Sa Liua Lo’u Tiga i le Lotofaafetai

Saunia e Bobby Marion, Penisilevania, ISA

I le atuatuvale ma le lototiga tele, sa ou tagi atu ai i le Alii. I Lona alofa mutimutivale, sa Ia tali mai ai.

Ia Setema 2021, na maliu ai lo ma atalii laitiiti, o Joey, ina ua mavae ai pe na o le lua masina na ola ai. E ui lava i tatalo, anapogi, faamanuiaga faaperisitua, ma taumafaiga maoae a nisi o fomai sili ona lelei i le lalolagi, ae sa lē malosi lona tino ina ia ola.

I toe taimi o le ola o Joey, sa ma siiina ma lo’u toalua o ia. A o o’u vaavaai atu ia te ia o to lana manava mulimuli, na nutimomoia mea uma i totonu ia te a’u. I le atuatuvale ma le lototiga tele, sa ou tagi atu ai i le Alii. I Lona alofa mutimutivale, sa Ia tali mai ai.

Na vave lava ona suia lo’u tiga i se lagona malosi o le lotofaafetai lea e faigata ia te a’u ona faamatala i upu. Sa ou lagonaina le lofituina i le faafetai ona sa tuuina mai e le Alii ia te a’u se avā lalelei, se fanau aulelei e toafa, ma ni feagaiga na fusia ai i latou ia te a’u e faavavau. Sa ou lagona le pei o Alema le Itiiti ina ua ia lagonaina le olioli e pei o le matagofie o le tiga sa ia lagonaina muamua (tagai Alema 36:20).

A o o’u maofa i le lotofaafetai i le Alii, sa ou maua se uunaiga loloto faaleagaga. O le tiga sa ou lagonaina mo le maliu o lo’u atalii na fesoasoani ou te talisapaia ai le tiga atonu na lagonaina e le Tama Faalelagi ina ua maliu Lona Alo mo a’u, ma mo le fanau uma a le Atua, i le lua afe tausaga talu ai. Ona na maliu Iesu Keriso mo i tatou, ou te iloa o le a ou toe vaai i lo’u atalii.

I sina auala itiiti, sa ou malamalama atili ai i le taulaga na faia e le Tama Faalelagi ma Lona Alo. Sa ou toe lagonaina foi le faafetai mo le alofa loloto o le Atua.

I le taimi ua mavae atu talu mai le maliu o le ma atalii, sa masani ona ou mafaufau i mea sa ou lagonaina i lena aso. O le tiga, le lotofaafetai, ma uunaiga mamana faaleagaga ua suia ai a’u e faavavau. E mafai ona ou molimau moni atu o tofotofoga o le olaga tatou te maua ai le poto masani ma o le a mo lo tatou lelei (tagai Mataupu Faavae ma Feagaiga 122:7) pe afai tatou te faatagaina le Alii ina ia aofia ai i o tatou olaga ma taofimau i lo tatou faatuatua i le Faaola ma Lana Togiola.