O le Pati Faaleuo
“E te manatu o le a latou maua le fiafia?” o le fesili lea a Maia.
“Ou te le iloa le mea e fai mo la’u sini faaleagafesootai,” o le tala lea a Maia. Sa ia nofo i luga o le nofoa ma susue le Tusitaiala a Tamaiti.
“E te fiafia i nisi o manatu mo sini i lau tamaitusi?” o le fesili lea a Tina.
“O le manatu e uiga i le faafeiloaia o isi e foliga manaia,” o le tala lea a Maia. “Fai mai e faailoa atu oe lava i se tagata fou ma fesoasoani ia i latou e feiloai i isi tagata.”
Sa ea a’e Maia mai lana tamaitusi. “Ae ou te le iloa se tasi e mafai ona ou faafeiloaia. E mafai ona e tatalo faatasi ma au, Tina?”
Sa nofo i lalo Tina i autafa o Maia. “Tama Faalelagi pele,” na tatalo ai Maia, “faamolemole fesoasoani mai ia ou iloa po o ai e mafai ona ou faafeiloaia. I le suafa o Iesu Keriso, amene.”
Ina ua uma le tatalo, sa mafaufau Maia i lana uo o Taiteni. Sa la taaalo faatasi i taimi uma pe a sau Taiteni e asiasi i lona tinamatua. Ma o lenei ua nonofo faatasi Taiteni, lona tama, ma lona uso ma lona tuafafine faatasi ma lona tinamatua.
“Ae a Taiteni?” sa fesili atu ai Maia ia Mama. “Ou te manatu latou te le iloa ma lona uso ma lona tuafafine le toatele o isi tamaiti iinei. Atonu e mafai ona ou fesoasoani e faafeiloai i latou.”
“Sa ou mafaufau i le mea lava lea e tasi,” o le tala lea a Tina. “O le a le mea e te manao e fai?”
Sa mafaufau Maia mo se minute. “Atonu e mafai ona tatou faia se pati faaleuo!” o lana tala lea. “E mafai ona tatou valaauliaina ni tamaiti mai le Peraimeri.”
“E foliga mai o se manatu lelei lena,” sa fai atu ai Tina.
Sa filifili e Maia ma Tina se aso mo le pati. Sa latou valaau i le tamā o Taiteni ma ave ni valaaulia i tamaiti i le Peraimeri. Ona oo lea i le taimi e fuafua ai le fiafia! Sa faatulaga e Maia ma Tina ni taaloga. Sa la faia le tele o meaai mama ma teuga.
Na iu lava ina oo mai le aso o le pati. Sa fiafia Maia mo Taiteni ma ona tei ia feiloai i tagata uma.
“E te manatu o le a latou maua le fiafia?” o le fesili lea a Maia.
“Ou te mautinoa o le a latou fiafia,” o le tala lea a Tina.
E lei umi ae o mai tagata uma. Sa i ai ni foliga ataata tetele o Taiteni ma lona uso ma lona tuafafine. Sa latou taaalo i taaloga, aai i meaai mama, ma faia ni uo fou. Sa fiafia Maia e vaai atu i tagata uma o maua se taimi fiafia faatasi.
“Faafetai lava!” Na fai atu ai Taiteni ina ua uma le pati. “Sa matuai manaia tele lena mea.”
Sa ataata Maia. Sa fiafia o ia sa mafai ona ia fesoasoani ia Taiteni ma lona aiga ia lagona le taliaina ma le alofaina. Sa manuia le pati faaleuo!
Ata na tusia e Olga Lee