“E Faapefea Ona Tatou Faaalia le Alofa Mutimutivale e pei o le Faaola?,” Liahona, Ape. 2023.
Sau, Mulimuli Mai ia te A’u
E Faapefea Ona Tatou Faaalia le Alofa Mutimutivale e pei o le Faaola?
O Le Tamaitai Na Molia i le Mulilua, saunia e Harry Anderson, laiseneina mai le GoodSalt.com
Ina ua aumaia e le au tusiupu ma le au Faresaio iā Iesu Keriso se tamaitai sa maua o mulilua, sa latou fesili pe tatau ona fetogi o ia i maa e tusa ai ma le tulafono a Mose. Ae na faaalia e Iesu lona alofa mutimutivale ia te ia i le faapea atu, “Ou te le faasala foi ia te oe; alu ia oe, aua e te toe agasala” (Ioane 8:11). E le’i tausalaina o ia e Iesu, Na te le’i taliaina foi ana gaoioiga. E pei o Ia, e mafai ona tatou faaalia le agaalofa a o tutū atu mo ō tatou talitonuga.
O nisi nei o mataupu faavae e mafai ona aoao mai e le faataitaiga a Keriso ia i tatou e uiga i le ala e taulima ai tagata o e faia filifiliga tatou te lē ioe i ai:
-
Tatou te lē tau tali vave atu (tagai Ioane 8:6). O le faaalu o se taimi e mafaufau ai i a tatou tali e mafai ona fesoasoani ia i tatou e faailoa atili atu ai o tatou manatu ma le agaalofa.
-
Sa faatali Iesu seia o ese ē na molia o ia ona faatoa Ia aoao atu lea o le tamaitai (tagai Ioane 8:9). E lē manaomia ona faia se faatinoga e faamatagā pe faamaasiasi ai isi.
-
E ao ona tatou tuu atu i tagata se taimi e sui ai. Na saunoa mai Peresitene Dallin H. Oaks, Fesoasoani Muamua i le Au Peresitene Sili, “O le fafine na molia i le mulilua sa tuuina atu i ai le taimi e salamo ai, o le taimi semanu e teena e i latou o ē na mananao e fetogi o ia.”1
-
Aoao atu le upumoni ae faataga isi e filifili. “Nai lo le tausalaina o isi, e tatau ona na ona tatou folafola atu mea ua tatou iloa ma mea ua tatou talitonu i ai ma valaaulia isi e mulimuli i le Faaola. O lo latou avanoa lea e filifili ai le upumoni, ae lē o tatou e faamalosia.”2