“E Mafai Faapefea Ona Ou Talitonu i Mea Ou te Le’i Vaai Lava I Ai?,” Liahona, Ape. 2023.
Autalavou Matutua
E Mafai Faapefea Ona Ou Talitonu i Mea Ou te Le’i Vaai Lava I Ai?
E tusa lava pe foliga mai e le mavaaia le talalelei, e mafai lava ona tatou filifili ia maua pea le faatuatua.
“Ou te lē malamalama pe mafai faapefea ona e talitonu i mea e te le’i vaai lava i ai. Ou te lē iloa pe faapefea ona maua lena ituaiga faatuatua.”
Sa ou te’i i le faamatalaga a lo’u tuagane. E lelei le ma sootaga, ma sa ia faailoa mai ia te a’u nisi o luitau sa feagai ma ia. Sa le’i toaga o ia i le Lotu mo le tele o tausaga, o lea sa ou faasoa atu ai o’u manaoga mo ia ia talitonu i se mea—soo se mea, e moni lava—e faatatau i se Tama Faalelagi alofa ma se faamoemoega maualuga atu mo le olaga faaletino.
Ae o ana upu na mafua ai ona ou tomanatu: Aisea ou te talitonu ai ia Keriso ma mea uma e uiga i le talalelei ae o le tele o mea e lē vaaia?
O Le Faatuatua o le Mana Silisili Lea
O loo faaauau pea ona uuna’ia i tatou e Peresitene Russell M. Nelson ina ia faaloloto lo tatou faatuatua, ina ia mafai ona tatou tetee atu i osofaiga a le fili i aso a sau. Ou te iloa e tāua le mafai ona ia filifili e aoao i tatou e uiga i soo se mea e faatatau i le talalelei, ae o loo ia aoao mai pea lava pea e uiga i le faavae autu o le talalelei—faatuatua—e ala i le uuna’ia o i tatou e faamalosia o tatou faavae faaleagaga,1 faatumauina le mausali faaleagaga,2 ma faatino le faatuatua lea o le a aveesea ai mauga.3
O le faatuatua o le tali mamana tele lea i fesili e uiga i le talalelei. E tusa ai ma Alema, o se “fia talitonu” (Alema 32:27) o le amataga faigofie lea i le talalelei atoa a Iesu Keriso, ae o le faatuatua e mafai ona avea “ma mana silisili lea ua avanoa ia i tatou i lenei olaga”4 mo le sailia o tali ma le taofimau i le faamoemoe.
Ata na tusia e Emily Jones
Vaaia pe Lē Vaaia, O Le Faatuatua o se Filifiliga
A o o’u suesueina le Feagaiga Tuai i le tausaga ua te’a, sa i ai ni o’u malamalamaaga e uiga i le faatumauina o le faatuatua. Na ou faitau e uiga i tagata Isaraelu o ē na faasaolotoina e le Atua mai le nofo pologa i Aikupito, ma sa ou taumānatu po o le ā se lagona o le a oo i le molimauina o vavega matautia, toetoe lava a lē talitonuina, na latou vaaia i le taimi o ō latou olaga.
Ae sa oo ina ou lē fiafia a o o’u vaavaai atu i lo latou faatuatua o agai atu i faigata—latou te vaai i vavega ma vivii atu i le Atua, ona leai lea o le faatuatua ma muimui ia te Ia pe a latou feagai ma tofotofoga po o faigata. Sa faasaolotoina i latou e le Alii mai Aikupito, vaeluaina le Sami Ulaula mo i latou e ui atu ai i le laueleele matutu, ma afua ai ona faatotōina ifo “mea e ‘ai mai le lagi” (Esoto 16:4) (e pei o se tagata e fiafia i falaoa, e tau le mafai ona ou mafaufauina!), ma e ui lava i nei mea uma, sa fai mai ma le lē faatuatua le fanauga a Isaraelu, “Se a ea le mea na oulua aveina ae ai i matou mai Aikupito e oti ai i le vao?” (Numera 21:5).
I le taimi muamua, sa ou maofa i a latou tali. E mafai faapefea ona latou masalosalo i le Atua ma matua’i lē lotofaafetai i mea uma sa Ia faia mo i latou?
“Ana faapea ou te molimauina na ituaiga o vavega, o le a ou le masalosalo lava i lo’u faatuatua pe toe fesiligia le Tama Faalelagi!” Sa ou mafaufau ai. Ae a o o’u mafaufau loloto, sa ou iloa ai ua ta’usalaina foi a’u i lenei lava faatuatua papa’u.
Pe a feagai ma luitau, o nisi taimi ou te fesiligia ai pe o faatasi moni lava le Tama Faalelagi ma a’u, e ui ina sa Ia faailoa mai Lona faatasi mai i le tele o taimi muamua. Ou te manatua taimi na i ai ni au fesili e uiga i le talalelei po o taimi na ou lagonaina ai le faagaloina o a’u ona o lo’u usiusitai sa le’i taofia ai le lē tonu po o le lē oo mai o vavega i le vave na ou manao ai.
Ae ua ou aoaoina o le ki i le faatumauina o lo’u faatuatua i nei taimi o le fesiligia e lē o le faatalitali mo le areto e pa’ū mai le lagi ae na o le faia o se filifiliga:
O le filifiliga e talitonu.
Faia o le Filifiliga e Talitonu
O le a uunaia i tatou e le lalolagi ia maua le faamaoniga po o le tauamiotonuina mo o tatou masalosaloga po o fesili mai se sailiga faatopetope o le Google pe ala foi i e masani ai. Ae o le faatinoina o le faatuatua ma le valaauliaina o le Agaga e taiala i tatou ua na o le pau lea o le auala e maua ai upumoni mamā a’ia’i.
Pe a ou feagai ma le filifiliga e talitonu pe leai, ou te sailia le Agaga tusa lava pe faigata; ou te manatua taimi na ou lagonaina ai le musumusuina malosi o a’u e le Agaga Paia i le upumoni; ou te mafaufau loloto i mea ua iloa e lo’u agaga ua moni; ou te mafaufau ina ua ou lagonaina le alofa atoatoa o le Tama Faalelagi; ma ou te taulai atu i le alofa mutimutivale ma vavega i aso uma ua ou vaai i ai i lo’u olaga, e pei o le gafatia e lagona ai le filemu i le lotolotoi o tauiviga po o le olioli o le salamo e ala ia Keriso.
Ou te iloa e moni le talalelei a Iesu Keriso aua e faaali mai pea e le Agaga lena upumoni ia te a’u pe a ou faia lena filifiliga e saili atu ia te Ia nai lo le vaavaai i se isi mea mo tali—pe a ou manao ma filifili e talitonu.
E mautinoa lava, o le a faigofie ona maua le faatuatua i le Tama Faalelagi pe a uma ona molimauina vavega, ae o vavega e lē maua ai le faatuatua—o le faatinoina o le faatuatua o le mea lea e valaaulia ai vavega (tagai Mataio 17:20). O le faatuatua e lē o se mataupu o le vaai ma talitonu—ae o se mataupu o le filifili e talitonu ae e te le’i malamalama atoatoa, saili upumoni ma le loto, ma faafaileleina talitonuga i le amiotonu (tagai Alema 32:40–43).
E Faamanuiaina i Tatou Pe A Tatou Talitonu
O le toe foi atu i le talanoaga ma lo’u tuagane, ou te le’i iloa pe i ai se mea e mafai ona ou fai atu ai o le a faatalitonuina ai o ia i upumoni e pele i lo’u loto. Ae na faafuasei lava, ona faamanatu mai ia te a’u le tala i le Aposetolo o Toma. O lea sa ou faasoa atu ai ia te ia.
Sa faamaoni Toma i le Faaola i le taimi o Lana galuega ae sa lē talitonu ua toetu mai lona Matai seia oo ina ia vaai faafesagai ia te Ia. Ina ua ia tagotago i tulaga o fao i Ona aao, sa i’u ina talitonu o ia, ma sa fetalai atu le Faaola ia te ia, “Toma e, ua e talitonu, aua ua e vaai mai ia te au: amuia o e le vaai mai, a e talitonu mai pea” (Ioane 20:29; ua faaopoopo le faamamafa).
Ona ou tuuina atu lea o la’u molimau: “Ua ou faatoilaloina le tele naua o luitau i lo’u olaga o le lē talitonu i se Tama Faalelagi e alofa ia te a’u ma se Faaola o lē na fesoasoani ia te a’u e maua le olioli ma le filemu e ala i na mea uma. Atonu ou te lē vaai patino ia i La’ua, ae ou te vaai ia i La’ua i le tele o tulaga lelei i le lalolagi. E faigata le olaga, ae o le faatuatua ia i La’ua e faamanatu mai ai ia te a’u po o ai a’u ma po o le a foi lo’u faamoemoega, ma ou te manatua ai faamanuiaga ua La folafola mai ia te a’u. O taimi uma lava ou te filifili ai ia maua le faatuatua, ou te lagonaina i lo’u loto o loo Faatasi i La’ua ma a’u, ma e moni le talalelei.”
Na lelei le faaiuga o le ma talanoaga. Ou te lē iloa pe o le a ia filifili e toe foi mai i le talalelei i se taimi lata mai, ae sa ou valaauliaina o ia ia tau lava o le amata i se manao ia talitonu.
E lē faigofie i lenei lalolagi ona maua pea le faatuatua. O le mea moni, o nisi taimi atonu tatou te lagona ai ua le aogā a tatou taumafaiga e faamaoni pe a tatou feagai ma luitau pe lagona foi ua tapunia le lagi ia i tatou. Ae o le tuputupu a’e ma le faatumauina o lo tatou faatuatua o se faagasologa faamama lea e manaomia ai le faamoemoe i le Faaola, faalagolago i le Tama Faalelagi, ma faatinoga i la tatou vaega. Ma o le faaauau pea o le filifilia o le faatuatua e mafai ona aumaia ai le taunuuga lea na faamatalaina e Elder L. Whitney Clayton, a’o avea ma se tasi o le Au Peresitene o Fitugafulu: “I le āluga o aso o le a e iloa ai sa e faia le filifiliga sili sa mafai ona e faia. O lau faaiuga lototele e talitonu ia te Ia o le a lē mafuatiaina ona faamanuia ai oe ma e faavavau.”5
Pe a ou filifili e talitonu, aemaise lava pe a mafai ona ou filifili ma le malamalama e lē faia, ou te maua faamanuiaga, oo i vavega, ma lagona le olioli loloto e pei ona folafola mai e le Faaola ma le perofeta. Ma o nisi taimi, e ui lava i luitau ou te feagai ai ma fesili e le’i taliina atonu o ia te a’u, o le vavega aupito sili i lo’u olaga o le, pe a ou filifilia le faatuatua ia Iesu Keriso, ou te vaai ia te Ia. Ou te iloa Lona aao, Lona mana, ma Lona malamalama i lo’u olaga.
Ou te iloa e mafai foi ona e faia faapea.