“Toe Setiina o A Tatou Pusa Eletise Faaleagaga,” Liahona, Ape. 2023.
Sau, Mulimuli Mai ia te A’u
Toe Setiina o A Tatou Pusa Eletise Faaleagaga
O le faatuatua ia Iesu Keriso e aumaia ai ia i tatou le mana ma le malosi.
Ia Fepuari 2021, na feagai ai Texas ma se matātia o le aupito sili ona malulu. O le malosi o le malulu sa aafia ai le faitau miliona o tagata, ma i’u ai ina faaleagaina paipa, motusia le eletise, ma le leai o se vevela. O le aiga o lo’u afafine, e pei o le toatele o isi, na oo i le leai atoa o le eletise. Sa ia aui lana fanau laiti i ofu mafanafana ma palanikeke ina ia mafai ona latou mafanafana.
I le mavae ai o ni nai aso na ola ai i lenei tau malulu tele, sa matauina e lo’u afafine ni mōli i totonu o se fale tuaoi. Sa faafetai o ia i le iloaina ua toe ola mai le eletise. Ae sa faate’ia o ia i le iloaina o le mea moni na toe ola mai i aso ua mavae. Na te le’i iloaina na pē le pusa eletise. Ua leva ona ola le eletise. Sa na o le manaomia lava o lona toe oomiina o le ki ia ola!
Pe a ou mafaufau i le aafiaga a lo’u afafine, sa ou iloa ai o i tatou taitoatasi o loo i ai foi mea e mafai ona tatou ta’ua o se pusa eletise faaleagaga.”
Malamalama o le Lalolagi, saunia e Brent Borup
Mana Atoatoa
O le faatinoina o le faatuatua ia Iesu Keriso e maua ai le mana tele mai le Atua. Mai lea aso i lea aso, e mafai ona tafe mai lena mana i o tatou olaga. Atonu ua tatou masani lelei i ai lea tatou te lē mātauina ai. E i ai lava iina i taimi uma Lona mana mo i tatou. Ma, o nisi taimi tatou te feagai ai ma se faafitauli faaleagaga ma taumanatunatu ai pe ua leiloa le mana. I taimi faapena, e tatau ona tatou filifili ai e faatino le faatuatua ina ia mafai ai ona tatou faaauau pea ona maua Lona mana folafolaina. O le faia o lenei mea, atonu tatou te faapea atu, ua tatou toe setiina a tatou pusa eletise faaleagaga.
“O lo tatou faatuatua e tatalaina ai le mana o le Atua i o tatou olaga,” na saunoa ai Peresitene Russell M. Nelson. Sa ia aoao mai foi: “E lē manaomia e le Alii se faatuatua atoatoa mo i tatou e maua ai Lona mana atoatoa . Ae ua Ia talosagaina i tatou ia talitonu.”1 Na saunoa mai Elder Jeffrey R. Holland o le Korama a Aposetolo e Toasefululua: “O le telē o lou faatuatua po o le maualuga o lou malamalama e lē o le mea lea e tāua—o lou faamaoni a’ia’i e te faatinoina e tusa ai ma lou faatuatua ma le upumoni ua uma ona e iloa.”2
Po o le a lava le maualuga o le faatuatua atonu tatou te maua, pe a tatou filifili e talitonu ia Keriso, e mafai ona tatou faalagolago i Lona mana e fesoasoani ia i tatou.
Na maua i le kanesa o ponaivi i le 14 o ona tausaga, sa faafetaia’ia e Mason le luitau ma le faatuatua. Sa faamatala e lona tinā, “Sa tauivi pea Mason ma le fefe, ae sa ia filifili e aua ne’i faatapulaaina e lena mea lona faatuatua ma le alofa.”
O le ata pu’e mai faaaloaloga a le aiga o Mason
O Se Filifiliga e Faafetaia’ia le Fefe i le Faatuatua
Ia Aokuso o le 2021, sa ma feiloai ai ma lo’u toalua i se ulugalii pele o la la’ua faauoga na ma faapelepele i ai. O lo la atalii, o Mason, sa faatoa maua i se kanesa o ponaivi e seāseā ona iloa o le osteosarcoma. A o le’i maua i le ma’i, sa ia foliga o se tamaitiiti maloloina e 14 tausaga ma se vae tigā ma se toniga peisipolo pisipisia mai le faasee atu i le tini.
Peitai, e le’i umi, ae foliga mai ua suia faafuasei le olaga o Mason. Sa faafuasei ona amataina ni talanoaga taufaafefe ma ni tagata tomai faapitoa faafomai e uiga i le kimo, leisa, taotoga, e ono aofia ai le tipi ese, ma le umi o le olaga. Ua faamatala mai e lona tinā le mea na tupu ina ua fesili atu fomai pe fia iloa le avanoa e ola ai: “Ina ua mavae se taimi umi o le faagasologa o lagona fou ma le lofituina, sa maligi lemu ifo loimata i le fola. Sa ia tali mai ma le lototoa, ‘Leai, faafetai! O loo seki a’u!’ Faatasi ai ma na upu itiiti, sa amata ai ona ia filifili le auala o le a ia fetaia’i ai ona tofotofoga.”
Na saunoa mai Elder Neil L. Andersen o le Korama a Aposetolo e Toasefululua, “E lē faamalosia lava e le faatuatua se tali i fesili uma ae saili e le faatuatua le faamautinoaga ma le lototele e agai atu ai i luma, ma le iloaina i nisi taimi, “Ou te lē iloaina mea uma, ae ua lava lo’u iloa e agaigai atu ai pea i le ala o le avea ai ma soo.”3 E faaalia e le faatuatua o ia lava pe a tatou filifili e agai i luma, ma le leiloa po o le a le isi mea e sosoo ai.
Sa malosi le kanesa o Mason. Sa tetee lona tino i togafitiga taitasi e faaumiumi ai le ola. Na faasoa mai e lona tinā, “Sa matou lagonaina se manao lofituina e taofi le taimi, ae sa agai i luma le taimi ma sa matou oo ai i le aveesea o mea uma sa matou iloa o mea masani.” Sa ia faaauau, “Faatasi ai ma le matautia o le fefe mo le lumanai, sa matou molimauina ai foi le foafoaina o le malosi, mana, ma le filemu i talaatu o ō matou gafatia faalelalolagi. Sa leai se isi a matou faamalamalamaga nai lo lenei: Sa faateleina e le Atua o matou gafatia. Na matou mauaina vavega, e ui ina ese mai i vavega na matou mananao ai i le amataga.”
Lē Solomuli
Sa fesiligia e Elder David A. Bednar o le Korama a Aposetolo e Toasefululua ia Elder Neal A. Maxwell (1926–2004) po o a lesona sa ia aoaoina a o mafatia ai i le lukimia. Na tali Elder Maxwell, “Ua ou aoaoina, o le lē solomuli e sili atu le tāua nai lo o le ola.”4 O le filifili e aua ne’i solomuli e manaomia ai se faatinoga e oo lava i le feagai ai ma le fefe. Ae na te aumaia le mana e sili atu nai lo o le malosi faaletino.
Na aoao mai Isaia, “Na te avatua le malosi i e ua vaivai; a o e ua leai se malosi, na te faatuputele i ai le malosi” (Isaia 40:29). Ina ua feagai le nuu o Alema ma puapuaga e foliga mai e lē mafai ona faatoilaloina, sa faamafanafanaina i latou e le Alii ona o lo latou faatuatua ia te Ia. Sa latou gaua’i atu i Lona finagalo ma maua ai le mana e tauave ai avega ua tuu i o latou luga. (Tagai i le Mosaea 24:13–16.)
Malosi i taimi o le Faanoanoa
Na faamatalaina e le tinā o Mason, I se tasi po na savali atu ai Mason i tafatafa o le potumoe lea sa ma faia ai tatalo ma lona tuafafine e valu tausaga le matua. I ona loimata sa ia faaleoina ai ona popolega e uiga i lona tuagane. Sa ou fusi mau o ia, ma sa ma fetagisi faatasi. Sa tootuli Mason i o ma tafatafa ma fusi i ma’ua i ona lima vaivai. Sa ia filifili e auau atu i le loloto o ni lagona lē lelei ma tuu ese lona ia lava fefe ina ia mafai ona ia fesoasoani i lona tuafafine ma a’u. Sa ia faamalosia i ma’ua e fetaia’i ma o ma’ua faanoanoaga e ala i le auai faatasi ma i ma’ua i o ma’ua faanoanoaga.”
Mason ma lona aiga
O le ata pu’e mai faaaloaloga a le aiga o Mason
Fai mai tusitusiga paia o atalii o Helamana “sa sili atu ona latou mafaufau i le saolotoga o o latou tamā nai lo o o latou ola” (Alema 56:47). Sa latou taulai atili atu i lo latou alolofa mo o latou aiga nai lo o latou lava tulaga. E faapena foi Mason, na maua le malosi e sili atu nai lo lona lava malosi e ala i le faamuamuaina o lona alofa mo lona aiga nai lo ona lava lagona, fefe, ma le masalosalo.
“Na iloa e Mason e lē manaomia ona faatali o ia ina ia faamaloloina faatoa faamalosia lona faatuatua,” o le tala lea a lona tinā. “Sa mafai ona ia faalagolago i le Atua, ma o lenei mea na mafai ai e ia ona faamatuu atu lona lava vaivai. Sa ou matamata i vavega o tutupu mai i totonu o lo matou aiga ma e oo lava i totonu o le nuu a o fesoasoani mai le Atua ia matou iloa o le alofa sa—ma e—sili atu ona mamana nai lo le fefe. Sa tauivi pea Mason ma le fefe, ae sa ia filifili e aua nei faatapulaaina e lena mea lona faatuatua ma le alofa.”
O le i ai o le faatuatua e lē o se mea e tasi se taimi e tupu ai. O faaiuga i aso taitasi e faalagolago i le Atua, e faia pea lava pea, e fusia ai i tatou ia te Ia ma Lona mana.
I le na o le ono masina talu ona iloa lona ma’i, na faauu ai ma le lototoa Mason mai le olaga faaletino. Sa ia filifili pea lava pea e faamuamua le Atua ma sa laveaiina mai ona popolega uma.
O Le Faatuatua e Fuli ai Mauga
O i latou e filifili le faatuatua ia Keriso e mafai ona latou faatalitalia lenei faafeiloaiga maoae mai lo tatou Faaola: “Ua lelei ia, le auauna lelei e, ma le faamaoni, ua e faamaoni i nai mea itiiti, ou te tofia oe e pule i mea e tele; ina ulufale mai ia i le fiafia o lou alii” (Mataio 25:23).
Ua lapataia i tatou ma le alofa e Peresitene Nelson e faapea i aso o i luma atu o le a tatou manaomia ai le mana o le Atua.5 O loo avanoa lena mana mo i latou uma o e fetaomi atu i luma ma le faatuatua ia Keriso. Po o a lava o tatou tofotofoga, o le tali o le ki lea o a tatou pusa eletise faaleagaga ma faalagolago i Lona mana.
E ala i lou faatuatua, o le a faateleina ai e Iesu Keriso lou tomai e aveese ai mauga i lou olaga, e ui i ni ou lu’itau patino e ono tetelē e pei o le telē o le Mauga o Evaresi.
O au mauga atonu o le tuuatoatasi, masalosalo, ma’i, po o isi faafitauli patino. O le a eseese lava au mauga, ae o le tali i ou lu’itau taitasi o le faateleina lea o lou faatuatua.”6