[Mea e] Fai ma Aua le Faia i le Valaauliaina o Uo i le Lotu
O nisi nei o auala e fesoasoani ai i uo ia lagona atili le toafimalie e uiga i le o mai i le lotu.
O le valaauliaina o isi e tapuai faatasi ma i tatou i le sauniga faamanatuga o se auala sili lea e faasoa atu ai le malamalama ma le alofa o le Faaola i aiga ma uo. Ae o nisi taimi tatou te faafaigata ai nai lo le mea e tatau ona i ai.
O auala nei e fitu e mafai ona tatou fesoasoani ai i uo ia lagona atili le toafimalie i le taliaina o le valaaulia e o mai i le lotu:
1. Fai Ona o le Alofa
Aisea ua e valaaulia ai i latou? Pe mo oe pe mo i latou? Afai e te mafaufau i mea sili latou te fiafia i ai, o le a latou lagonaina lou faamaoni. Afai e mafai ona latou vaai atu e taua i latou ia te oe, atonu o le a sili atu lo latou naunau e aoao e uiga i isi mea e taua ia te oe.
2. Ia e Valaaulia i Latou e Tapuai faatasi ma Oe
Fesili i au uo pe i ai so latou nofoaga e tapuai ai i le Faaola ma valaaulia i latou e o mai e tapuai faatasi ma oe, aemaise lava i taimi e pei o le Kerisimasi ma le Eseta. Afai e le o i latou o ni Kerisiano, fesili atu ia i latou pe latou te mananao e aoao atili e uiga ia Iesu Keriso ma valaaulia i latou e faia se sauniga tapuai faaKerisiano faatasi ma oe. Manatua e faaali atu lea lava faaaloalo e tasi mo o latou talitonuga e te faamoemoe o le a latou tuuina atu ia te oe.
3. Aua Le Faapatinoina le “Leai”
Afai e teena e lau uo, ia talia ma le tausaafia le “leai”. Ae aua le manatu o se “leai” e auai i le lotu o lona uiga o se “leai” ia te oe. E tele mafuaaga atonu latou te fai mai ai e leai atonu e le faatatau i o latou lagona e uiga ia te oe. Afai e te le faatagaina se “leai” e suia lau sootaga, atonu o le a e maua se avanoa mulimuli ane e malamalama atili ai i o latou lagona.
4. Fesoasoani i Au Uo ia Iloa Mea e Faamoemoeina
Afai e talia e au uo se valaaulia e o mai i le lotu, fesoasoani ia latou malamalama i mea e faamoemoeina: pe faapefea ona latou laei, le faamoemoega ma le umi o fonotaga taitasi, ma le mea o le a tupu i sauniga—pe le tupu foi (mo se faataitaiga, e le aoina ni foai i le taimi o a tatou faigalotu). E tatau foi ona e faamalamalama atu ia i latou po o le a le faamanatuga ma lona uiga. E mafai ona fesoasoani lenei mea ia i latou ia toamalie pe a latou o mai i le lotu.
O ni nai vitio nei e mafai ona e faasoa atu e mafai ona fesoasoani ia i latou e iloa ai le mea o loo faamoemoeina:
5. Sui Faamatalaga i Folasaga
E masani lava ona itiiti le fiafia o tagata i a tatou aoaoga faavae (i le taimi muamua) nai lo o latou i ai i o tatou alalafaga ma galuega lelei. Fesoasoani ia i latou e fesootai ma tagata, ma faasoa atu pe faapefea ona tatou aafia i le alalafaga, auauna faatasi, ma tausia e le tasi le isi.
O se auala sili e faailoa atu ai i se tasi le talalelei toefuataiina a Iesu Keriso o le amata lea i le faasoaina atu o faamanuiaga o loo ofoina mai e le talalelei. Mo se faataitaiga, e mafai ona e taumafai e faaali atu ia i latou le auala e mafai ai e le Ekalesia ona fesoasoani ia i latou e saili o latou aa faaleaiga, faamalolosia o latou aiga, ia ola tutoatasi atili, tuuina atu auaunaga anoa, ma tuu atu ia latou fanau ni tulaga faatonuina lelei e ola ai. O talanoaga o aoaoga faavae ma talitonuga patino e mafai ona oo mai i se taimi mulimuli ane pe a latou saunia.
O nisi tagata atonu e te manao e faailoa atu ia i latou e faaaofia ai le epikopo, le peresitene o le Aualofa, se faufautua o le malumalu ma talafaasolopito o aiga, po o le faiaoga Peraimeri mo ni tamaiti i le aiga.
6. Ia Talia Tagata Uma
Afai e auai atu au uo, fai mea e mafai ona e faia ia latou lagona ai le taliaina ma le taulimaina o o latou manaoga. E faapena foi, afai e te vaai i se tasi i le lotu e te le iloa, ia faauo ma faafeiloa’i. Faailoa atu ia i latou le matagofie o le i ai o i latou iina. Taumafai e vaai i o latou mata, valaaulia ni fesili, ma fesoasoani ia latou malamalama i o latou aafiaga.
7. Aua le Faamalosia; Tulitatao
O nisi atonu e fiafia e auai e fefefe o le a faamalosia i latou i se mea. A o e taumafai e tuuina atu se aafiaga lelei lea e mafai ai e au uo ona lagonaina le Agaga Paia, faasoa atu mafaufauga ma lagona, ae aua e te lagona e tatau ona e faamalosia se aafiaga faaleagaga. Faalagolago i le Atua ma tuu atu i le Agaga e faia Lana galuega. Ma afai e leai se taimi o au uo e nonofo ai mo le faasologa atoa o sauniga po o le nonofo pe a uma le lotu e talanoa ai, faafetai atu ia i latou mo le o mai ma faatulaga se avanoa e toe tulitatao ai.
O Le Valaaulia Sili ona Taua
O le valaaulia o isi e tapuai i le Faaola faatasi ma i tatou e le faapea e tatau ona atuatuvale mo i tatou pe mo i latou. A o tatou valaauliaina uo, o loo tatou galulue i le valaaulia a Peresitene Russell M. Nelson e auauna atu i isi i se “auala fou, ma paia atu”1 ma “fesoasoani e faapotopoto Isaraelu.”2 O le a mulimuli mai le olioli a o tatou faasoa atu le malamalama ma le alofa o le Faaola ia i latou o siomia i tatou.