O Paionia i Atunuu Uma
O Le Malaga Umi a Silivia i le Malumalu
Sa iloa e Silivia o le a aoga le malaga.
Sa osooso atu Silivia i totonu o le potu o le Peraimeri ma nofo i lalo. Sa lelei lava ona lagona i taimi uma i le Peraimeri.
Sa uu i luga e Sister Rioja se ata o le malumalu. “I totonu o le malumalu, e mafai ona faamauina ai i tatou i o tatou aiga,” o lana tala lea. “O lona uiga e mafai ona tatou faatasi ma i latou e faavavau pe afai tatou te mulimuli i poloaiga a le Atua.”
Na sii i luga le lima o Silivia. “O le a ou alu i le malumalu ina ia faamauina i lo’u aiga i ni nai aso!” o lana tala lea. “Ua ou fiafia ai lava.”
Na ataata Sister Rioja. “O le a avea ma se tietiega umi mo oe! Ae ou te iloa o le a aoga.”
Sa leai se malumalu i Sepania, lea sa nonofo ai le aiga o Silivia. O lea e tatau ai ona latou tietie atu i le ala mamao i le malumalu i Suitiselani. E lua aso e malaga ai!
I le taeao o le Aso Lua, na ala po ai Silivia. Sa fesoasoani o ia i ona matua e tapena le taavale. Ua oo i le taimi e tietie atu ai i le malumalu.
I le taavale, sa taumafai Silivia e fegalegaleai ma lona uso ma lona tuagane laitiiti. Sa latou taaalo i ni taaloga ma usu pese. Sa taina e Papa se puega o musika masani faaSipaniolo a o latou tietie atu. Ina ua vaivai o ia, sa sioa atu Silivia i fafo o le faamalama. Sa ia matamata i mauga lanumeamata o pasi a’e i tafatafa seia moe o ia.
Na mavae le aso muamua. Sa foliga mai o le a le muta lava le faigamalaga i le taavale. Ae sa manatua e Silivia le mea na fai mai ai Sister Rioja. O le a aoga lava, sa ia mafaufau ai.
Ina ua mavae se isi aso o le tietiega, sa iu ina iloa atu e Silivia le tumutumu pa’epa’e o le malumalu. “O Lale!” Sa ia faasino atu mai le faamalama. “Ae a le malumalu lale!”
Sa patipati e le tuagane laitiiti o Silivia ona lima. Sa solo ese e Mama loimata o le fiafia.
“Ua tatou taunuu,” na fai atu ai Papa.
I totonu o le malumalu, sa sui ai ofu o Silivia ma lona aiga i ni ofu papae. Sa saofafai faatasi se tagata faigaluega agalelei o le malumalu ma Silivia ma ona tei. Ona ia taitai atu lea o i latou i le potu o faamauga.
Sa feilafi le malamalama mai o se moli tele. Sa tootutuli Mama ma Papa i se fatafaitaulaga o loo ufitia i se fasi ie leise vaivai. Sa ataata i la’ua.
Sa tootutuli Silivia, lona tuagane, ma lona uso i autafa o Mama ma Papa. Sa tilotilo atu Silivia i fa’ata lapopoa i luga o le puipui i o latou autafa. Sa alu pea lava pea le ata. Sa faatumulia lona loto i se lagona mafanafana. O lenei ua mafai ona faamauina faatasi lona aiga e faavavau.
Ina ua oo i le taimi e toe foi ai i le fale, sa toe tulioso Silivia ma lona aiga i le latou taavale. O i latou o nisi o uluai tagata o le Ekalesia mai Sepania e o i le malumalu, ma na avea ai i latou ma paionia!
A o latou tietie ese atu, sa toe tilotilo tasi atu Silivia i fafo o le faamalama. Sa susulu mai le malumalu i le lagi o le taumafanafana. Sa le mafai ona faatali o ia e toe foi mai i le malumalu i se aso.
O Sepania o se atunuu e tautala faaSipaniolo i Europa i sisifo.
O le asō o loo i ai se malumalu i Madrid, o le laumua o Sepania.
E tele atu olive e ola i Sepania nai lo se isi lava atunuu i le lalolagi.
Sa ono tausaga o Silivia ina ua papatisoina ona matua.
Sa fesoasoani o ia i le Peraimeri e ala i le avea ma se tagata faafeiloai ma faafeiloai atu i tamaiti a o latou taunuu mai.
O le taimi nei ua faamauina Silivia i lona toalua ma se fanau e toatolu.
Ata na tusia e Sammie Francis