Faatuatua e Fetaiai ai ma le Lē Mautonu

Saunia e Yih Chwin Koay, Sigapoa

Ona o faigata na feagai ma le ma tama teine faatoa fanau mai, o le aso na muamua atu i le Toetu mamalu o le Faaola i le Aso Sa e taua tele ia te a’u.

Ata

o se tinā ma lana tama teine o loo ataata

Ata pu’e mai faaaloaloga a le tusitala

O le ma tama teine, o Alexis, na vave fanau mai i le 26 vaiaso. Ona sa fanau mai o ia ma ni māmā e le’i atoatoa, sa ia manaomia ai le lagolago o masini manava e fesoasoani ia te ia e manava ai.

O Alexis sa faatulaga e sau i le fale i le mavae ai o le tolu masina i totonu o le potu e tausi ai pepe fou. Ae sa faafuasei lava ona tigaina o ia ina ua faateteleina le maualuga o le toto i alatoto ia e sapalaia le toto i ona māmā, o se tulaga ua lauiloa o le toto maualuga i le māmā.

O le aso na lanumoana ai o ia a o tauivi e mānava e tumau pea i lo’u mafaufau. O se tasi lea o le tele o taimi taufaafefe sa matou oo i ai i le 12 masina sa ia faaaluina i le falemai. O lena tausaga na lofituina i le faanoanoa ma faamomoi loto mo ma’ua ma lo’u toalua.

Sa faaopoopo lo matou faanofoesea i lo ma popole. Ona o le faamai pipisi o le KOVITI-19, sa vavaeese ai a’u mai tagata o lo’u aiga lautele. Ma le isi, sa faigata ia i ma’ua ma lo’u toalua ona maua le lagolago i fafo atu o le falemai. Sa foliga mai na toalaiti tagata na malamalama i mea sa matou feagai. Sa ou lagonaina le leai o se fesoasoani ma le atuatuvale, ma sa tele ni taimi na ou faanoanoa tele ai i le falemai.

Ou te faafetai mo uso o le Aualofa o e na fesoasoani i lo’u aiga i lo matou taimi o mafatiaga. Sa ou fou i le uarota, lea faatoa siitia mai Hong Kong i Sigapoa. E toatele uso ou te le’i iloaina na momoliina atu meaai ma siaki atu a’u. Sa ootia a’u i lo latou alolofa ma tatalo mo lo’u aiga.

I taimi pogisa, sa ou liliu atu ai i le Atua. Sa le’i vave tali mai o ia i a’u tatalo, ae sa faaauau pea ona ou tatalo. O lo’u toalua, e ui e lē o se tagata o le Ekalesia, sa lagolagoina a’u e ala i le auai i a’u tatalo. Sa ma ola i aso taitasi ma le faatuatua i o ma loto o le a tausia e le Atua. Sa ma faia mea uma na ma mafaia mo le ma tama faapelepele ma tuu atu le vaega na totoe ia te Ia.

Ata

o se tinā o loo siiina lana tama teine i le falemai

Faatasi ai ma le taitaiga a le Atua, sa ma oo ai i se faaiuga na ma tauivi ai mo le tele o masina. Sa ma lagona le taialaina ina ia faia e Alexis se taotoga e tuu ai se faagaau i lona ālaea (tracheostomy). Sa fuafua fomai tipitipi e tafa le pito i luma o lona ua i lona ālaea ona tuu lea i totonu o se faagaau lea o le a mafai ai ona sao le ea i ona māmā. Ona mafai ai lea e Alexis ona manava e aunoa ma le faaaogaina o lona isu po o le gutu.

O Se Aso Toonai e Lē Gata

A o o’u tomanatu i lo matou aafiaga ma Alexis, ou te mafaufau i le taulaga togiola a lo tatou Faaola. Ua tatou masani uma i Lona Faasatauroga ma Lona Toetu mamalu. O le taimi i le va o nei mea tāua e lua e tau lē o ta’ua i tusitusiga paia. Ae o lena taimi e i ai se tāua faapitoa mo a’u, ma avea ai le Eseta ma mea e sili ona tāua.

Mo se faataitaiga, o le Aso Toonai o se aso o le lē mautonu. Sa lē mafai e soo o le Faaola ona vaai lelei i le mamalu o le a oo mai i le Aso Sa. O le Aso Toonai, e pei o le Aso Faraile, o se aso faigata mo i latou e tumau ai.

I le umi na taofia ai lo ma afafine i le falemai, sa ma ola ai i se lagona e pei o se Aso Toonai e lē gata. Sa ma feagai ma le tele o le lē mautonu lea sa lē mafai ai ona ma iloa mea na tutupu i aso taitasi. I taimi taufaafefe ina ua foliga mai e ono maliu Alexis, sa faigata ia i ma’ua ona vaaia le malamalama i le isi itu o le ana, ma le tau leai o se faamoemoe.

Ae e ala i lo ma aafiaga, sa ou aoao ai e silafia atoatoa e le Tama Faalelagi ma Lona Alo i tatou ma o tatou tofotofoga. Ou te faafetai mo le Faaola ma maofa i Lana Togiola. E ala i Lana Togiola, e mafai ai ona tatou maua le fesoasoani lē maluelue ina ia pasia le Aso Toonai o lo ma olaga a o ma pipiimau pea i le faamoemoe mo faamanuiaga i le lumanai.

Sa manuia le taotoga o Alexis. Sa ia faamanatuina talu ai nei lona aso fanau lona tolu. E ui lava i mea sa ia oo i ai, o ia o se tamaitiiti laitiiti fiafia e fiafia e ataata ma feiloai i tagata fou i le paka a le matou pitonuu. O ana faagaau e manava ai e puipuia ai o ia mai le tautala, ae e fiafia o ia e faailo atu lanu ma faitau tusi. Ma te lagona le faamanuiaina e faaalu taimi uma ma ia.