“E Mafai Faapefea Ona Ou Toe Lagonaina le Agaga?,” Liahona, Oke. 2022.
O Leo o le Au Paia o Aso e Gata Ai
E Mafai Faapefea Ona Ou Toe Lagonaina le Agaga?
Ina ua lagiina e le aufaipese le “Sa Fanau Maualalo Iesu,” sa amata ona nuti le olo o le pogisa lea na siomia ai a’u.
E oo lava i taimi sili ona pogisa, ou te lagonaina lava i taimi uma le filemu i o’u tofotofoga e ala i le Agaga Paia. Ae na suia lena mea ina ua ou faia ni togafitiga mo le tiga tumau lea na ou taoto ai i le moega mo le lua masina.
Sa faaitiitia le tiga ina ua uma lo’u togafitiga, ae sa amata ona ou tauivi ma le atuatuvale. I le taimi lava lea, sa foliga mai ia te a’u ua leai so’u gafatia e lagona ai le Agaga.
Mo le ono masina, sa ou lagonaina le tuulafoaiina ma le naunau tele e toe lagona le Agaga. Sa umi ma tiga lo’u faamalologa, lea sa foliga mai sa sili atu ona taufaafefe pe a aunoa ma le Agaga.
Sa ma feiloai ma lo’u epikopo, o le sa faamalamalama maia o le atuatuvale o nisi taimi e ufiufi ai le Agaga ina ia le mafai ai ona tatou lagonaina. O lana fautuaga na faamafanafanaina ai a’u, ma o se faamanuiaga faaleperisitua mai lo’u toalua na ou maua ai se malosi faaopoopo a o ou faatalitali ma le faamoemoe e toe lagona le Agaga Paia.
O le konafesi aoao sa avea pea ma se punavai o le malosi faaleagaga mo a’u, ae i le taimi o le sauniga amata o le konafesi aoao ia Aperila 2019, sa leai se mea na ou lagonaina. Na suia lena mea i le isi sauniga na sosoo ai ina ua lagiina e se aufaipese tuufaatasi mai Iunivesite o Polika Iaga le “Sa Fanau Maualalo Iesu.”1
O upu ma faatusa o Iesu Keriso o se tamai mamoe na faamaluluina lo’u loto. Sa ou iloaina o se papuipui o le ita, faanoanoaga, ma lagona sese o le tuulafoaiina na ufitia ai lo’u gafatia e lagona ai le Agaga. Sa siomia a’u e se ‘olo o le pogisa, ma sa le mafai ai e le Agaga ona ulu mai i lo’u loto. Ina ua usuina e le aufaipese le fuaiupu lona lua, sa amata ona nuti le ‘olo.
Sa sosoo mai Elder Jeffrey R. Holland o le Korama a Aposetolo e Toasefululua i le viiga i lana saunoaga “Faauta i le Tamai Mamoe a le Atua.”2 Faatasi ai ma le mana faaopoopo o ana upu, sa mulumuluina a’u i se alofa mo le Faaola ma le Tama Faalelagi.
O le tele o faalavelave e mafai ona faalavelaveina ai i tatou mai le lagonaina o le Agaga, ae e mafai ona tatou galulue i nei papupuni faatasi ai ma le fesoasoani mai le Tama Faalelagi ma Lona Alo. E malamalama atoatoa Iesu Keriso i o’u tauiviga. Ona o le alofa mo i tatou ma Lona Tama, “Sa oi o Ia i le toto ma loimata.”3
E silafia e le Tama Faalelagi mea o le a aumaia ia i tatou le mafanafana, ma Na te silafia le taimi e faamanuia ai i tatou mo lo tatou tuputupu ae faaleagaga silisili.