“O La’u Tauiviga ma le Popole i le Lotu,” Mo le Malosi o le Autalavou, Oke. 2022.
Faavae Maumaututu
O La’u Tauiviga ma le Popole i le Lotu
Ata na tusia e Melissa Manwill
Sa i ai lava lo’u popolega i taimi uma. Ina ua 17 ou tausaga, sa ou matauina o le tele o a’u osofaiga o le popole na tutupu i le lotu.
Sa ta’u mai ia te au i taimi uma afai ou te faitauina tusitusiga paia, fai au tatalo, ma alu i le lotu, o le a ou fiafia. Ia, e le o le tulaga lena mo a’u. Ou te fiafia i nai minute muamua o le lotu, ona amata ai lea o se osofaiga o le atuatuvale.
Sa fesoasoani lo’u epikopo ia te a’u ia iloa o faamoemoega faaleagaga sa ou setiina mo a’u lava ia atonu o le mafuaaga lea. Sa ou manatu e tatau ona ou maua ia lava aafiaga faaleagaga faavavega sa ou faalogo i ai. Sa ou malamalama o lenei uunaiga e mafai ona mafua ai au osofaiga faifai pea.
I se tasi aso na fesili mai ai se tasi ia te au, “Aisea e te alu ai pea i le lotu?” Sa ou tei. Aisea na ou alu ai pea i le lotu? Sa lei faamalosia au e alu. Ou te lei mauaina ni faamanuiaga faavavega. Ae sa ou iloaina sa ou faaauau pea ona sa ou iloa e moni le Ekalesia ma e finagalo le Tama Faalelagi ia ou i ai iina. O lo’u alofa mo Ia na lofituina ai lo’u manao ia saoloto mai le atuatuvale.
O nisi taimi sa ou manao ai i faamanuiaga vave mai le Tama Faalelagi. Sa ou manatu o le a Ia faamanuiaina au i le itiiti ifo o osofaiga o le atuatuvale ona sa ou alu i le lotu. Ae sa ou aoaoina e le faapena le auala e galue ai. E masani ona ou taulimaina osofaiga ma auai i le lotu a o lei mafai ona ou vaai i Ana faamanuiaga.
Ua ou iloaina nei e mafai foi ona ou fesili atu mo se fesoasoani mai ou matua ma tagata tomai faapitoa faafomai. O loo i ai pea o’u aso leaga, ae latou te le puleaina a’u. Nai lo lena, latou te fesoasoani mai ia te a’u e faamaonia atu i lou Tama Faalelagi ou te alofa ia te Ia ma o le a ou tau i lenei luitau faatasi ai ma Lana fesoasoani.
I le Faatoaga o Ketesemane, sa fesili ai Iesu Keriso pe mafai ona aveese Lona tofotofoga, ae i le usiusitai atoatoa i lo tatou Tama Faalelagi, sa Ia manumalo ai i le tofotofoga silisili o tofotofoga uma. Ona o lenei mea, ua ou iloa ai o le a Ia tuuina mai ia te a’u le malosi e onosaia ai foi o’u tofotofoga.
Heidi L., Hawaii, ISA