“A’otauina: O Se Taumafaiga Faaleagaga,” Liahona, Ape. 2023.
O Faamanuiaga o le Ola-Tutoatasi
A’otauina: O Se Taumafaiga Faaleagaga
Ua ofoina mai e le Ekalesia i le Au Paia o Aso e Gata Ai i le lalolagi atoa avanoa se a’otauina taugofie, i luga o le initoneti, ma faavae faaleagaga.
Ata na pu’eina e Derek Israelsen
Ua ta’ua e Peresitene Russell M. Nelson le a’otauina “o se tiutetauave faalelotu.”1 Ae mo le toatele o tagata, o le aoaoga o se punaoa e tau lē maua, e avanoa mo naʻo tagata atamamai poʻo i latou e tele mea tau tupe. Brian K. Ashton, peresitene o le BYU–Pathway Worldwide, na faamalamalama mai e faapea, i le tele o atunuu, afai e lē faaalia e tagata aoga le naunau mo le kolisi a o laiti, latou te misia avanoa faaleaoaoga i le lumanai.2
Ae o le EnglishConnect ma le BYU–Pathway Worldwide (tagai i autafa) e maua ai avanoa mo tagata o le Ekalesia ma o latou aiga ma uo e faalautele ai a latou aoaoga. O nei punaoa e avatu ai i tagata aoga le faamoemoe ma ua mamanuina e fesoasoani ia i latou ia manuia.
“Matou te auauna atu i tagata aoao matutua, tagata aoao o augatupulaga muamua, ma soo se tasi lava e manaomia se aoaoga taugofie i luga o le initoneti,” na saunoa ai Peresitene Ashton. “Mo i latou o ē tautatala i le faa-Peretania pe mananao e aoao le faa-Peretania, o nei polokalama ua maua ai le avanoa e aoaoina ai e le Agaga Paia ma avea ai ma tagata e finagalo le Atua e avea ai i latou. O se sāvali mamana lena mo tagata aooga i le lalolagi atoa.”
Ata na pu’eina e Eve Tuft
O La Tatou Fesoasoani Sili mo Aoaoga
O la tatou fesoasoani aupito sili i le tulitulimatāgauina o aoaoga maualuluga atu e lē o lo tatou atamai ae o le ma’elegā i lo tatou sailia o le fesoasoani mai o le Agaga Paia, na saunoa ai Peresitene Ashton. “O le aoaoina o se taumafaiga faaleagaga, ma o le aoao e ala i le Agaga Paia e fesoasoani tatou te aoao ai i le auala e maua ai faaaliga.”
O le a’otauina e lē na o le mauaina o se faailoga po o le agavaa mo se galuega, na faaopoopo mai ai Peresitene Ashton. “E telē atu nai lo lena. E faatatau i le auala e ola ai, le auala e galue ai i lalo o le uunaiga a le Agaga Paia, ma le auala e avea ai e faapei o le Tama Faalelagi ma Lona Alo, o Iesu Keriso.”
Na saunoa Peresitene Ashton afai tatou te faia mea e valaaulia ai le Agaga i o tatou olaga, e mafai e le Agaga Paia ona faavavevave lo tatou gafatia e aoao atili ai ma le mataalia atili. O na mea e aofia ai le tausia o poloaiga, filigā, faatinoina i le faatuatua, ma le amataina o a tatou suesuega i le suesueina o tusitusiga paia ma le tatalo.
“Pe a tatou aoao e ala i le Agaga Paia,” na ia saunoa ai, “tatou te lagonaina lena malena ae suamalie i o tatou fatafata [tagai Alema 32:28]. O le iloaina o lena lagona o le taimi e mālie ai le aoaoina! E fesoasoani le polokalama faaiunivesite a le Ekalesia ia i tatou e faia lena mea, ma o loo avanoa mo soo se tasi e manao ina ia aoaoina e le Agaga Paia.”
Faaaliga ma le Aoaoina
E ala mai i le EnglishConnect, sa tauaveina ai e Haustia Rocha Ballam le tiutetauave mo lana aoga a o ia faateleina lana molimau i le talalelei.
“Aua le fiu i au miti,” o le tala lea a Haustia, o lē na faamaeaina se faailoga e ala i le BYU–Pathway Worldwide.
Ata mai faaaloaloga a le BYU–Pathway Worldwide
Sa manao Haustia Rocha Ballam e aoao le faa-Peretania ina ia mafai ona ia tulitulimatāgauina se faailoga o le iunivesite e ala i le BYU–Pathway Worldwide. I le avea ai ma se tagata fou o le Ekalesia, sa ia manao foi e aoao atili e uiga i le talalelei. O le EnglishConnect o le avanoa lea sa ia faia ai mea uma e lua.
“Ou te le’i tautala faa-Peretania,” o le tala lea a Haustia, mai Bahia, Pasila. “Sa na o le ‘Talofa’ ma le “O a mai oe?’ na mafai ona ou fai atu ai”
Fai mai Haustia o le a ia manatua pea lana uluai faatasiga faafesagai o le EnglishConnect, lea sa ia mafaufau ai pe faamata e mafai ona ia faalauteleina lana faa-Peretania ia sili atu nai lo faafeiloaiga faigofie. Na suia lena mea ina ua tuuina atu e se tasi o faifeautalai o auaunaga lana molimau i le faaiuga o le faatasiga.
“Ou te le’i malamalama i se mea i le taimi o le vasega, ae sa ou malamalama i mea uma sa ia fai mai ai ona sa ou lagonaina le Agaga,” o lana tala lea. “Sa fesoasoani lena mea ou te lē faamaamulu ai. Ina ua ou tuua le faatasiga, sa ou matuā fiafia lava, ma le naunautaiga e aoao le faa-Peretania ma suesue pea i le EnglishConnect.”
Ata mai faaaloaloga a le BYU–Pathway Worldwide
Faatasi ai ma lena naunautaiga—ma le tele o le galue malosi, tatalo, ma le faatuatua—na faatoilalo ai e Haustia lona matamuli ma le fefe. Sa ia aoaoina mataupu faavae o le talalelei “lea na fesoasoani ia te a’u e tauave ai le tiutetauave e avea ai ma tagata ou te manao i ai i le lumanai.” Ma sa avea o ia ma se “tagata ta’imua,” i le faia o ni uo i le olaga atoa, fesoasoani i isi, ma maua le to’a.
Ina ua maea le EnglishConnect, sa faaauau pea Haustia i le BYU–Pathway Worldwide, lea sa ia faamaeaina ai kosi faavae (e ta’ua o le PathwayConnect) ona sosoo ai lea ma se faailoga o le tagata malaga i luga o le initoneti i le soifua maloloina mai le Iunivesite o Brigham Young-Idaho. Sa ia fai mai o lona a’otauina ua tatala ai faitotoa i le tele o avanoa faigaluega. O le taimi nei o loo galue o ia i le soifua maloloina e fesootai ma lagolagoina tagata.
“Pe a tatou aoaoina le faa-Peretania ma aoao e uiga i le talalelei i le taimi lava e tasi, e fesoasoani mai le Tama Faalelagi ia i tatou e ala i le tuuina mai ia i tatou o faaaliga e aoao ai,” o lana tala lea. “Ou te ta’u atu i tamaiti aoga fou, ‘Aua le fiu i au miti. Talisapaia lenei avanoa ofoofogia e suesue ai e ala i le EnglishConnect ma le BYU–Pathway Worldwide. O le a aumaia ai ia te oe ni avanoa tāua e ausia ai au sini faaleaoaoga ma faaleagaga.”’
O Le A Saunia e le Atua le Ala
Mo Fu Pak Wai, o se manatu na fuga mai i se pisinisi na taliina ai se tatalo.
Fai mai Fu Pak Wai, “E lē mafai ona tatou vaaia mea uma o i o tatou luma atu. E na ona tatou agai lava i luma i lea laasaga ma lea laasaga.”
Mo le tele o tausaga, sa faigaluega ai Fu Pak Wai i ata komi faakomepiuta i Hong Kong. Sa fiafia o ia i le galuega, ae sa manaomia ai le tele o le taimi.
“O taimi ou te foi mai ai i le fale mai le galuega i afiafi taitasi,” na ia fai mai ai, “ua moe lo’u atalii.”
A o ia mafaufau e uiga i lona aiga ma le lumanai, sa auai Uso Fu i se tasi o vaega o le ola tutoatasi “Amataina ma le Faaolaina o La’u Pisinisi”. Mo le 12 vaiaso, na talanoaina ai e tagata o le vaega le auala e amata ai, tuputupu a’e, tupe, ma faaleleia se pisinisi. Sa latou talanoa foi e uiga i le auala e saili ma faatumauina ai tagata faatau.
I le faaauupegaina ai i se malamalama fou, sa maua ai e Uso Fu se manatu, lea na fuga mai i se pisinisi na taliina ai se tatalo.
I ona taimi avanoa, na amata ai ona faatau atu e Brother Fu ni mea e faaaoga i uila vilivae ma uila vilivae ua faaaoga i luga o le initoneti. Ona ia aveina lea o kosi i le initoneti e aoao ai pe faapefea ona lipea uila vilivae. Mulimuli ane, sa ia maua ai se tamai fale e mautotogi ai e ofi ai se faleoloa o uila.
“Sa i ai pea la’u galuega tumau a o o’u faatauina atu ni mea e faaaoga i uila vilivae ma le faaleleia o uila o se galuega faavaitaimi,” o lana tala lea. “Ina ua uma ona faia lena mea mo se tausaga, sa ou faamavae mai la’u galuega tumau.”
O lenei ua tele atu le taimi o Uso Fu mo lona aiga.
“O se tali i tatalo,” o lana tala lea. “Ma o lenei ua ou vaai i lo’u atalii i le taeao ae le’i alu o ia i le aoga ma i le aoauli pe a tuua le aoga. O se mea sili lea.”
O le amataina o lana lava pisinisi ua tuuina atu ai foi ia te ia le tele o le taimi e auauna atu ai i lona nuu ma le malo o le Atua, i le faia o le galuega faafaifeautalai ma fesoasoani i isi ia ola tutoatasi.
“A o o’u atiina a’e la’u pisinisi,” na manatua ai e Brother Fu, “sa ou atiina a’e foi se molimau malosi atu o le tausia o le paia o le aso Sapati ma ola i le tulafono o le sefuluai. Ou te lē iloa pe o le a faapefea ona lelei mea uma. E lē mafai ona tatou vaaia mea uma o i o tatou luma atu. Tau lava o lo tatou agai i luma i lea laasaga ma lea laasaga, ma o le a saunia e le Atua le ala.”