Tuputupu Ae Latalata Atili i le Atua e ala i le Aoaoina i le Olaga Atoa

Saunia e Joel B. Randall

Mekasini a le Ekalesia

O le a’otauina o se sini e faavavau aua o le avea e faapei o le Atua o se tulimataiga e faavavau.

tagata tamoe o loo siomia e paneta, se tusi, ma se matauila

O le faauu mai le kolisi sa avea o se tauiviga mo a’u. E le faapea ona o mea uma sa tatau ona ou ositaulaga ina ia ou nofo ai i le aoga, ae ona o le vaega o a’u lava ia sa tatau ai ona ou lafoaia e ala i le alu ese. O lauga matagofie uma na tulei ai le vaiaso i luma po o le faamaeaina ma le manuia o galuega faatino mo sailiiliga i le masina atoa, i le iuga na aoga ai sekone taitasi o le aoga. Ae ua ou aoaoina o la’u —ma lo’u aotauina—e le tatau ona faamutaina i le faauuga.

Afai ua uma ona tatou maua se tikeri i le fiasefulu tausaga pe ua i ai se galuega ua tatou lelei ai, e mafaima e tatauona tatou aoao pea, aua e tele atu mea i aoaoga nai lo le mea tatou te ono mafaufau i ai. Ina ua suesueina e Henry B. Eyring, Fesoasoani Lua i le Au Peresitene Sili, le fisiki ma le matematika i le kolisi, sa ia lagonaina le lofituina. O lona lotovaivai na taitai atu ai o ia e taofi le suesue ma mafaufau e uiga i le taofia o lana aoga.

Ae i se tasi po, sa ia faamatalaina ai faapea “na oo mai le fesoasoani o se leo, o se leo moni lava i lo’u mafaufau. E le o lo’u leo. O se leo malu ma agaalofa—ae sa mausali. O upu na faaleoina o upu nei: ‘Pe a e iloaina po o ai moni lava oe, o le a e faanoanoa ona e te lei taumafai malosi atu.’”¹

O lenei malamalamaaga na taitai atu ai Peresitene Eyring e faamaea le kolisi, tuliloa le Iunivesite, ma mulimuli ane avea ma se faiaoga. Atonu e faamalieina i tatou i le mea o loo tatou i ai i aoga po o galuega, ae e mafai ona silafia e le Atua se gafatia ia i tatou e oo lava i taimi uma tatou te le mafai ona vaai i ai. E leai se mea tatou te le maua ma maua mea uma e ala i le auai i le aotauina i le olaga atoa.

O La Tatou Tiutetauave le Aoao

O le aoaoina i le olaga atoa e le na o se meae mafaiona tatou auai ai. Ua saunoa mai Peresitene Russell M. Nelson, “Ona o lo tatou manatu paia mo le atamai taitasi faaletagata, ua tatou mafaufau ai i le mauaina o le aotauina ia avea ma se tiutetauave faalelotu.”²

Aisea e ono avea ai le aotauina atili ma se tiutetauave faalelotu? I le Mataupu Faavae ma Feagaiga 88:79–80, ua aoaoina i tatou ina ia aoaoina i mataupu e tele ina ia “mafai ai ona outou saunia i mea uma pe a Ou toe auina atu outou e faalautele le valaauga lea ua Ou valaauina ai outou, ma le misiona lea ua Ou tofia i ai outou.” E mafai ma e tatau ona tatou faaaogaina lo tatou malamalama e faamanuia ai isi ma fesoasoani e fausia le malo o le Atua.

Ma le isi, e alofa tele le Atua ia i tatou ma e finagalo o Ia ia silasila mai o tatou alualu i luma. I le avea ai ma fanau agaga a lo tatou Tama Faalelagi, ua i ai so tatou tomai e le pei o se isi lava tagata i le lalolagi—ia avea e faapei o Ia. Ua tatou aoao mai tusitusiga paia e faapea o le Atua “ua atoatoa i le malamalama” (Iopu 37:16), ma o lo tatou faamoemoega ia atoatoa e tatau ona aofia ai le taumafai agai atu i se malamalama e sili atu ona atoatoa.

Fai mai le tamaitusiMo le Malosi o le Autalavou: “Ua ia te oe mafuaaga faaletino ma faaleagaga e saili ma fiafia e aoao. O le aotauina e le na o le mauaina o tupe. O se vaega o lau sini e faavavau ia avea atili e faapei o le Tama Faalelagi.”³ O le a’otauina o se sini e faavavau aua o le avea e faapei o le Atua o se tulimataiga e faavavau.

BYU–Pathway Worldwide ma le EnglishConnect

Na saunoa Elder David A. Bednar o le Korama a Aposetolo e Toasefululua, O Le Ekalesia a Iesu Keriso o le Au Paia o Aso e Gata Ai “e taumafai ia maua aoaoga ma faataugofie i ona sui auai uma, e tusa lava po o a o latou talaaga po o tulaga.”⁴ Ina ia faataunuúina lenei misiona, ua faafaigaluega e le Ekalesia ni iunivesite se fa e lagolagoina e le Ekalesia ma le BYU–Pathway Worldwide.

Ua ofoina atu ai aoga i luga o le initoneti, e taugofie, o le BYU–Pathway Worldwide o “se polokalama faaleaoaoga ua televave lona faatupulaia i luga o le initoneti lea e tautuaina le silia ma le 60,000 tamaiti aoga i tausaga taitasi i atunuu e 188.”⁵ E mafai e ana tamaiti aoga ona galulue agai i tikeri i luga o le initoneti mo se tau taugofie tele nai lo le mea latou te mafaia i isi iunivesite.

O se isi taumafaiga faaleaoaoga e lagolagoina e le Ekalesia o le EnglishConnect. O kosi e tolu o lenei polokalama e aoao ai tamaiti aoga e tusitusi, tautala, ma malamalama i le Igilisi. E ui lava o le BYU–Pathway Worldwide e manaomia ai tamaiti aoga e pasi se suega o tomai faaPeretania, ae e mafai ona fesoasoani le EnglishConnect i tagata e le tautatala i le faaPeretania ia agavaa.

Ina ia aoao atili e uiga i le BYU–Pathway Worldwide ma le EnglishConnect, siaki le tusiga “Aotauina: O Se Taumafaiga Faaleagaga” i le lomiga o lenei masina o leLiahona.

O le mataupu faavae o le aotauina i le olaga atoa e le na o i latou e mafai ona tulitulimatagauina aoaoga i le iunivesite. Na saunoa mai Elder Dieter F. Uchtdorf o le Korama a Aposetolo e Toasefululua: “Afai e le maua aoaoga aloaia, aua nei faatagaina lena mea e taofia ai oe mai le mauaina o le malamalama uma e te mafaia. O na tulaga faapena, o tusi aupito sili, i se isi itu, e mafai ona avea ma au ‘iunivesite’—o se potuaoga e matala i taimi uma ma talia ai i latou uma e talosaga atu i ai.”⁶

Ua aoao mai leMataupu Faavae ma Feagaiga 88:118 i: “Ia outou saili mai totonu o tusi sili ona lelei upu o le poto; saili i le aoaoina, e ala lava lea i le suesue ma le faatuatua foi.” O “tusi sili ona lelei” e aofia ai tusitusiga paia ma aoaoga a perofeta soifua. Ma ina ia aoaoina isi tomai ma le malamalama, e masani foi ona tatou manaomia ni malamalamaaga mai isi punaoa, e pei o tusi o faletusi mai tagata tomai faapitoa faatuatuaina, meafaigaluega mo le aoaoina o kolisi i le lotoifale, saite faaleaoaoga i le initoneti, lomiga o talafou, faafiafiaga faaleaganuu i le lotoifale, ma isi mea faapena. Ioe, e le o punaoa uma e i ai mea moni, o lea o le suesue i aso uma o le afioga a le Atua e mafai ona fesoasoani ia i tatou e iloatino ai le upumoni i isi suesuega. Ma e mafai ona tatou sailia le Agaga ma faaaoga le poto i le fuafuaina po o a punavai e aoao mai ai ma po o a mea mai ia i latou e moni.

Ia fia iloa e uiga i le lalolagi e ala i le faia o fesili. Vaavaai mo faamatalaga ma le matagofie o le olaga i aso taitasi. Na saunoa Peresitene Dallin H. Oaks, Fesoasoani Muamua i le Au Peresitene Sili, ma lona faletua o Kristen: “O le aotauina i le olaga atoa … e aofia ai taumafaiga tau faatufugaga. E aofia ai foi aafiaga ma tagata ma nofoaga: talanoaga ma uo, asiasiga i falemataaga ma koneseti, ma avanoa mo auaunaga. E tatau ona tatou faalauteleina i tatou lava ma olioli i le faigamalaga.”⁷

I a tatou aoaoga uma ma sikolasipi, e tatau ona tatou sailia le taitaiga mai le Tama Faalelagi, aua o Lana taitaiga o le a atili aoga ai a tatou taumafaiga faaleaoaoga. Na saunoa mai Peresitene Eyring, “E leai se mea e moni e le mafai ona e aoaoina, aua Na te silafia upumoni uma.”⁸ Ia faatuatua e silafia e le Atua (1) mea uma ma (2) finagalo e faasoa atu lena malamalama ia i tatou.

E pei ona aoao mai Elder Jeffrey R. Holland o le Korama a Aposetolo e Toasefululua, o lo tatou Tama Faalelagi “o loo faatalitali mai ma le naunautai mo le avanoa e tali ai au tatalo ma faataunuu au miti,”⁹ ma e aofia ai a tatou miti i le aotauina. Talitonu e mafai ona fesoasoani mai le Atua ia i tatou ia manuia ma o le a Ia taitaiina i tatou i tagata ma punaoa tatou te mananao i ai ma manaomia i le taimi sa’o a o tatou saili ma faatino ia faaaliga.

E leai se matua e taofia ai lo tatou aoaoina. E i ai lava i taimi uma se mea e sili atu e finagalo le Atua e aoao ai i tatou. E mafai ona lava lo tatou lotomaualalo e iloa ai e tele atu isi mea tatou te le iloa, ma e mafai ona tatou faafetai mo le avanoa e avea ai ma Ana tamaiti aoga.

O Lo Tatou Tiutetauave ia Auauna Atu i Isi ma o Tatou Malamalama

O se tasi o auala e faaali atu ai i le Atua lo tatou lotofaafetai mo le tomai e aoao ai o le faaaogaina lea o lena mea na maua ai le malamalama e faamanuia ai isi. E i ai lava se tasi e mafai ona manuia mai lo tatou malamalama ma aafiaga, pe o se aofia i le lalolagi atoa i luga o ala o faasalalauga faaagafesootai po o se aiga tuaoi o loo tauivi po o se tagata o le aiga i le fale.

E finagalo le Atua ia aoao o tatou mafaufau, faaleleia o tatou tomai, ma faaatoatoa o tatou gafatia ina ia mafai ona avea i tatou ma ni faatosinaga lelei mo le manuia i le lalolagi, saunia mea mo i tatou lava, o tatou aiga, ma i latou e limavaivai, ma atinae ai le malo o le Atua.”¹⁰ Tuu atu i le Atua e galueaiina faamanuiaga e ala i mea uma ua e aoaoina ma o loo faaauau pea ona aoaoina.

Sa faamatala e le Faaola se faataoto e uiga i se matai na tuuina atu ni taleni i ana auauna e toatolu a o lei malaga ese atu. O le auauna na lima taleni ma le lua taleni na tofu faaluaina a la taleni a o lei toe foi mai le matai. Peitai, o le auauna lona tolu “na alu ma eli i le eleele, ua nā ai ario a lona alii” (Mataio 25:18).

Ina ua toe foi mai le matai, sa ia vivii atu i auauna faamaoni e toalua ae aoai atu i le auauna paie: “Aua o se ua i ai ni mea, e foaiina atu ia te ia e atili tele ai o ana mea: a o le a le i ai ni mea, e faoa le mea ua i ai” (Mataio 25:29).

Po o le a lava le tele o le malamalama ua tatou maua i o tatou olaga atoa, e i ai lava i taimi uma se faamoemoega maualuga atu e tatau ona tatou faamanuiaina ai isi i lenei malamalama. Ua aoao mai Peresitene Nelson, “O le aotauina o le eseesega lea i le va o lemoomoo maimaupe ana mafai ona e fesoasoani atu i isi tagata ma lemafai onafesoasoani atu ia i latou.”⁵ A o tatou faaaogaina mea ua tatou aoaoina e faamalolosia ai o tatou uso ma tuafafine ma faatumauina i tatou lava ia tatala atu i le mauaina o le malamalama atili, o le a faalauteleina lo tatou lava malamalama ma o le a faateleina lo tatou aafiaga. Peitai, afai tatou te nanaina lo tatou malamalama ma taofiofi mo i tatou lava, o le a le fesoasoani ia i tatou ia avea atili e faapei o le Tama Faalelagi ma Iesu Keriso.

E tele auala e mafai ona tatou tulitulimatagauina ai le aotauina i le olaga atoa. E mafai ona tatou suesue atili e uiga i mea o tutupu i le taimi nei i lo tatou nuu po o le atunuu e faia ai ni faatinoga lelei pe a tatau ai. Afai o se tasi tatou te auauna atu i ai o loo tauivi ma se gasegase tatou te le iloa, e mafai ona tatou sailiili i ai ina ia tuuina atu ai le lagolago ma le agaalofa. E mafai ona tatou faaaogaina lo tatou malamalama i le talalelei ma la tatou molimau ia Keriso e faamalamalama ai le aso o se uo e ala i le tesi. Afai o loo tauivi tagata laiti o le aiga ma se mataupu a le aoga, e mafai ona tatou faaavanoaina se taimi mai la tatou taimi faatulagaina e aoao ai i latou.

O Le Polokalama a Tamaiti ma le Autalavou

O le aotauina i le olaga atoa o se vaega o le polokalama a Tamaiti ma le Autalavou a le Ekalesia na amataina i le 2019. O lenei polokalama ua faamoemoe e taiala ai tamaiti ia avea atili e faapei o lo latou Faaola i le faaleagaga, faaleagafesootai, faaletino, ma faaleatamai. A o tatou valaaulia tamaiti ma le autalavou ina ia taulai atu i le tuputupu ae i nei vaega e fa e ala i le setiina o sini ma faia ni fuafuaga e ausia ai na sini, e mafai ona tatou faia lea lava mea e tasi. O punaoa e tutusa lava le aoga mo tagata matutua.

E mananao moni lava tamaiti e faateleina lo latou malamalama ma tomai, ma e maualuga lo latou taliaina o suiga i o latou uluai laasaga. E mafai ona tatou aoao mai a latou faataitaiga a o tatou faaauau pea ona faatino ia uiga faapena i o tatou olaga. Mo punaoa e mafai ona tatou faaaogaina i o tatou manaoga mo le tuputupu ae, asiasi i le ChildrenandYouth.ChurchofJesusChrist.org.

E faaopoopo atu i le taumafai e aoao i o tatou olaga atoa, e mafai foi ona tatou lagolagoina isi i le faia o lea lava mea e tasi. O le fesoasoani i isi i la latou faigamalaga o le aotauina i le olaga atoa e le faapea o le avea ma se faiaoga. E mafai ona faauigaina lava o le musuia o isi e faaauau pea ona aoao e ala i lo tatou naunautai i le faia o lena mea. E mafai ona faauigaina o le aoaoina o se tomai fou ma se tagata o le aiga aua o se mea latou te fiafia i ai, e tusa lava pe tatou te le saili e aoao e uiga i lena mataupu e i tatou lava.

E mafai ona faauigaina o le saili mo se manaoga o siomia i tatou ma aoao faatasi ma isi i le auala e fesoasoani ai e foia. O lona uiga o le aoao e pei ona sa faia e le Faaola ma saili e faaauau pea i lena aoaoga i o tatou olaga atoa ona “o le mea e mai i le Atua o le malamalama lea; ma o ia o lē e mauaina le malamalama, ma tumau pea i le Atua, e mauaina le malamalama atili” (Mataupu Faavae ma Feagaiga 50:24).

Na valaaulia i tatou e Peresitene Nelson ina ia “faaauau lau aoga … po o le a lava le auala e te fuafuaina ai e sili ona lelei lou auauna atu i lou aiga ma le nuu.”¹² E leai ni aafiaga faalelalolagi se lua po o ni malaga faaleaoaoga e tutusa, ae a o faaauau pea ona tatou aoao ma tuputupu ae i o tatou olaga atoa, e mafai ona tatou faia se aafiaga tulaga ese e leai se tasi e mafai ona faia.