“O Le Miti a Lo’u Tamamatua,” Liahona, Oke. 2022.
Sau, Mulimuli Mai ia te A’u
O Le Miti a Lo’u Tamamatua
O le mea na vaaia e lo’u tamamatua na fesoasoani ia te ia e malamalama ai i le mana ma le upumoni o le talalelei.
Ata na tusia e Sija Yong
Ina ua ia faaali atu i le Perofeta o Iosefa Samita, sa sii mai e Moronae mau autu ma aoaoga mai ia Malaki ma Isaia. O le mea e malie ai, sa ia sii mai foi mai le mataupu lona lua o le Ioelu le valoaga lenei:
“Ma o le a oo mai pe a mavae, o le a Ou sasaa atu lo’u agaga i luga o tagata uma; ma o le a vavalo o outou atalii ma o outou afafine, o le a miti o outou toeaina i miti, o le a vaai o outou alii talavou i faaaliga” (Ioelu 2:28; tagai foi Iosefa Samita—Talafaasolopito 1:41).
O miti o se tasi lea o auala e faaali mai ai e le Alii ia upumoni i Ana fanau. E mafai ona avea i latou ma se vaega o se faagasologa paia Na te faaaogaina e faalolotoina ai le malamalama faaleagaga.
I le Iopu tatou te faitau ai:
“Aua e tasi ona fetalai mai o le Atua, ioe, e faalua ona iloa e le tagata.
“I se miti, i se faaaliga o le po, pe a pa’ū le moe tele i luga o tagata, i le tulemoe i luga o le moega;
“Ona faapupula ai lea e ia o taliga o tagata, ma faamau ai a latou faatonuga” (Iopu 33:14–16).
O Se Talatuu Faaleaiga
I se miti faapena, sa tatalaina taliga o lo’u tamamatua ma tuuina atu faatonuga, pe faamauina, o le a suia ai lo matou aiga mo le faavavau.
Sa ola ae Brígido Becerra i Puebla, Mekisiko. O le mea e faanoanoa ai, sa ola ae o ia e aunoa ma se tamā, ma i le 11 o ona tausaga, na maliu ai le tina o Brígido i ona lima. Sa tuua na o ia e ola i lona olaga i le mea sili na te mafaia. I lena taimi, sa leai ni polokalama faaagafesootai po o ni avanoa e fesoasoani ai i se tamaitiiti matuaoti e pei o Brígido. E aunoa ma se taitaiga po o se tasi e tausia o ia, na avea le ava malosi ma vaisu a Brigido. O lena vaisu sa le lelei lona aafiaga i le toetoe o vaega uma o lona olaga.
I se tasi taimi sa matua’i matuia ai lenei vaisu, sa ia lagona ai o le a ia le toe maua lona toalua ma lana fanau. I le atuatuvale, sa tonu ai ia te ia e tatalo. E lei ola ae o ia i se tapuaiga ma o lea sa faia ai se tatalo i lana lava ala. Sa ia aioi atu mo se fesoasoani e faatoilalo ai lona tagofia o mea ua fai ma vaisu ma saili ma le faamaoni ia maua se solaaga mai ona faafitauli.
O se Tali i le Tatalo
I se taimi ina ua uma ona ia faaleo atu lena tatalo faamaoni, sa asiasi atu ai tamaitai faifeautalai O Le Ekalesia a Iesu Keriso o le Au Paia o Aso e Gata Ai i lona fale. Sa la feiloai ma lona toalua, o Iulia, ma ta’u atu i tamaiti e uiga i le Peraimeri i le uarota i le lotoifale. Ua latou sailia nei le faatagaga a Brígido mo tamaiti e auai ai.
Sa amata ona aoao e tamaitai faifeautalai ia Brígido ma lona aiga e uiga i le Toefuataiga o le talalelei a Iesu Keriso. I lena taimi, sa aoao atu ai faifeautalai e faaaoga ai laupapa ie e faaali ai ata a o latou aoao atu. I le taimi o lenei lesona sa latou faaalia ai se ata o le Perofeta o Iosefa Samita. Sa vave ona iloa e Brígido le tamaloa o loo i le ata. Sa ia ta’u atu i tamaitai faifeautalai sa ia iloaina lenei alii. Sa le mautonu i latou i le tala a Brígido. Sa sau o ia mai Mekisiko ma o Iosefa Samita sa soifua ma maliu i le Iunaite Setete i le tele o tausaga a o lei fanau mai Brígido. Sa leai se auala na iloa ai e Brígido ia Iosefa Samita.
O Le Miti
Ona faasoa atu lea e lo’u tamamatua lana miti i faifeautalai. Sa ia ta’u atu ia i laua sa miti o loo ia galue i lana tamai faatoaga e sala le ’afa’afa [laau afu] i lana sapelu ma ao mai isi meaai e fafaga ai ana moa ma puaa. A o pisi o ia e galue, sa osofaia o ia e se gata lapoa. Sa tau lo’u tamamatua ma le gata i le mea sili na te mafaia, ae sa ia tavio atoa ia te ia, ma faamaga lona gutu, ma sa toetoe a ia folo patatō o ia.
I lena lava taimi o le malaia, na tipi ese ai e se tamaloa sa ofu paepae, faatasi ma se pelu i lona lima, le ulu o le gata. A o pau ifo ma mate i vae o Brígido, sa ia tepa ae i luga e vaai po o ai na faasaoina lona ola. Na te lei iloaina le tagata ae sa ia matauina sa laei papae o ia. Ona ia faamatala atu lea o le alii o loo i le ata sa faasoa atu e tamaitai faifeautalai o le alii lea sa i lana miti. Sa vave ona iloa e Brígido o le tagata lenei sa i lana miti, le tagata lea na laveaiina o ia. O lenei ua ia iloaina o le igoa o le tagata o Iosefa Samita.
O lenei miti o se aafiaga manino sa aoao ai lo’u tamamatua. Sa ia lagonaina o se tali tuusao i ana tatalo ma aioiga. Sa ia fai mai sa ia lagonaina o le gata o se faatusa o lona vaisu i le ava malosi. Ma sa malamalama o ia, e ala i aoaoga mamana a le Perofeta o Iosefa Samita ma le aoaoga faavae o le talalelei toefuataiina a Iesu Keriso, o le a mafai ai ona ia faatoilaloina lona tagofia o mea ua fai ma vaisu. Sa ia iloa o le a ia maua le toomaga ma maua ai faamanuiaga atoatoa o le Togiola a Iesu Keriso.
O le tamamatua o Elder Becerra, o Brígido Becerra ma lona faletua, o le ata na pueina i le la asiasiga e tasi i le Iunaite Setete.
Ata pue mai faaaloaloga a le tusitala
O Se Faamanuiaga mo Augatupulaga
E lei leva ona uma ona faasoa atu lenei aafiaga i tamaitai faifeautalai, ae papatisoina loa lo’u tamamatua o Brígido Becerra o se sui O Le Ekalesia a Iesu Keriso o le Au Paia o Aso e Gata Ai. Sa alofa o ia i le talalelei a Keriso. Sa ia te ia se alofa faapitoa mo le Tusi a Mamona ma perofeta uma, aemaise Iosefa Samita.
O le miti a lou tamamatua na taitai atu ai o ia i le talalelei moni a Keriso ma sa le gata ina faasaoina ai o ia mai se olaga o vaisu ma le faanoanoa ae sa faamanuiaina ai foi augatupulaga o tagata faamaoni o le Ekalesia. Ina ua maliu lo’u tamamatua i le 98 o ona tausaga, sa ia tuua pe tusa ma le 120 o e tupuga mai ia te ia—o fanau, fanau a fanau, fanau a fanau a fanau, ma fanau a fanau a fanau a fanau. Ua aafia i latou taitoatasi i lana miti ma i lana talatuu o le molimau ma le faamaoni i le Ekalesia ma i le Faaola, o Iesu Keriso.
E pei o Tanielu i le Feagaiga Tuai, sa malamalama lo’u tamamatua “o loo i ai se Atua i le lagi e faaalia mealilo” (Tanielu 2:28).
Aisea e Oo Mai ai Miti?
Atonu e fesili nisi pe aisea e i ai nisi o i tatou e i ai ni miti e i ai se faamoemoega faaleagaga. I le konafesi aoao, sa faasoa mai ai e Elder David A. Bednar o le Korama a Aposetolo e Toasefululua se aafiaga i le faia o miti. Sa ia saunoa e uiga i se taitai perisitua musuia o lē sa uunaia e aoao igoa o talavou uma i lana siteki. E lei leva ona iloa e le taitai o latou igoa uma, ae faaali mai e le Alii le upumoni e ala i se miti.
“I se tasi po sa fai ai se miti a le taitai perisitua e uiga i se tasi o alii talavou, lea sa na o le ata na ia iloa ai o ia,” o le tala lea a Elder Bednar. “I le miti sa ia vaai ai i le alii talavou o ofu sona ofutino paepae ma o loo i ai ma se pine o lona igoa faafaifeautalai. O loo aoao e le alii talavou se aiga, a o nofo ai sana soa i ona tafatafa. Sa uu e le alii talavou le Tusi a Mamona, ma sa foliga mai o loo molimau atu o ia i le moni o le tusi. Ona ala a’e lea o le taitai perisitua mai lana miti.
“I se faapotopotoga a le perisitua na sosoo ai, sa savali atu le taitai i le taulealea sa ia vaai i ai i lana miti, ma fai atu i ai la te talanoa mo sina minute. Ina ua la feiloai, sa ta’u atu e le taitai le igoa o le taulealea ma faapea atu, “E le o a’u o se faimiti. E lei i ai lava sa’u miti e uiga i se tagata e toatasi o lenei siteki, sei vagana ai oe. O le a ou faamatala atu ia te oe la’u miti, a uma ou te manao e te fesoasoani mai ia ou malamalama i lona uiga.’
“Sa faamatala atu e le taitai perisitua le miti ma sa fesili atu i le taulealea i lona uiga. O le tuumaunu ai i le lagona ootia, sa na ona tali atu o le taulealea, ‘O lona uiga e silafia e le Atua lo’u tagata.’”1
Atonu o le mafuaaga lena na maua ai e lo’u tamamatua lana molimau i se miti. O se faamautinoaga na silafia e le Atua o ai o ia ma le talatuu e mafai ona ia tuua. O lana miti o se molimau o le moni o le talalelei a Iesu Keriso, ma o le a i ai se aafiaga mamana i le toatele o ana fanau mo le faavavau.
E faaali mai e le Alii Ana mealilo ia i tatou. O le auala tatou te maua ai faaaliga faaletagata lava ia e eseese aua e eseese uma i tatou ma ona o Ia o se Atua e toatasi-i-le-toatasi. Pe o se faaaliga, se manatu, se leo i o tatou mafaufau, se lagona, po o se miti, e moni lava e fetalai mai o Ia ia te oe ma au.