Toefauina o Lo’u Faatuatua ina ua Mavae le Masalosalo

Saunia e Hanna Koczka

Ina ua tuua e se tasi ou te alofa i ai le Ekalesia, sa faapea ona leiloa atu ai ma la’u lava molimau.

Ou te lei tauivi lava ma lo’u faatuatua i le talalelei a Iesu Keriso seia oo ina amata ona tau mai e lo’u uso matua ia te a’u e uiga i le ala na suia ai ona manatu. Sa i ai lava lona faatuatua malosi i taimi uma, o lea a o ou faalogo i ana upu ma vaaia ai ua o ese foi isi uo, sa amata ona ou mafaufau pe moni lava le talalelei.

Mo le taimi muamua, sa amata ona ou masalosalo i mea sa ou talitonu i ai i taimi uma, ma sa ou fefe. Sa ou le mautinoa po o fea e liliu i ai. Ou te tatalo, faitau a’u tusitusiga paia, ma saili le taitaiga, ae sa lagona moni lava le luluina o lo’u faatuatua.

O Se Valaauga sa Le’i Mafaufauina

E lei umi, ae ou faatagaina a’u lava e alu ese mai le Agaga. Sa ou lagonaina le mamao ese mai le Faaola.

Ae sa foliga mai sa faafuasei lava, sa talosagaina a’u e faatulaga se konafesi a le YSA mo talavou matutua i Europa i sasae ma auauna atu o se fesoasoani mo le MMA.

Sa ou mautinoa na filifilia e lo’u peresitene o le siteki le tagata sese—sa ou lagonaina le matuai maualalo faaleagaga. E mafai faapefea ona ou faagaeetia isi a o tau le mafai ona ou faaopeopea?

Ou te lei manao ai, ae sa ou taliaina ma le faatautau le valaauga.

Toe Fesootai ma Lo’u Faatuatua

Sa ou aoaoina le tele o mea a o ou faatulagaina nei mea na tutupu e fausia ai le faatuatua. O le mea sa sili ona ou fiafia i ai o le toe fesootai ma uo talavou matutua o e na fesoasoani ia te a’u e manatua le faatuatua sa ia te a’u ae ou te lei tauivi e talitonu.

Sa toatele naua ni uo na faalogo i o’u atugaluga ma fesili ma le agaalofa. Sa latou faasoa mai foi lo latou faatuatua ia te a’u ma faamanatu mai pea ia te au le tele o le faamalosia o i latou e la’u molimau i le taimi ua tuanai. Sa latou faamanatu mai ia te au ou lagona sa i ai muamua e uiga i le talalelei, ma sa ou manatuaina ni aafiaga maoae faaleagaga i lo’u olaga atoa.

Sa ou iloaina e ui ina sa i ai a’u fesili, sa ou manao ia ou faatuatua ia Iesu Keriso. Sa ou manao e ola i poloaiga, auai i le malumalu, alu i le lotu, ma fausia ma faasoa atu la’u molimau.

A o ou tauivi, sa amata ona ou talitonu ou te lei manaomia le Atua. Ae ua mama a’u avega, ma ua sili atu le susulu o lo’u ala a o ou faalagolago ia te Ia ma toe valaaulia o Ia i lo’u olaga.

Manatua Ou Aafiaga Faaleagaga

O le taliaina o lenei valaauga o se faamanuiaga aua sa ou iloaina le tele o lo’u misia o le Agaga i lo’u olaga.

Na saunoa Elder Neil L. Andersen o le Korama a Aposetolo e Toasefululua e uiga i le mana o le toe manatuaina o o tatou aafiaga faaleagaga ma le auala e mafai ai ona tatou fesoasoani ia i latou tatou te alolofa i ai ia manatua o latou aafiaga. Sa ia aoao mai:

“Pe a oo ina faapouliuliga e faigata faaletagata, masalosalo, po o le lotovaivai lo tatou ala, … o le[nei] manatuga musuia faaleagaga e pei o maa susulu e fesoasoani e faamalamalamaina le ala i luma, faamautinoa mai ia i tatou e silafia i tatou e le Atua, e alofa ia i tatou, ma ua auina mai Lona Alo, o Iesu Keriso, e fesoasoani ia i tatou e toe foi atu i le aiga. Ma pe a faataatia ese e se tasi ona manatuaga musuia ma ua se pe ua lē mautonu, tatou te faasaga atua i latou i le Faaola a o faasoa atu lo tatou faatuatua ma manatuaga ia i latou, ma fesoasoani e toe tata’i i latou ia toe maua na taimi faaleagaga taua sa latou faapelepeleina.”¹

O le mea tonu lava lea na faia e a’u uo mo a’u, lea na fesoasoani ia te a’u e faia ai foi mo a’u lava ia.

E faafaigofie e le lalolagi ona le iloa atu a tatou sini e faavavau, alualu i luma, ma sootaga ma le Atua. Ae i taimi o le masalosalo, e mafai ona tatou taulai atu i le mafuaaga na tatou filifili ai e mulimuli ia Iesu Keriso ma manatua o tatou faamanuiaga folafolaina ma Lona aao i o tatou olaga.

Faitau lau api talaaga, tagai i ata tuai o le taimi na faatumulia ai lou olaga i le Agaga, ma talanoa ma ni uo faamaoni ua leva. Auauna atu i isi, faasoa atu lau molimau, ma tatala lou loto i molimau a isi.

Ou te le o maua lava tali uma i au fesili, ae a ou tuleia ese leo o le lalolagi ma filifili le faatuatua ia Iesu Keriso ma le Tama Faalelagi, La te saunia mea ou te manaomia ma taialaina a’u i le olioli.

Ou te iloa a o faaauau pea ona ou mafaufau loloto i o’u aafiaga faaleagaga ua tuanai ma taumafai ia oo i ni aafiaga fou, o le a ou toefausia pea lo’u faatuatua i le tasi le laa i le taimi.