“I Culiacán, Mekisiko,” Mo Le Malosi o le Autalavou., Oke. 2022.
O Le Auala Matou te Tapuai ai
I Culiacán, Mekisiko
Talofa, o a’u o Deseret! Ua 17 ou tausaga, ma e toafitu tagata i lo’u aiga.
I le taimi o le faama’i pipisi o le KOVITI-19, sa tatau ona ou maua ni mea fou e fai. Ou te vali, faaleleia ma faia ni lavalava, vali atigilima, faalogologo i musika, matamata i ata tifaga, ma faaalu le taimi ma lou aiga. Ou te faia foi ituaiga eseese o ula ma lo’u aiga.
O lo’u tina o se faiaoga o aoaoga faapitoa. I le taimi o le tuuaga i le taumafanafana, ou te fesoasoani ia te ia i tamaiti o loo ia aoaoina. E tasi lou tausaga o totoe o le aoga maualuga. A mavae lena, ou te fia avea ma se tagata faigaluega i le vaalele faavaomalo po o le avea ma se faiaoga o aoaoga faapitoa, e pei lava o lo’u tina. Ou te fia femalagaai foi.
Avea ma se Tagata o le Ekalesia i Mekisiko
Sa masani ona taumafai a’u uo i le aoga ia ou faia pe fai atu ni mea e le tusa ai ma o’u tulaga faatonuina, ae o lea ua latou iloa o a’u o se tagata o le Ekalesia ma le mea ou te tu ai, latou te faaaloalogia o’u tuaoi.
Ou te iloa a o ou taumafai e tausi poloaiga, o le a faaatoatoaina au e ala ia Iesu Keriso. Ua tuuina mai e la’u molimau ia te a’u le malosi e faaauau ai pea. Ua ou iloa o au o se atalii o le Atua. E mafai ona avea au ma faataitaiga ma tu atu mo le mea ou te iloa e moni. Ou te fiafia e iloa e mafai ona ou fesoasoani i isi ia latalata atili atu ia Keriso.
O le Malumalu o Hermosillo Mekisiko o le malumalu aupito latalata lea ia te au. O le taimi muamua lava na ou asiasi ai i le malumalu faatasi ma la’u vaega o le autalavou, sa ou lagonaina le tele o le filemu. Ou te lei lagonaina muamua lava lena lagona.
O loo ou sauniuni e osia feagaiga i le malumalu e ala i le faia o vasega sauniuni mo le malumalu i le fale ma suesue i lesona.
O i maua ma lo’u uso o peresitene o a matou vasega a Tamaitai Talavou. O isi vaiaso uma pe a matou feiloai o ni talavou, matou te faasoa atu mea matou te aoaoina mai le Sau, Mulimuli Mai ia te A’u. Ou te ofo i le tele o lo’u fiafia e faalogo i o latou manatu ma faasoa atu o’u lava manatu.
Saunia mo se Misiona
Sa faamisiona uma o’u matua i Mekisiko. Sa ou manao e alu i se misiona talu mai le 15 o ou tausaga, o lea sa ou sauniuni ai e auauna atu. E atoa le 18 tausaga o lo’u tuagane laitiiti pe a atoa lo’u 19, o lea o le a ma auina atu ai a ma pepa o le misiona i le taimi lava e tasi. O loo ou sefeina se tupe mo la’u misiona e ala i le galulue faatasi ma lo’u tina. E i ai sa’u fagu laitiiti ou te tuuina ai i totonu au tupe, ma o loo ou taumafai e faatumu. Ou te fia aumaia ni tagata se toatele ia Keriso ma Lana Ekalesia ina ia aumaia le lelei i o latou olaga ma a’u foi.
Sa ou auina atu mau e ala i faasalalauga faaagafesootai. Ou te aveina upusii ma fuaitau mai le uepisaite a le Ekalesia ma auina atu i a’u uo i luga o ala o faasalalauga faaagafesootai. E tuuina mai foi e faifeautalai ia i matou ni kopi o le Tusi a Mamona, ma ou te fiafia e tuuina atu i a’u uo.