Mauaina o le Upumoni i le Vaitau o Faamatalaga Sese
O nei manatu e lima e mafai ona fesoasoani ia te oe e atiina ae ai le malamalama i ala o faasalalauga lelei ma fai paaga ai ma le taitaiga faalelagi.
Ia faaeteete i mea e te fagotaina i le sami o faamatalaga. Atonu e te maua ai mea e te le o sailia.
Ua tatou ola i taimi e lei mafaufauina muamua. O le tomai tatou te maua ai le tele o faamatalaga e le mafuatiaina i ni sekone e matua manaia. Ae e mafai faapefea ona tatou iloa pe o i ai ni faamatalaga ua tatou maua e faatuatuaina, aemaise lava pe a faia ni faaiuga taua? O se tasi o auala e mafai ona tatou faatautaia ai nei ogasami faigata o le avea atili lea “ma se [tagata] e malamalama i ala o faasalalauga.”
O le a le uiga pe a tatou talanoa e uiga i le malamalama iala o faasalalauga, ma e mafai faapefea ona fesoasoani ia i tatou e aloese ai mai le faaseseina i nei aso e gata ai? O le malamalama i ala o faasalalauga “o le mafai lea ona maua, faavasega, iloilo ma fatuina ni savali i ni ituaiga eseese.”1 O tomai aoga uma nei e atiina ae, aemaise lava i vaitau o faamatalaga sese.
O ni nai mea nei e mafaufau i ai a o amata ona e atiina ae lou oe lava malamalama i ala o faasalalauga.
1. Fai Au Sailiiliga
Ua aoao mai e tusitusiga paia e faapea “e mautu upu uma i le mau a le toalua po o le toatolu” (2 Korinito 13:1). O le mataupu faavae lava lea e tasi e mafai ona faatatau i a tatou taumafaiga i le sailia o faamatalaga moni ma sa’o. E ui e faigofie ona tatou maua tali i fesili taua i na o se sailiga faigofie i luga o upegatafailagi, ae o le faamaoniaga o le sa’o o lena faamatalaga e alu ai le taimi ma taumafaiga. E le gata i lea, o loo i ai foi se tulaga matautia i le faalagolago i le na o le tasi le leo, aemaise lava i se taimi e foliga mai ai ua taatele le faaituau o ala o faasalalauga ma pe a toatele atu tagata o loo saili e faalauiloa ni mataupu talanoaina patino. E mafai ona sili atu lo tatou iloa pe afai tatou te sailia ni punavai se tele mai alaleo eseese, e aofia ai tusi, tusiga i nusipepa, suesuega faaleaoaoga, ma isi tagata tomai faapitoa faatuatuaina.
2. Siaki Lau Faapogai, Ona Toe Siaki Lea.
Ua ia i tatou le naunautaiga e faaaoga le tele o faamatalaga tatou te faaaogaina i le tulaga faatauaina, aemaise lava pe afai tatou te lagona e mafai ona tatou faatuatuaina le puna o le faamatalaga. Peitai, e oo lava i punavai e sili ona faamoemoeina e mafai ona sese i nisi taimi. O lea, e taua lo tatou faaaluina o le taimi e faamaonia ai faamatalaga e faasoa mai ia i tatou, aemaise lava pe afai o se mea tatou te faamoemoe e faatino pe faasoa atu i isi.
3. Ia Nofouta i “Afeafe Faapitotasi” o Faasalalauga Agafesootai.
O se sailiiliga talu ai nei na faalauiloa mai e le Nofoaga Autu mo Suesuega o le Pew na faaalia ai e toetoe o le afa (48 pasene) o tagata matutua o le IS e maua talafou ma faamatalaga mai ala o faasalalauga agafesootai.2 E ui o ala o faasalalauga agafesootai e mafai ona avea o se meafaigaluega maoae mo faamatalaga, ae o le anotala tatou te maua i a tatou mea e fafagaina e tele lava ina fua i auala e taulai atu i ai nai lo le tuuina mai ia i tatou o faamatalaga taua ma sa’o. I le va o nei faiga faapatino ma lo tatou tomai e pulea ai la tatou li’o o uo i totonu o nei tulaga, tatou te fatuina ai se potu faaleotele leo, lea e faalauteleina ai o tatou lava talitonuga ma manatu, ma o loo fafagaina faamatalaga e taulai atoa atu i mea tatou te fiafia i ai.
O ala o faasalalauga agafesootai e matele foi ina avea o se eleele e fafaga ai mo faamatalaga sese ma taufaasese, ona o le faigofie e mafai ai e se tasi ona fatuina ma faasoa atu le anotusi. E taua lo tatou iloiloina ma le totoa o soo se faamatalaga tatou te vaaia i luga o ala o faasalalauga agafesootai ma faamaonia lona moni a o lei taliaina pe filifili e faasoa atu. E pei ona lapatai mai Peresitene Russell M. Nelson, “Afai o le tele o faamatalaga e te mauaina e sau mai faasalalauga faaleagafesootai po o isi ala faasalalau, o le a faaitiitia lou tomai e lagona ai musumusuga a le Agaga.”3
4. Faalogo i le Agaga.
Ua tumu le lalolagi i savali e faatautava, e ta’u mai ai ia i tatou le mea e mafaufau i ai ma le ala e faatino ai. Na aoao mai e Peresitene James E. Faust (1920–2007), Fesoasoani Lua i le Au Peresitene Sili, o le auala sili e faatoilalo ai le “sala” i le lalolagi o le faalogo lea ma mulimuli i le siufofoga o le Agaga. “E manaomia ai le onosai i se lalolagi e manaomia ai le faamalieina vave. O lenei fofo e filemu, toafilemu, ma maaleale i se lalolagi e gaepuina mea e leotele, matamuli, saoasaoa, suamalie, ma le masoā,” na ia saunoa ai.4
O le Agaga o se meafaigaluega mamana lea e mafai ona fesoasoani ia i tatou e faavasega ma faailoa ai faamatalaga sao ma taua. E mafai ona tatou maua le mafanafana i le folafolaga a Moronae e faapea “o le mana foi o le Agaga Paia tou te iloa ai le tonu i mea uma” (Moronae 10:5). E mafai faapefea ona tatou iloa le taimi e fetalai mai ai le Agaga ia i tatou? Ua faatonuina Oliva Kaotui e le Alii, “O le a Ou ta’u atu ia te oe i lou mafaufau ma lou loto, e ala i le Agaga Paia, lea o le a oo atu i ou luga ma lea o le a mau i lou loto” (Mataupu Faavae ma Feagaiga 8:2).
E mafai e lenei mea ona manaomia ai a tatou taumafaiga sili faaleatamai e faailoa ai le upumoni mai mea sese, faapea foi a tatou taumafaiga silisili e ola i o tatou olaga i se auala tatou te maua ai le Agaga e faatasi ma i tatou. Ia faaeteete ia aua nei auai i ala o faasalalauga po o anotusi fesootai o le a tuliesea ai le Agaga Paia.
E pei o se moli o le ava, e mafai e fautuaga a perofeta ma aposetolo ona faasusulu atu le ala ma fesoasoani ia i tatou ia iloatino le va o le mea moni ma le mea sese.
5. “Mulimuli i le Perofeta”
I le lotolotoi o la latou malaga umi ma faigata mai Aikupito, sa amata ona muimui le fanauga a Isaraelu i le Alii. Sa latou fesili atu ia Mose, “O le mea lea ua e aumai ai i matou i fafo o Aikupito ia oti i le vao?” (Numera 21:5). O se taunuuga o lo latou tomumumu, na auina atu ai gata aasa i tagata. O le toatele o i latou sa utia ma maliliu ai. Ina ua alu atu Mose i le Alii mo i latou, sa faatonuina o ia e le Alii e fai se gata afi ma faapipii i se pou. O i latou o e sa utia sa na ona manaomia ona vaai atu i le gata apamemea ma o le a latou ola ai—o se vaifofo faigofie i se faafitauli e lamatia ai le ola. O Isaraelu o e sa filifili e vaai sa mafai ona ola. (Tagai i le Numera 21:6–9.) Ae mo isi, sa faigofie tele le tali, o lea sa latou filifili ai e le talitonu. Latou te lei vaai atu i le gata ma iu ai ina fano. (Tagai i le 1 Nifae 17:41; Alema 33:19–20.)
I o tatou aso, tatou te feagai ai ma se mala talitutusa o “gata uogo” e foliga mai e sese, fevaevaeai, pe oo lava i faamatalaga faavalevalea lea e faatiga ai i tatou ma isi. Afai tatou te faaaogaina, o na faamatalaga e mafai ona matautia—faaleagaga, faalemafaufau, ma faalelagona—e pei o gata oona i le fanauga a Isaraelu.
O la tatou laina sili o le puipuiga i aso e gata ai e faasaga i faamatalaga sese e faapea “o le a faasese ai e ua filifilia” (Mataio 24:24) o le vaai atu lea i lo tatou perofeta soifua. E ui atonu e le faatauaina e le lalolagi le fautuaga a le perofeta, ae ua tatou iloa o ia o le fofoga taumomoli o le Alii. Ua ta’u mai e le Alii ia i tatou e faapea “pe i lou lava leo po o i le leo o a’u auauna, ua tutusa lava” (Mataupu Faavae ma Feagaiga 1:38). E taua lo tatou faapaleniina o talafou ma faamatalaga i le afioga a le Alii, e aofia ai fautuaga ua tuuina mai e ala mai i Ana perofeta ma aposetolo. A o tatou faalagolago i la latou taitaiga ma a o tatou siakiina mea tatou te faalogo i ai mai le lalolagi e faasaga i mea tatou te faalogo i ai mai le Alii ma Ana perofeta, o le a faigofie atu ona tatou iloatino le va o le upumoni ma le mea sese.
Sailia o le Poto
Faatasi ai ma faamatalaga sese uma o loo avanoa mo i tatou, e le o se mea e ofo ai le faapea mai o Paulo i aso e gata ai, o tagata o le a “aoaoina e le aunoa, ma e le mafai lava ona malamalama i le upumoni” (2 Timoteo 3:7).
O le faigofie e mafai ai ona tatou maua faamatalaga o se meaalofa mai lo tatou Tama Faalelagi. Peitai, e ui i faamatalaga uma e mafai ona tatou maua, “o le poto o le mea sili lea; o le mea lea ia maua le poto: o mea uma e te maua ia maua mai ai le atamai” (Faataoto 4:7). O se mea lena e le mafai ona tatou faalagolago i ai i se afi saili.
Nai lo lena, a o tatou sailia le poto, e tatau ona tatou “saili i le aoaoina, e ala lava lea i le suesue ma le faatuatua foi” (Mataupu Faavae ma Feagaiga 88:118). O le faapaagaina o le malamalama i ala o faasalalauga ma a tatou taumafaiga sili faaleatamai i le ola ai i le talalelei ma a tatou taumafaiga sili faaleagaga o le a valaaulia ai le taitaiga faaleagaga tatou te manaomia e iloatino ai le mea moni mai mea sese ma aloese ai mai le faaseseina e le lolovai o faamatalaga sese o siomia ai i tatou.