E Na’o le Faatekinolosi
O Le Mana, Faamanuiaga, ma Upumoni o le Tusi a Mamona—Savali Lata Mai Nei mai Perofeta ma Aposetolo
Tagai i mea na aoao mai talu ai nei e perofeta soifua i luga o ala o faasalalauga faaagafesootai e uiga i le Tusi a Mamona.
Ua Asiasi Atu Iesu Keriso i le atu Amerika, saunia e John Walter Scott
O loo i ai le upumoni, mana, ma le tele o faamanuiaga e oo mai e ala i le faitau ma le faamaoni ma le faaaogaina o le Tusi a Mamona. Na aoao mai Peresitene Russell M. Nelson:
“A ou mafaufau i le Tusi a Mamona, ou te mafaufau i le upumana. O upumoni o le Tusi a Mamona ua i ai lemanae faamalolo ai, faamafanafana, toefuatai, fesoasoani, faamalosia, faatoafimalie, ma faafiafia o tatou agaga.
“O’u uso e ma tuafafine pele, ou te folafola atu a outou suesueina ma le agaga tatalo le Tusi a Mamona i aso uma,o le a outou faia ni faaiuga sili atu ona lelei i—aso uma. Ou te folafola atu a outou mafaufau loloto i mea tou te suesueina, o le a matala mai pupuni o le lagi, ma o le a outou mauaina tali i a outou lava fesili ma le taitaiga mo o outou lava olaga. Ou te folafola atu a e faatofuina oe lava i le Tusi a Mamona, e mafai ona puipuia oe mai mea leaga o le aso.”1
Na saunoa uso o le Au Peresitene Sili ma le Korama a Aposetolo e Toasefululua i le konafesi aoao e uiga i le mana ma le matafaioi o le Tusi a Mamona. Na latou faasoa mai foi ni savali e uiga i lenei autu i luga o ala o faasalalauga faaleagafesootai, e aofia ai mea nei:
O Le Autu o le Aoaoga Faavae a le Alii
“O le Alii e finagalo ia tatou malamalama i le totonugalemu o Lana aoaoga faavae ma le savali, o le mafuaaga lea ua Ia tuuina mai ai ia i tatou le meaalofa o le Tusi a Mamona.
“O le Tusi a Mamona e faatotonugalemu ia Iesu Keriso. O loo i ai le fatu tonu o Lana savali. Sa tusia mo i matou, i o tatou aso, mo o matou olaga. A o tatou suesue, mafaufau loloto, ma faaaoga mataupu faavae ua aoaoina i totonu o ona itulau, o le a tatou maua le malosi e faatotonugalemu ai o tatou olaga ia Iesu Keriso ma olioli i faamanuiaga fiafia ua Ia folafola mai ia i tatou, i le taimi nei ma le faavavau.”
Peresitene Russell M. Nelson, Facebook, Mar. 28, 2021, facebook.com/russell.m.nelson.
Mauaina o le Taitaiga Faalelagi
“I le 2020, ua uunaia ai i tatou e lo tatou perofeta, Russell M. Nelson, ina ia #FaalogoiateIa—ia saili atu i le taitaiga ma le taitaiga a le Alii mo o tatou olaga taitoatasi. O se tasi o auala sili e saili ai faaaliga faaletagata lava ia o le faitau o tusitusiga paia. O le afioga a le Alii i tusitusiga paia e faapei o se sulu e taiala ai o tatou vae (tagai Salamo 119:105), ma o faaaliga e faapei o se malosiaga maoae e faateleina ai le malamalama o le sulu.
“O le manatu e faapea o le faitauina o tusitusiga paia e mafai ona oo atu ai i musumusuga ma faaaliga e tatalaina le faitotoa i le mea moni faapea, e le o faatapulaaina mau i mea sa faatatau i ai ina ua tusia, ae ua aofia ai foi ma mea ua faatatau i ai lena mau i le tagata faitau i aso nei. O le uiga o se mau i le Tusi a Mamona ia te a’u i le taimi muamua na ou faitauina ai i le 16 o o’u tausaga e le o i ai i o’u luga a o ou faitauina i le 85 o o’u tausaga. Faatasi ai ma le manuia o aafiaga o lo’u olaga ma lo’u masani tele i faaaliga, e mafai ai ona ou aoaoina mea sa le’i avanoa ia te a’u ananafi e ala i le faitauina o tusitusiga paia i le asō.
“Ona tatou te talitonu o le faitauina o tusitusiga paia e mafai ona fesoasoani ia i tatou e maua ai faaaliga, ua fautuaina i tatou e faitau pea lava pea ia tusitusiga paia. O se tasi lena o mafuaaga e talitonu ai le Au Paia o Aso e Gata Ai i le suesueina o tusitusiga paia i aso taitasi. Mai lea auala, tatou te tau atu ai i le mea o loo finagalo ai lo tatou Tama Faalelagi ina ia tatou iloa ma faia i o tatou lava olaga i le taimi nei.”
Peresitene Dallin H. Oaks, Facebook, Iuni. 25, 2020, facebook.com/dallin.h.oaks.
Filemu ma le Faamautinoaga i le lotolotoi o le Vāvāō
“E musuia lava a’u i taimi uma e tusitusiga paia o loo faamatalaina, i se ala ofoofogia, o taimi o loo tatou ola ai i le taimi nei.
“‘Ma i lena aso o le a faalogoina i taua ma tala o taua, ma o le a vāvāō le lalolagi atoa, ma o le a nutimomoia loto o tagata, … ma o le a faasolo ina maalili le alofa o tagata, ma o le a faateleina le amioletonu’ (Mataupu Faavae ma Feagaiga 45:26–27).
“O se tasi o upu e tumatila ia te a’u i le fuaiupu 26 o le ‘vāvāō,’ lea e uiga tutusa ma le faalavelave, faanu, fesouaiga, faaletonu, vevesi, fenumiai, le mautonu, leaga, ma le faalavelave. E mautinoa lava, o i tatou o molimau e toetoe lava o aso uma i le faateleina o le vāvāō i le lalolagi atoa.
“O fea e mafai ona tatou maua ai le filemu ma le faamautinoaga i le lotolotoi o vāvāō uma?
“O Le Tusi a Mamona.
“E le na o i tatou tagata e ola i taimi faigata. Ou te molimau atu o le Tusi a Mamona o le afioga a le Atua ma sa tusia mo o tatou aso. O le puna lea o le faamautinoaga ma le filemu i o tatou aso e gata ai fesouaina.
“A o e faaaluina se taimi e suesue ai le Tusi a Mamona, ou te folafola atu o le a e matauina se fuataga faateleina o le filemu i o outou olaga.
“Na faapefea e le suesueina o le Tusi a Mamona ona aumaia ia te oe le filemu?”
Elder David A. Bednar, Facebook, Ape. 19, 2022, facebook.com/davida.bednar.
O Le Afioga a le Atua e Lapatai ma Saunia i Tatou
“O Le Tusi a Mamona: O Se Tasi Molimau ia Iesu Keriso o loo molimau mai i le soifua moni ma le paia o lo tatou Faaola ma le Togiola. O le afioga a le Atua ma lapataia ma saunia i tatou mo le lalolagi o loo tatou ola ai i le taimi nei. Ou te fiafia i upu na faasoa atu e Mamona i lona atalii i le Moronae 9:25:
“‘Lou atalii e, ia e faamaoni ia Keriso; ma ia le avea mea ua ou tusia ma mea e te faanoanoa ai, e faamamafa ai oe i lalo sei e oti; ae talosia ia sii ae oe i luga e Keriso, ma talosia ia mau e faavavau i lou mafaufau ona mafatia ma lona maliu, ma le faaali mai o lona tino i o tatou tamā, ma lona alofa mutimutivale ma le tali-tiga, ma le faamoemoe o lona mamalu ma le ola faavavau.’
“O aoaoga a Keriso o le a siitia ai i tatou i luga. O le faamoemoe na Ia tuuina mai o le a fesoasoani ia i tatou i luitau o le olaga. Ou te valaaulia outou ia faitau e uiga ia te Ia, ia aoao e uiga ia te Ia, ma mulimuli ia te Ia.”
Elder David A. Bednar, Facebook, Nov. 23, 2021, facebook.com/davida.bednar.
Faavaega i le Toefuataiga
“I le valu tausaga ua tuanai, o se tasi o o’u tofiga o le iloiloina lea ma faitau uma Pepa [ofoofogia] a Iosefa Samita ma faamatalaga ma le sailiiliga lea na taitai atu ai i le lolomiina o le Au Paia—o se tusi o loo tusia ai le talafaasolopito o O Le Ekalesia a Iesu Keriso o le Au Paia o Aso e Gata Ai.
“Sa matua faamalosia ma faaleleia tele la’u molimau ma le faamemelo i le Perofeta o Iosefa Samita i le maea ai o le faitauina o faatamalaga auiliili musuia o lona soifuaga ma lana galuega faaperofeta na muai faauuina ai.
“O le faaliliuga a Iosefa Samita o le Tusi a Mamona e ala i le meaalofa ma le mana o le Atua sa matuā taua i le Toefuataiga. I totonu o le Tusi a Mamona e ogatusa atoa, matagofie lona tusiaina, ma o loo i ai tali i fesili maoae o le olaga. O se soa i le Tusi Paia ma o se tasi molimau ia Iesu Keriso.”
Elder Quentin L. Cook, Facebook, Iuni. 1, 2022, facebook.com/quentin.lcook.
O Lesona e Fesoasoani ia i Tatou ia Avea ai
“E faitau selau, e oo lava i le faitau afe, aoaoga ma aafiaga i le Tusi a Mamona e mafai ona fesoasoani ia i tatou i le avea ai ma tagata tatou te mananao ia avea ai i tatou. A o e tatalaina le Tusi a Mamona i aso taitasi, o le a faamanuiaina oe e vaai i na lesona e tatau ona e aoaoina.”
Elder Neil L. Andersen, Set. 27, 2022, facebook.com/neill.andersen.
Faateleina le Olioli ma le Filemu
“I le avea ai ma tagata O Le Ekalesia a Iesu Keriso o le Au Paia o Aso e Gata Ai, o la tatou suesuega o le Tusi a Mamona o se tasi molimau ia Iesu Keriso ma o se soa i le Tusi Paia o se elemene faavae o lo tatou faatuatua. …
“Ou te valaaulia outou e faitau le Tusi a Mamona ma mulimuli i aoaoga a Iesu Keriso o loo i ai i lenei tusi paia. A o e faia lena mea, e mafai ona e maua le olioli faateleina ma le filemu i lenei olaga ma i le olaga a sau. Ou te iloa e moni lenei mea.”
Elder Ronald A. Rasband, 18 Iuni, 2022, facebook.com/RonaldARasband.
O Folafolaga ma Amataga
“I se fonotaga talu ai nei ma faifeautalai sa fesiligia ai au, ‘O le a le Tusi a Mamona mo oe?’
“Ina ia tali atu, ou te liliu atu i le Tusi a Mamona i le faatomuaga o le Tusi a Mamona. I le tau faaiuga e faitauina faapea, “Matou te valaau atu i tagata uma e i soo se mea, ia faitau i le Tusi a Mamona, ia mafaufau loloto i ai i o latou loto le savali o i ai, ona ole atu lea i le Atua, le Tama Faavavau, i le suafa o Keriso pe ua moni le tusi. O i latou o e e mulimuli i lenei ala ma ole atu i le faatuatua, o le a latou maua se molimau i le moni ma le paia o le tusi e ala i le mana o le Agaga Paia.”’
“O a’u lena. O le Tusi a Mamona lena ia te a’u. Sa oo ina ou iloa e ala i le mana o le Agaga Paia e moni le Tusi a Mamona.
“O i latou o e e mauaina lenei molimau paia mai le Agaga Paia o le a latou iloa foi e ala i lea lava mana o Iesu Keriso o le Faaola o le lalolagi, o Iosefa Samita o lana talifaaaliga ma lana perofeta i aso nei e gata ai, ma O Le Ekalesia a Iesu Keriso o le Au Paia o Aso e Gata Ai o le malo o le Alii ua toefaatuina i luga o le lalolagi, e saunia ai mo le afio mai faalua o le Mesia.’
“O vaega uma o na parakalafa e lua i le faatomuaga o le Tusi a Mamona e faatatau ia te au. O le amataga lea o le ala na ou iloa ai o Iesu o le Keriso. O le amataga lea o lo’u iloa e uiga i le Ekalesia, o se amataga o lo’u iloa e uiga ia Iosefa Samita. O le maa’au’au lea o la tatou lotu. O lona faavae lea.
“Ou te fiafia i le Tusi a Mamona, ma ou te iloa o le a latalata atili atu se tagata i le Tama Faalelagi ma Iesu Keriso e ala i le ola ai i ona mataupu nai lo se isi lava auala. Ou te iloa e moni lenei mea mo au ma e moni mo oe.”
Elder Dale G. Renlund, Facebook, Fep. 28, 2022, facebook.com/DaleGRenlund.