“Ala o Faasalalauga Faaagafesootai: O Le A Se Mea O E Faasoaina Atu?,” Liahona, Ape. 2023.
Autalavou Matutua
Ala o Faasalalauga Faaagafesootai: O Le A Se Mea O E Faasoaina Atu?
E mafai ona tatou faaaogaina ala o faasalalauga faaagafesootai o se faamalama mo isi e molimauina ai le olioli lea e sau mai le talalelei.
Ata na tusia e David Green
O a mea e te faasoa atu i luga o ala o faasalalauga faaagafesootai? O ee faasoa atu mea e aumaia ia te oe le olioli? O ee tuuina i luga mea e uiga i ou aafiaga o le olaga? O ee sailia ni mea e fiafia mai ai ma ni viiga? O le mea e sili ona tāua, o e tuuina i luga mea e uiga i le talalelei a Iesu Keriso?
O le faasoaina atu o le talalelei i la’u misiona o se aafiaga tauia mo a’u lea sa ou manao e faaauau ai pea ona faia ina ua ou taunuu i le aiga i Peru. Ae sa vave ona ou iloa e le’i i ai so’u taimi na ou manaomia e aapa atu ai i tagata uma sa ou manao i ai, e pei ona sa ou faia i la’u misiona.
O lea sa ou liliu atu ai i ala o faasalalauga faaagafesootai.
Sa ou fatuina se lautusi patino e faasoa atu ai o’u aafiaga i le misiona, o o’u manatu mai a’u suesuega o le Sau, Mulimuli Mai ia te A’u i vaiaso taitasi, ma isi malamalamaaga e faatatau i le talalelei faatasi ma isi. Ma a o o’u faasoaina atu la’u lautusi, sa amata ona ou maua ni sāvali matagofie mai uo na faafetai mai ia te a’u mo le faasoa atu. Ou te le’i faamoemoeina lena mea! Ona ou mafaufau lea: “Aisea e lē mafai ai ona ou faia nisi mea se tele i luga o ala o faasalalauga faaagafesootai?” Ma o le ala lena na amata ai lo’u ala i le fatuina o se tulaga e faasoa atu ai le talalelei i le Instagram ma le YouTube.
O Le Mealilo i le Galuega Faafaifeautalai i Faasalalauga Faaagafesootai
O le faasoaina atu o lou faatuatua i ala o faasalalauga faaagafesootai e lē tatau ona faigata, ae o nisi taimi atonu tatou te lagonaina le fefe e faasoa atu ona e mafai ona faatumulia ala o faasalalauga faaagafesootai i le faamasino atu, manatu faalelalolagi, ma tusitusiga e lē tāua tele. O nisi taimi e foliga mai o se nofoaga e sili ona lē talafeagai e tatau ona tatou faasoa atu ai lo tatou faatuatua. Ae o le mea moni, ona o faasalalauga faaagafesootai ua faatumulia i le tele o mea faafoliga ma pepelo lea e ao ai ona tatou faasoa atu le olioli ma le filemu ma le upumoni tatou te maua o ni soo o Iesu Keriso.
E masani ona ou fesili: “Ale, o le a se mea e faaosofia oe e faasoa atu le talalelei e ala i faasalalauga faaagafesootai? O le a le mealilo i le faasoaina atu masani ma le faatatauina i le olaga i aso uma?” Ma e tutusa lava la’u tali i taimi uma: “E leai se mealilo! O le ki o le ola lea i le talalelei ma avea o se vaega o lo’u olaga i aso uma.”
O le tele o lo’u taumafai e ola i le talalelei ma faalolotoina lo’u faatuatua, o le tele foi lena o lo’u manao e faasoa atu i isi. O le mea o loo faaosofia lo’u tuutoina o le tele o le taimi e faasoa atu ai la’u molimau i isi e sau mai aafiaga faaleagaga ua ou maua i lo’u Tama Faalelagi.
E ala i ou aafiaga, ua ou aoaoina ai o le faasoaina atu o le talalelei e mafai ona faigofie e pei o le faasoaina atu o tatou aafiaga i aso taitasi o le avea ma se vaega o le lafu a le Faaola. Ou te lē iloa i taimi uma pe o aafia se tasi i mea ou te faasoa atu, ae ou te iloa “o mea laiti ma faatauvaa e faataunuu ai mea tetele” (Alema 37:6).
O Le Valaaulia a le Faaola e Faasoa Atu Lo Tatou Faatuatua
O loo i ai tagata i le lalolagi o loo saili mo ni faamanatu po o ai i latou ma pe aisea e tatau ai ona latou agai pea i luma ma le faamoemoe. Ma o ai e mafai ona sili atu ona faasoa atu nei upumoni nai lo i tatou? I le avea ai ma soo o Keriso, ua tatou iloa e uiga i folafolaga a le Atua ma le fuafuaga matagofie ua Ia saunia mo Ana fanau. Manatua, o nisi tagata ua “nao na taofia mai le upumoni ona ua latou le iloa le mea e maua ai” (Mataupu Faavae ma Feagaiga 123:12)—ma e mafai ona tatou fesoasoani ia i latou ia mauaina.
E pei ona sa aoao mai Elder Dieter F. Uchtdorf o le Korama a Aposetolo e Toasefululua:
“Faasoa atu ou aafiaga faafesagai ma se tagata, i luga o ala o faasalalauga faaagafesootai, i ni vaega, i soo se mea.
“O se tasi o mea mulimuli sa ta’u atu e Iesu i Ona soo e ao ona latou o atu i le lalolagi atoa ma faasoa atu le tala o le Keriso toetu. O le asō ua tatou taliaina ai ma le olioli lena poloaiga sili.”1
O le avea ai ma soo o Iesu Keriso e tatau ona aofia ai a tatou amioga e lē gata i le olaga moni ae faapea foi i luga o ala o faasalalauga faaagafesootai. Pe a sii a’e o tatou leo e folafola atu upumoni o le talalelei, e mafai ona tatou faataunuuina le tiutetauave sili ua tuuina mai e Iesu Keriso ia i tatou.
Sei o tatou faaali atu i le lalolagi le ala tatou te faaavanoa ai le taimi mo le Alii i aso taitasi, le auala tatou te faafetaia’ia ai o tatou faigata ma faanoanoaga, ma le auala tatou te maua ai le filemu. Ou te iloa o le faasoa atu o mea e tāua, o le a avea ai i tatou ma meafaigaluega sili i aao o le Atua e faapotopoto Isaraelu.
E manaomia e le Tama Faalelagi i tatou. Sei o tatou taofi le lafi i tua o a tatou lau ae faaaoga e fesootai ai ma isi. Ia avea i tatou ma se vaega o Lana galuega ma tuu i luga e lē o le mea tatou te maua ai ae o Lē e tuuina mai ia i tatou le olioli—lo tatou Faaola, o Iesu Keriso.