Molitaofio Taaloga Vitio
O le a se mea e mafai ona fai e Natano e oo ai i le lanumeamata?
Na matua oomi e tamailima a Natano ia ki o le taaloga. Sa matua latalata lava o ia i le malo i lenei tulaga! Sa sioa atu o ia i le TV a o ’alo lana vaa roketi mai pomu lanumeamata.
“Natano, taimi mo le meaai o le afiafi!” O le valaau lea a Tina.
Pa! Na lavea le vaa a Natano. Sa oi Natano. O lea la ua tatau ona ia toe amata. Ae sa ia iloa e mafai ona ia faatoilaloina lenei vaega pe afai na te toe taumafai tasi lava.
Sa sau Tama i totonu o le potu. “Na e lagona mai Tina? Ua oo i le taimi e aai ai.”
Sa mapuea Natano ma taofi le taaloga. Sa la nonofo faatasi ma Tama ma isi tagata uma o le aiga. Sa ‘ai e Natano ana meaai i le vave na te mafaia. Sa manao o ia e toe foi i lana taaloga.
“Faafetai! Sa manaia le meaai.” Sa oso ese o ia mai le laulau.
“Faatali ea, sole,” o le tala lea a Tama. “Ma te fia talanoa ma Tina ia te oe.”
A-oi! Pe sa i ai se faaletonu ia Natano?
Ina ua uma ona aai isi tagata uma, sa nonofo Tina ma Tama i le laulau faatasi ma Natano.
“Ua ma matauina ua e faaaluina le tele o le taimi e taalo ai i taaloga vitio,” o le tala lea a Tama.
Sa feminoia’i Natano. “O ni mea malie tele.”
“E sa’o,” o le tala lea a Tina. “Ae e malie foi isi mea. Sa matou misia oe ananafi a o matou taaalo o se aiga i taaloga. E tele atu lo matou fiafia pe a e faatasi ma i matou!”
Sa taalo Natano i se tulaga ponesi matagofie o le po anapo. E oo atu i le taimi na ia faatoilaloina ai, ua uma taaloga a lona aiga. Sa ia lagona sina faanoanoa sa ia misia.
Sa faauu Natano. “O lona uiga la e le o toe faatagaina ona ou taalo i taaloga vitio?”
“Ma te le o fai atua lena mea,” o le tala lea a Tama. “Ma te mananao ia e nofouta atili i le tele o le taimi e te faaaluina ai. Ma ia mautinoa latou te le o taofia oe mai isi mea taua, e pei o feau ma meaaoga ma suesuega o tusitusiga paia.”
Sa tilotilo i lalo Natano. “Ou te masalo sa ou misia nisi o mea.”
“Ma te mautinoa e mafai ona e fuafuaina pe faapefea ona maua se paleni sili atu,” o le tala lea a Tama.
“E mafai ona lua fesoasoani mai?” O le fesili lea a Natano.
Na ataata Tina. “Ioe.”
Sa filifili faatasi Natano, Tina, ma Tama i le tele o le taimi o taaloga vitio e tatau ona faia e Natano i aso taitasi. O lea sa latou mafaufau ai i se fuafuaga. O le a latou tuuina se pepa lautele o i ai se molitaofi i autafa o le TV. Afai e mafai e Natano ona taofi le taalo ina ua valaau atu Tina ma Tama ia te ia, o le a ola le molitaofi i le lanu samasama. Afai e sili atu ma le faa-tasi ona la fesili atu ia te ia, o le a lanumumu. Ma afai e mafai ona ia taofi na o ia ae latou te lei fesili atu, o le a alu i le lanumeamata.
O po taitasi a o lei oo i le taimi e momoe ai, latou te talanoa pe na faapeī mai Natano i lena aso. Afai na lanumumu le molitaofi, o le a itiiti sona taimi e taalo ai i le aso e sosoo ai. Ae afai e tumau ai i le lanu meamata, o le a ave o ia e Tina ma Tama i le falemataaga o le vateatea!
Na iloa e Natano o le a faigata ona suia ona mausa. Ae sa saunia o ia mo le lu’i.
Mo nai aso muamua, sa tumau ai pea le molitaofi i le lanu samasama. Ona sasi lea o Natano, ma sa tatau ona alu i le lanumumu. Sa manao o ia e taumafai malosi atili i le isi taimi. O le aso na sosoo ai, sa ia setiina ai se faailo ina ia ona iloa le umi o lana taalo. Mulimuli ane, sa ia oo atu i le lanumeamata!
Ina ua mavae ni nai aso lanumeamata, sa ave o ia e Tina ma Tama i le falemataaga o le vateatea. Sa sioa atu Natano i se roketi tele. Sa foliga mai o le roketi i lana taaloga, ae sa sili atu. Sa ataata o ia. Sa manaia le i ai iinei ma Tina ma Tama. Sa manao o ia e vaai po o le a le umi e mafai ona ia nofo ai i le lanumeamata!
Ata na tusia e Carolina Farías