“Faapotopotoina i Lona Malamalama: Aloese mai le Nofopologa,” Mo le Malosi o le Autalavou, Oke. 2022.
Faapotopotoina i Lona Malamalama: Aloese mai le Nofopologa
A o e ola amiotonu, o le a le gata ina e solaese mai le nofopologa mai le fili, ae o le a avea foi oe ma se faataitaiga o le faamoemoe ma le malamalama i isi.
Ata na tusia e Maggie Stephenson
Sa tatou lagonaina uma le tuuatoatasi i se tasi taimi po o le isi. O le mea moni, atonu na e lagonaina le tuuatoatasi talu ai nei. Ae o le mea matagofie e uiga i le talalelei o le, po o fea lava o e i ai, e mafai lava ona e lagona le pei e te auai. E mafai ona moni lenei mea e tusa lava pe toalaiti ni tagata o le Ekalesia e lata ane.
I lo matou lava aiga, sa matou faaaluina le 33 tausaga i le Penisula o San Francisco i le Iunaite Setete. Ou te le manatu sa i ai lava se taimi na sili atu ai ma le tasi se isi tagata i vasega o le aoga maualuga a le ma fanau.
E ui i lea, i na tausaga uma, sa matou iloa na faapotopoto faatasi i matou e le Alii o se vaega o le aiga o Isaraelu. Sa ma lagonaina se lagona o le auai a o ma ola ai i le talalelei. E pei ona saunoa Elder Russell M. Nelson, o le faapotopotoina “e le o se mataupu o nofoaga faitino ‘o se mataupu o tautinoga faaletagata lava ia. O tagata e mafai ona ‘aumai i latou i le malamalama o le Alii’ [3 Nifae 20:13] e aunoa ma le tuua o o latou lava laufanua.”1
A o e ola i le talalelei, o loo e faapotopotoina oe lava i le Alii. A o e faia lau vaega e faapotopoto mai isi i le talalelei, ua e faataunuuina le galuega taua o le fesoasoani i le Alii e faapotopoto Isaraelu.
Sao Mai le Nofopologa ma le Amioletonu
A o tatou faapotopotoina i tatou lava ia Keriso e ala i le mulimuli i Ana aoaoga, tatou te maua le saolotoga ma le faitalia lea e na o le talalelei lava e mafai ona tuuina mai—saolotoga e maua ai faaaliga faaletagata lava ia ma le faitalia e avea ai ma tagata e finagalo le Tama Faalelagi e avea ai i tatou. O le ola amioletonu e mafai ona taitai atu ai i le nofopologa ma tapulaa, i le faaletino ma le faaleagaga.2 A o tatou fesoasoani i le faapotopotoina o a tatou uo ma e pele i le talalelei, e aofia ai le fesoasoani ia i latou e osia ma tausia feagaiga paia ma le Atua, e mafai ona tatou fesoasoani ia i latou ia maua le saolotoga mai le tele o ituaiga o pologa.
O se tala faamusika ou te fiafia i ai e faapupula ai le mataupu faavae o le nofopologa faaleagaga ma faaletino. I lona talavou sa fiafia ai Giuseppe Verdi i le perofeta o Ieremia mai le Feagaiga Tuai. I le 1842, i le 28 o ona tausaga, sa ia tusia ai le tala faamusika Nabucco, o se sootaga ia Nepukanesa, le tupu o Papelonia, o le sa soifua i le taimi o Ieremia.
O lenei tala faamusika o loo talanoaina ai le faatoilaloina o Ierusalema ma le aveina faatagata o taua ma le nofopologa o tagata Iutaia, lea na sau mai le ola amioletonu (tagai Ieremia 13:9–19). O le Salamo 137 o le uunaiga lea mo le tala faamomoiloto ma le musuia a Verdi o le “Pese a Pologa Eperu.” O le ulutala o lenei salamo i a tatou tusitusiga paia e matua matautia lava: “A o nofo pologa ai, sa fetagisi ai tagata Iutaia i talaane o vaitafe o Papelonia—Ona o le faanoanoa, sa le mafai ai ona latou pepese i pese o Siona.”
Na faamoemoe le Atua o le a saoloto alii ma tamaitai e faia ni filifiliga i le va o le lelei ma le leaga. A oo ina avea filifiliga leaga ma uiga e pulea ai se aganuu po o se malo, o le a i ai taunuuga ogaoga e le gata i le olaga nei ae faapea foi le olaga a sau. E mafai ona faapologaina tagata pe tuu i latou lava i le nofo pologa e le gata i vailaau lamatia ua fai ma vaisu ae faapena foi i filosofia lamatia ua fai ma vaisu lea ua o ese ai mai le ola amiotonu. E mafai ona tatou vaaia lena mea o loo tupu i o tatou aso.
E tatau ona tatou faia mea uma i lo tatou malosi e aloese ai mai le agasala ma le fouvale lea e taitai atu ai i le nofo pologa.3 A o tatou faia, ua tatou te faaagavaaina i tatou lava mo musumusuga a o tatou fesoasoani i le Alii i le faapotopotoina o Lana au filifilia ma i le faapotopotoina moni o Isaraelu.
A o e ola amiotonu, o le a le gata ina e solaese mai le nofopologa mai le fili, ae o le a avea foi oe ma se faataitaiga o le faamoemoe ma le malamalama i isi.
Ia Faasusulu Atu Lou Malamalama
Pe o i ai ni uo po o e pele i lou olaga ua tumu i le faanoanoa lea e le mafai ai ona latou usuina pese o Siona, pe lagonaina le olioli o le talalelei?
Pe i lou lava aiga po o tagata ese, pe a oo i le faasoaina atu o le talalelei, e mafai ona avea oe ma se malamalama susulu a o e taliaina ma ola i le malamalama o le talalelei.4 Ae afai e le iloa e tagata e te alofa ia i latou, o le a le tutusa ou aafiaga. O le mea lea e tatau ai ona tatou saili ia faatumulia pea i le alofa mo isi. A tumu oe i le alofa mo fanau uma a le Tama Faalelagi, o le a vaai tagata uma i lou malamalama. O lenei malamalama e mafai ona i ai ni aafiaga loloto e sili atu nai lo mea e te ono matauina.
E ala i le avea ai ma tagata ua avea ai oe ma le ola ai i se olaga amiotonu, e mafai ai ona e tosina mai isi o e o le a matauina oe ma le ala e te ola ai. O lenei mea o le a totoina ai ni fatu e le mafaitaulia ia e mafai ona fua mai i le tele o fua i le taimi e tatau ai.5 A o lei taitai lava lou matua e auauna atu i se misiona, e mafai ona e fesoasoani i le totoina o fatu, sailia o le au filifilia, ma faapotopoto mai i latou ia Keriso.
E mafai ona e amata i le atiina ae o lenei alofa ma le malamalama i lou lava aiga. E mafai ona umi lenei faagasologa, o lea faamolemole aua nei lagonaina le lotovaivai i finauga po o misa a tagata i totonu o lou aiga. O le faaaloalo mo se taimi umi e manaomia ai se taumafaiga mo se taimi umi. Faaalu se taimi e galue ai i sootaga faaleaiga. E mafai ona e amata i le faaalia o le faaaloalo ma le aoao e aloese mai faitioga.
I totonu o le aiga, o faitioga o se ituaiga o mea oona e mafai ona faatamaia ai le lotogatasi. Afai e fai e se tagata se mea sese, e pei o le pau mai o se ipu mai le laulau, e le manaomia e lenei mea le salamo po o faitioga. Ae, o le aoao atu ma le agamalu e na o le pau lea o le mea e manaomia. E tatau ona tatou aoao ia onosai le tasi i le isi, aemaise lava i o tatou aiga. Ou te manatu afai o se aiga e mafai ona avea ma ituaiga o nofoaga e leai se faitioga, ona mafai lea ona tupu lauusiusi le alofa.
Faapotopotoina i le Saogalemu
Ou te toe fai atu, pe a tatou nofopologa, o le a faatapulaa a tatou faatinoga o loo avanoa. O le fofo o le sailia lea o le saolotoga ma le malamalama ma le alofa i le saogalemu o le talalelei. O le nofopologa i le agasala e mafai ona taitai atu ai oe ia lagona e pei e le mafai ona e usuina pese o Siona. Ae o loo avanoa pea le salamo. E mafai ona faapotopotoina i tatou i le aiga o Isaraelu ma fesoasoani i isi e faapotopoto i le saogalemu faatasi ma i tatou.
A o e taulai atu pea i le talalelei, i le Faaola, ma i luga o le malumalu, o loo e faia tonu lava le mea e te manaomia. E mafai ona e nofo i soo se mea i le lalolagi, e tusa lava pe toalaiti le aofai o tagata o le Ekalesia, ma o loo avea pea ma se vaega tele o le Ekalesia ma le malo ma le faapotopotoina. E le tuua lava na o oe pe a e i ai i le aiga o Isaraelu.