folafola atu vavega i a outou … mafutaga faaleaiga, ma galuega i aso taitasi. Ma ou te folafola atu o le a faateleina lou gafatia e lagona ai le olioli e tusa lava pe faateleina puapuaga i lou olaga.”1
O Le Faamanuiaga o le Salamo Faifaipea
O se faafitauli tele mo tagata o ona po o Ieremia ona sa latou galulue e pei latou te tuuto atu i le Atua, ae sa latou le faamaoni (tagai Ieremia 3:10; 7:8–11). E popole le Atua i manaoga o o tatou loto. E mafai faapefea ona tatou mautinoa tatou te faamaoni i le mulimuli ia te Ia?
Na ta’u atu e le Alii ia Ieremia e mafai ona tatou “sauni lelei o [tatou] ala ma [a tatou] amio” (Ieremia 7:3). I se isi faaupuga, e mafai ona tatou salamo. Ua uunaia i tatou e Peresitene Nelson ia i ai “se taulaiga masani i aso taitasi i le salamo.” Na ia saunoa: “O le salamo e le o se mea e faa-tasi ona tupu; ae o se faagasologa. … [O le] faia ma le lelei teisi atu i aso taitasi. …
“A tatou filifili e salamo, ua tatou filifili e suia! Ua tatou faatagaina le Faaola e suia i tatou i o tatou lava ituaiga tagata silisili. Tatou te filifili e tuputupu a’e faaleagaga ma maua … le olioli o le togiolaina ia te Ia. A tatou filifili e salamo, ua tatou filifili ia avea atili e faapei o Iesu Keriso!”2
Mulimuli i le Perofeta
Sa tele ina teena aoaoga a Ieremia. O le mea lava lea e tasi na tupu i perofeta i le talafaasolopito atoa. Latou te lapataia i tatou e uiga i tulaga matautia faaleagaga o le teenaina po o le faauigaeseina o upumoni o le talalelei ina ia atili faatosina ai pe taliaina ai.
“O le upumoni o le upumoni,” na saunoa ai Peresitene Nelson. “O le upumoni e faavae i luga o tulafono ua faavaeina e le Atua.” Na ia saunoa foi: “O le mea moni ona e loloto lo tatou amanaia o fanau uma a le Atua o lea tatou te folafola atu ai Lana upumoni. Atonu tatou te le ta’uina atu i taimi uma i tagata mea latou te fia faalogo i ai. O perofeta e seasea ona lauiloa. Ae o le a tatou aoao atu pea le upumoni!”3
Fesoasoani i le Ala
O nisi taimi o mea tatou te fetaiai e mafai ona lagona ai le lofituina. E mautinoa lava na faapena lagona o Ieremia. Ina ua valaauina o ia e le Atua e avea ma perofeta, sa le mautinoa e Ieremia ona tomai. Sa faamalamalama mai e le Atua sa Ia silafia Ieremia a o lei fanau mai o ia ma sa Ia faauuina, pe filifilia, o ia ma fesoasoani e saunia o ia mo lana misiona (tagai Ieremia 1:5).
E silafia foi oe e le Atua. A o e liliu atu ia te Ia, o le a Ia fesoasoani ia te oe e aloese mai le faanoanoa lea e sau mai le agasala ma le le usiusitai. O le a Ia tuuina atu ia te oe le malosi e faataunuu ai mea e finagalo o Ia e te faia, e tusa lava po o le a le mea e oo mai i lou ala.