Faatuatua ia Iesu Keriso

O le faatuatua ia Iesu Keriso o le uluai mataupu faavae lea o le talalelei (tagai Mataupu Faavae o le Faatuatua 1:4). O le a fesoasoani lo tatou faatuatua ia i tatou e faia filifiliga o le a taitai atu ai i tatou e toe foi atu i lo tatou Tama Faalelagi. E mafai ona tatou galulue e faamalosia lo tatou faatuatua i o tatou olaga atoa.

O Le A Le Faatuatua?

O le faatuatua o se talitonuga mausali po o le faalagolago i se mea. O le i ai o le faatuatua e aofia ai le faamoemoe ma le talitonu i mea e moni, e tusa lava pe lē mafai ona tatou vaai i ai pe malamalama atoatoa i ai (tagai Eperu 11:1; Alema 32:21).

Faamatalaga mai le Keriso ma le Taulealea Mauoa, saunia e Heinrich Hofmann

O le Faatuatua e Faatotonugalemu ia Iesu Keriso

Ina ia taitai atu i le faaolataga, e tatau ona faatotonugalemuina lo tatou faatuatua ia Iesu Keriso o lo tatou Faaola ma le Togiola. O le i ai o le faatuatua ia Keriso o lona uiga o le i ai o le talitonu ia te Ia. O lona uiga o le faalagolago atoa atu ia te Ia—o le faamoemoe i Lona mana, atamai, ma le alofa. E aofia ai foi le talitonu ma le mulimuli i Ana aoaoga.

Faateleina o lo Tatou Faatuatua

O le faatuatua o se meaalofa mai le Atua, ae e tatau ona tatou sailia ma galulue ia faatumauina le malosi. E mafai ona faateleina lo tatou faatuatua e ala i le tatalo ma le suesueina o tusitusiga paia ma aoaoga a perofeta o aso e gata ai. Tatou te faamalosia foi lo tatou faatuatua a o tatou ola amiotonu ma tausia a tatou feagaiga.

Ola i le Faatuatua

O le faatuatua e matuā sili atu nai lo na o le talitonu. E aofia ai le faatinoina o lena talitonuga. Tatou te faaalia lo tatou faatuatua i le auala tatou te ola ai. O le faatuatua ia Iesu Keriso e faaosofia ai i tatou e mulimuli i Lana faataitaiga atoatoa. O lo tatou faatuatua e taitai atu ai i tatou e usitai i poloaiga, salamo i a tatou agasala, ma osia ma tausia feagaiga.

E Mafai e le Faatuatua ona Taitai Atu i Vavega

O le faatuatua moni e aumaia vavega, lea e aofia ai faaaliga vaaia, miti, faamalologa, ma isi meaalofa e oo mai le Atua. O loo i ai i tusitusiga paia le tele o tala e uiga i tagata o e na mauaina vavega mai le Alii ona o lo latou faatuatua ia te Ia. Tagai i le “Vavega” i le Taiala i Tusitusiga Paia mo nisi o faataitaiga.

E Mafai e le Faatuatua ona Aumaia le Filemu

O le i ai o le faatuatua i le Atua ma Lana fuafuaga o le faaolataga e mafai ona faamalosia ai i tatou i taimi o ō tatou luitau. E mafai e le faatuatua ona aumaia ia i tatou le malosi e fetaomi ai i luma ma faafetaia’ia o tatou faigata ma le lototele. E tusa lava pe foliga lē mautonu le lumanai, o lo tatou faatuatua i le Faaola e mafai ona aumaia ia i tatou le filemu.

O le Faatuatua ia Iesu Keriso e Taitai Atu ai i le Faaolataga

O le faatinoina o le faatuatua ia Keriso o le a taitai atu ai i lo tatou faaolataga. Ua saunia e Keriso le ala mo i tatou e maua ai le ola e faavavau. A o tatou ola i lo tatou faatuatua ia te Ia, e mafai ona faamagaloina i tatou i a tatou agasala ma toe foi atu e toe mau faatasi ma le Atua.