“Faia o se Aiga Faalelagi Sili Atu,” Mo le Malosi o le Autalavou, Oke. 2022.
O le Autu ma A’u
Ua faasoa mai e le autalavou auala o loo latou ola ai i upu o Autu a Tamaitai Talavou ma le Korama a le Perisitua Arona
Faia o se Aiga Faalelagi Sili Atu
O le a ou saunia ia avea ma se … tane faamaoni, ma se tamā alofa e ala i le avea ai ma se soo moni o Iesu Keriso.
O le ola ai i le talalelei, ua ou aoao ai e auauna atu i isi—aemaise lava i le aiga. Pe a ou fesoasoani i lo’u tina, e itiiti sona lagona lofituina, ma o galuega o le fale e mama mo ia.
E masani lava ona ta’u mai e lo’u tina ia i matou e tausia le faatulagaina o le fale. E mafai ona faigata lenei mea i tagata e toafitu i le fale, ae a tatou i ai i se fale faatulagaina ma mama, e mafai ona tatou lagona le latalata atili atu i le Atua.
Ua aoao mai perofeta o le nofoaga sili mo i tatou e aoao ai e uiga i le talalelei o totonu o o tatou aiga. E masani lava ona matou suesue o se aiga i tusitusiga paia. O nisi taimi e faigata, ae faatasi ai ma taumafaiga matou te mafaia ai ona suesue. E fesoasoani lenei mea i le Agaga ia i ai atili i totonu o lo matou aiga ma e mafai ona fesoasoani ia i matou e tetee atu ai i osofaiga a le lalolagi i aiga.
O le isi mea e faamalosia moni ai lo matou aiga o le faia faatasi o gaoioiga. E mafai ona avea o ni mea faigofie e pei o le nofonofo i fafo o le pito i luma o lo matou fale e talanoa pe o atu e fai se meaai mama. Pe a matou faia lenei mea, e maua e tagata uma le lagona lelei, ma o le a atili malolosi ai a matou sootaga.
Ua ou aoaoina o se tiutetauave sili le avea ma se e umia le perisitua. E tele mea e mafai ona ou faia e auauna atu ai ma faamanuia o’u tuaoi aemaise lava le auauna atu i lo’u aiga e ala i le perisitua. O le nafa ma lo’u valaauga e taua foi. Soo se taimi lava ou te maua ai se valaauga e auauna atu, ou te taumafai lava ia tuuto atu i ai i au taumafaiga silisili. Ou te iloa o le mea lava lea e tasi o le a moni pe a ou maua le tiutetauave sili o le avea ai ma se tama.
E ala i le faaaogaina o nei mea ma mulimuli i le faataitaiga a lo tatou Faaola o Iesu Keriso, ua ou saunia ai au lava ia avea ma se tane ma se tama lelei i le lumanai. O le fesoasoani i lo’u tina ma le taumafai e ola i le talalelei ua aoaoina ai a’u i lenei mea. Ou te iloa o le alofa o le Atua mo a’u ma Lona finagalo ia i ai se aso e mafai ai ona ou taitaia lo’u aiga ma le mamalu.
O le tusitala e alala i Rio Grande do Sul, Pasila.