Ia Lototele
O le asō o le polokalama a le Peraimeri, ma sa popole Brayden. Sa ia faataitai ma faataitai lana pepa. Ae sa fefe o ia e tautala i luma o ni tagata se toatele.
“Ou te le fia alu i le lotu nei!” Na fai mai ai Brayden. “E taufaafefe tele le fai atu o la’u pepa.”
Na tuu atu e Tina se opo lapoa ia te ia. “Ou te iloa e mafai ona taufaafefe le lauga i le lotu. Ae ua faatele ona e faataitaia. Ou te iloa e te mafaia.”
“E mafai ona tatou faia se tatalo?” O le fesili lea a Tama. “E mafai ona tatou ole atu i le Tama Faalelagi e fesoasoani ia te oe e te maua le lototele.”
Sa lue atu le ulu o Brayden.
Sa tootutuli i lalo Tina, Tama, ma Brayden ma piilima.
“Tama Faalelagi pele,” na tatalo ai Tina, “faamolemole fesoasoani ia Brayden ia lototele. Fesoasoani ia te ia ia mafai ona fai lana pepa.”
Ina ua uma le tatalo, sa oso Brayden i totonu o le taavale, ma sa latou tietie uma atu i le lotu.
Sa fefe Brayden a o nofo o ia i luga o le tulaga faatasi ma isi tamaiti. Ae sa ia manatuaina le tatalo. Sa fesoasoani ia te ia e maua ai se lagona lelei e sili atu.
E le’i umi ae oo i le taimi o Brayden e tautala ai. Sa ia tilotilo atu i tagata o loo ataata atu ia te ia. Sa i ai Tina ma Tama! Sa manava loloa o ia. Ona ia faia leotele lea o lana pepa ma le manino. Sa ia manatuaina foi upu uma.
“Sa matagofie tele lau vaega,” o le tala lea a Tina ina ua tuua le lotu. “E foliga mai na tali mai le tatou tatalo.”
Sa ataata Brayden. “Na fesoasoani le Tama Faalelagi ia te a’u!”
Sa latou toe savavali faatasi i le taavale. “O a ni lagona sa i lou loto?” O le fesili lea a Tama.
“Sa ou fefe pea, ae sa lelei,” o le tala lea a Brayden. “Ma sa lelei o’u lagona ina ua uma ona ou fai atu la’u vaega.”
“E te iloa po o le a lena lagona lelei?” o le fesili lea a Tina.
Sa mafaufau Brayden mo sina taimi. “Ou te manatu o le Agaga Paia.”
“O lo’u manatu foi lena,” sa fai mai ai Tina. “Ma e ui lava ina sa e fefe, ae sa fesoasoani le Agaga Paia ia te oe ia e lototele.”
Ata na tusia e Adam Howling