“O Lo Matou Tuaoi Lelei,” Liahona, Ape. 2023.
O Leo o le Au Paia o Aso e Gata Ai
O Lo Matou Tuaoi Lelei
O le aso na ou manaomia ai le fesoasoani, sa tali atu ai Elder Russell M. Nelson i se uunaiga ma sau e fesoasoani mai.
Ata na tusia e Dilleen Marsh
Ina ua matou siitia atu ma lo’u aiga faatasi ma lo’u tinā faaletulafono ua oti lana tane, o Effie Dean Rich, o se tasi o matou tuaoi o Elder Russell M. Nelson, lea na valaauina i le Korama a Aposetolo e Toasefululua i ni nai tausaga na muamua atu.
I le taimi sa avea ai i matou ma tuaoi, sa matou fiafia e fesoasoani ia Elder Nelson ma lona faletua muamua, o Dantzel, i a la galuega faatino, ma sa la fiafia e fesoasoani mai i a matou galuega. O lena mea na aofia ai le liliuina o se ālia i lo matou tuāfale i se nofoaga matagofie ma ni puipui mautu, ala savali felavasa’i, faasitepu, ma le togalaau. Pe a toesea Elder Nelson i se tofiga o le Ekalesia, matou te fesoasoani ia Sister Nelson i soo se mea sa ia manaomia.
Ina ua uma le galuega faatino o le ālia, sa talosagaina e lo’u tei ma lona toalua le la ’aiga o le faaipoipoga e faia i le ālia ma le togalaau. Sa la fuafua e o mai ma fesoasoani i le faamamaina mulimuli a o le’i faia le ‘aiga.
Ae na mou ese atu le taimi. Sa pisi i la’ua ma sa lē mafai ona o mai. O le aso o le faletatala, sa ou ala a’e ai i le 6:00 i le taeao ma lagona le lē fiafia. Sa ou tu i luga, uu la’u pakete ma kilipa, ma savali i le pito i lalo o faasitepu e 58 o le ālia. A o o’u faasolo atu i luga o faasitepu o loo teuina le laau sosolo (English ivy), sa toafilemu o’u lagona. Pe tusa o le 8:00 i le taeao, sa ou faalogoina se moavao i le pito i luma o le fanua. Sa ou malolo e vaai po o le a le mea na tupu.
Ina ua ou taunuu atu i le pito i luma o le fanua, sa moaina e Elder Nelson lo’u fanua ina ua uma ona moa lona fanua.
“E lē manaomia ona e faia lena mea,” sa ou fai atu ai.
“Ioe, Grant,” na ia tali mai ai, “E tatau ona ou faia lenei mea mo oe i le asō.”
Sa silafia e Elder Nelson le auala e faalogo ai i le Tama Faalelagi. I lena aso, sa silafia e le Atua sa ou manaomia se fesoasoani.
Na suia a’u e lena aafiaga. Mulimuli ane, ina ua ma tatalo ma lo’u toalua i aso taitasi, sa amata ona ma talosagaina ia iloa i latou o siomia i ma’ua o ē sa manaomia la ma fesoasoani.
I tausaga na muamua atu, i se vaitau ese, sa alu atu ai lo’u tamā faaletulafono, o John P. Rich, e asu ese le kiona mai lana auala savali. Peitai, sa muamua i ai Elder Nelson i lena mea. Sa toe foi John i totonu ma tusia le solo lenei:
Ua ou vaai i lauga i maa
Ma lauga i fugalaau
Lauga e alu ai minute
Lauga e alu ai itula
Ae faatoa ou vaai lava i se lauga
Ua tuuina atu i galuega
Lea ua faaali atoatoa mai ai ia te a’u
Le auala e avea ai ma se tuaoi lelei
E oo mai i le asō, o loo tumau pea lo ma lotofaafetai mo lo matou tuaoi lelei.