Savali o le Eseta a le Au Peresitene Sili

O Iesu Keriso, le Alo Pele e Toatasi o lo tatou Tama alofa, o “le toetu, ma le ola.” O Lona soifua mai, soifuaga, ma le oti na aumaia ai le folafolaga e faapea “o lē faatuatua mai ia te au, e ui lava ina oti, a e ola lava ia” (Ioane 11:25). I lenei vaitau o le Eseta, matou te valaaulia ai tagata uma ia mafaufau loloto i lenei folafolaga mamalu. Ona sa Ia motusiaina noataga o le oti, ua tofu maua ai e i tatou taitoatasi le faamautinoaga o le tino ola pea ma le faamoemoe o le ola e faavavau.

O le taulaga togiola maoae a le Faaola e mafai ona tatou maua ai le faamoemoe mo le olioli ma le filemu e le gata i le olaga a sau ae faapea foi i iinei ma le taimi nei a o tatou feagai ma luitau e le maalofia o le olaga. Ona o Ia, ua tatou iloa ai o le oti e le o le mutaaga lea. Ua tatou iloa o o tatou puapuaga e lē tumau e faavavau. Tatou te maua le filemu pe a tatou tuu atu lo tatou faatuatuaga ia te Ia. Ua ia i tatou le faatuatua e mafai ona maua le olioli e faavavau.

Matou te molimau atu o Iesu Keriso, lo tatou Faaola ma le Togiola, o loo soifua! “Sa Ia fai le ala ma taitai mai” e toe foi atu ai i lo tatou Tama Faalelagi (“Maeu le Poto ma le Alofa,” Viiga, nu. 109). E maeu lo tatou lotofaafetai mo le meaalofa o Lona Alo, lea e mafai ai ona tatou agavaa mo Lana meaalofa silisili—o le ola e faavavau.

O Le Au Peresitene Sili