Faifeau Faamisiona Auauna Atu o loo Fausiaina le Ekalesia

Saunia e Matthew C. Godfrey ma John Heath

Matagaluega o Talafaasolopito a le Ekalesia

O le auala na fesoasoani ai faifeautalai auauna atu i le talafaasolopito atoa o le Ekalesia e faasoa atu le talalelei.

Ina ua faamaeaina e Elder Nathaniel Johnson lana misiona talai, sa ia tomanatu i le lua tausaga na muamua atu—le galuega sa ia faia, o tagata sa ia faamanuiaina, ma le ala na ia tuputupu ae ai. Sa tofia o ia e auauna atu i se tasi o faleteuoloa e 124 a epikopo sa faagaoioia e le Ekalesia i le lalolagi atoa. Sa ia lauina i lalo uta a loli, faatutumu fata [i oloa], ma faamama le faleteuoloa.

Mo ia, o aafiaga aupito sili ona anoa o le fesoasoani lea i tagata e faatumu ia oka mo meaai ma oloa e matuai manaomia lava. Sa ia fai mai, “Sa ou aumaia lava le malamalama o Keriso i olaga o isi tagata ina ia mafai ai ona latou iloa o i latou o se vaega o le fuafuaga a le Tama Faalelagi.”

I aso pisi i le taimi o le faama’i pipisi o le KOVITI-19, sa laina ai tagata faataamilo i le pitonuu ma sa tatalaina le faleteuoloa mo le 10 itula i le aso. “Sa ou aoaoina a faatasi le Alii ma i tatou, o le a mafai ona tatou faia soo se mea ma sao mai ma soo se luitau,”¹ o lana tala lea.

O loo faaauau pea e Elder Johnson se tu masani umi o faifeautalai ua valaauina e atinaae le Ekalesia i auala e ese mai le talaiga. Talu mai aso popofou o le Ekalesia, ua valaauina faifeautalai e galulue i maina, vali ata tetele i malumalu, ao mai gafa, fausia aoga ma fale o le Ekalesia, ma tuuina atu auaunaga faaleuelefea ma fesoasoaniga alofa. O a latou galuega e faatelevave ai le galuega a le Ekalesia ina ia siitia ma faamanuia ai fanau a le Atua i le atamai, faaleagafesootai, ma le faaletino, faapea foi ma le faaleagaga. I le faagasologa, e faamalolosia ai foi molimau a faifeautalai, ma latou te maua ai tomai ma aafiaga e tumau ai i le olaga atoa.

Uluai Taumafaiga

O Iosefa Samita ma isi taitai o le Ekalesia sa auauna atu i nisi taimi i ni misiona mo ni faamoemoega e ese mai le talaiga. I le aso 24 Fepuari, 1834, mo se faataitaiga, na maua ai e Iosefa Samita se faaaliga na faatonuina ai o ia ma isi e toafitu e “faapotopoto” faatasi “le malosi o le fale [o le Alii]” e laveai ai Siona (Mataupu Faavae ma Feagaiga 103:22). Sa poloaiina i latou e malaga atu i “faapotopotoga i itu-laueleele i sasa’e” ma folafola atu le manaomia o tagata ma tupe e faataunuu ai le togiolaina o Siona (Mataupu Faavae ma Feagaiga 103:29–40). Sa faatonuina foi Orson Hyde e talosagaina ni foai e mafai ona faaaoga e le Ekalesia e faatau ai fanua i Misuri ma totogi ai se aitalafu na faia mo le Malumalu o Katelani.²

Ina ua avea Polika Iaga ma Peresitene o le Ekalesia, sa ia valaauina tagata taitoatasi i misiona ma ni faamoemoega e sili atu ona faaletino, i le iloaina e oo lava i galuega faaletino e i ai faamoemoega faaleagaga. I le 1856, sa ia tofia ai faifeautalai e malaga atu i le eria o Las Vegas e taumafai e eli metala [lead]. O isi na valaauina e maina ma faaliusuavaia le uamea.³ O nei ituaiga o misiona faaletino sa fai si taatele i le seneturi lona sefuluiva.

Faifeautalai o Faatufugaga

I le faaiuga o le seneturi lona sefuluiva, sa auina atu ai e le Ekalesia ni tufuga filifilia e aotauina i Pale, Farani, ina ia mafai ona latou valiina ata tetele i le Malumalu o Sate Leki. O John Hafen, John B. Fairbanks, ma Lorus Pratt sa valaauina ma vaetofia i le 1890 e patino lava o ni “faifeautalai o faatufugaga.” Sa latou aoaoga i le aoga taualoa oAcadémie Julian i Pale. E pei o faifeautalai uma, sa latou faalagolago i le taitaiga a le Alii ma lagonaina Lona agaga i la latou galuega. Na tusia e John Hafen, “E i ai sa’u molimau o le a mafai e le Alii ona [faia] ia ou faataunuuina mea uma e tatau ai i le tausaga ua atofaina ou te nofo ai iinei.”⁴ E tusa ai ma sikola o Martha Elizabeth Bradley ma Lowell M. Durham Jr., o nei faifeautalai o faatufugaga sa “tulaga ese. Talu mai lena taimi sa i ai lava se taumafaiga e toe fai le aafiaga, e ui o taunuuga vave o le taumafaiga sa iloga le faamanuiaina.”⁵

Faifeautalai mo Aoaoga

E faaopoopo atu i le faatupeina o tagata taitoatasi o loo sailia le aotauina i faatufugaga, sa valaauina e le Ekalesia tagata taitoatasi ia aotauina i le tulafono, enisinia, ma vailaau faafomai. Sa auina atu e Polika Iaga ia Heber John Richards i le Aai o Niu Ioka i le 1867 e aoao faamasani i le Kolisi Faafomai o le Falemai o Bellevue. Sa faatonuina o ia e auai malosi i le faapotopotoga a le Au Paia i le Aai o Niu Ioka ma ia talai atu le talalelei pe a le o i ai i le vasega. Sa tali atu Romania Pratt i le valaau a Polika Iaga mo nisi fomai tamaitai. A o lei alu o ia e aotau i vailaau faafomai i le Kolisi Faafomai a Tamaitai i Filatelefia, Penisilevania, ISA, sa maua e Romania se faamanuiaga mai ia Peresitene Iaga, o lē sa faatulagaina le lagolago tautupe mo Romania mai le Aualofa.⁶

I le taimi nei, o loo faaauau pea ona lagolagoina e faifeautalai o auaunaga le Ofisa o Aoga a le Ekalesia i matafaioi e pei o tagata tomai faapitoa mo aoaoga ma faiaoga.

Faifeautalai mo Gafa

O le galuega e faatino ai sauniga sui mo tuaa ua maliliu i malumalu na fatuina ai se manaoga taua mo faamatalaga o gafa. E toatele na volenitia e malaga i nofoaga e teu ai [faamaumauga o gafa] ma nuu moni o augatuaa e ao mai ai. E ui o nei volenitia na auauna atu e aunoa ma ni valaauga aloaia, sa latou faia faatasi ma faamanuiaga o taitai o le Ekalesia. Sa faaauau pea ona auauna atu volenitia i matafaioi tau gafa i le gasologa o le 1900. Na faasolosolo lava ina faateleina le aloaia o la latou auaunaga. E oo atu i le 1979 ua valaauina e le Ekalesia faifeautalai e auauna atu i le laumua i ni tofiga eseese.⁷ O lea, sa se mea masani i le 1981 le valaauina o faifeautalai faamisiona e galulue i le Potutusi o Gafa. O aso nei, e galulue ai faifeautalai i le toetoe lava o vaega uma o le galuega o talafaasolopito o aiga i nofoaga i le salafa o le lalolagi.⁸

Faifeautalai Faufale

I le 1950, sa fauina ai e le Ekalesia le Aoga Maualuga a Liahona i Toga, ae sa le mafai ona lava ni tagata faigaluega tomai e faamaeaina. O le peresitene o le misiona i Toga “na filifili e valaau se vaega o alii talavou Toga i ni misiona faapitoa mo galuega.” Sa fesoasoani nei alii talavou e fau le aoga maualuga, e pei lava o tagata o le Ekalesia i Katelani, Ohaio, ma Navu, Ilinoi, na tuuina atu galuega mo le fausiaina o malumalu. E lei pine ae salalau atu le manatu i isi vaega o le Pasefika ma mulimuli ane ai i nofoaga i le salafa o le lalolagi. Sa “faamanuiaina e le polokalama le tele o paranesi i falesa fou ma matagofie a o tuuina atu ai aoaoga faalegaluega mo le faitau selau o alii talavou.”⁹

E toatele na faaalia le agaga faafetai mo le avanoa e auauna atu ai. Na ta’ua e Boyd Richardson, o le sa auauna atu i se galuega faatino faufale i Ohaio, “Ua ou faamaeaina se misiona talai iinei i le I.S. ma e ala i le [mama] o lena aafiaga, ou te tuua ai la’u molimau o lena lava agaga matagofie e tasi o loo i ai i le Au Faufale o le Ekalesia e pei ona i ai i Alii faifeau talai.” Sa faaauau le faamatalaga a Richardson, “E pei ona faia e se misiona talai [ni aafiaga] i le olaga atoa ma le amio o se Alii faifeautalai, e faapena foi i se misiona faufale.”

Na ta’ua e isi o le polokalama faufale lava ia na fesoasoani e aumai ai tagata i le Ekalesia ma faamalosia ai molimau a tagata ua uma ona papatisoina. Fai mai Don H. Worthen, “E ese le manaia o le vaavaai atu i tagata a o latou pasi ane i aso taitasi ma faalogo i a latou faamatalaga. Latou te fiafia e tutu ma fai mai ni fesili, ona tatou maua lea o lo tatou avanoa e tau atu ai ia i latou e uiga i le talalelei, ma tuu atu a tatou molimau ia i latou.” O James ma Ruth Morse, o loo auauna atu i Egelani, sa i ai ni manatu faapena. “Sa matou matauina le suiga tele na i ai i tagata le toaaga i o latou uiga faaalia i le Ekalesia i le taimi lava e amata ai falesa fou,” na faamalamalama mai ai e le au Morses. “E foliga mai latou te mitamita i le aumaia o tagata e vaai ai i mea o loo faia e [tagata o le Ekalesia] ona oo lea i se taimi e le’i umi, ua galulue foi i latou lava i le galuega faatino ma mo le vaega tele, ona mafai lea ona toe toefaatoaagaina mai i tiute o le Ekalesia.”¹⁰

I le taimi nei, o loo faaauau pea ona lagolagoina e faifeautalai le tausiga o fale i le lalolagi atoa i ni auala eseese e faalagolago lea i manaoga i le lotoifale.

Faifeautalai mo Uelefea

E toatele tagata taitoatasi ma ulugalii na auauna atu i misiona o le uelefea faavaomalo ma le lotoifale. O le eseese ma le tele o a latou auaunaga na faatupulaia e oo atu i le kelope, atoa ai ma le tele o manaoga faaletagata. A o latou auauna atu i galuega faatino e aofia ai aoaoga ma fesoasoaniga faatino i le puipuiga o meaai, fesoasoaniga faafomai, suisui, galuega faatino o vai mama, ma le faitautusi ma le tusitusi e fesoasoani ai mo e ua i ai manaoga faapitoa, ua mulimuli faifeautalai o le uelefea i le faataitaiga a le Faaola ia tausia i latou e le tagolima. O a latou lipoti ua faaalia ai le maualuga faaleagaga o lenei auaunaga faaletino. O Sister Connie Polve ma lana soa, o tausisoifua uma e auauna atu i misiona o le uelefea i Parakuei, sa togafitia se pepe na mafatia i se mai o se siama ogaoga o le pa’u. Sa ia lipotia mai, “Sa manino lava lo’u lagonaina o le Agaga o le Agaga Paia ua afio ifo i o’u luga ma sa ou iloa ua ou le toe faagaoioia i lalo o la’u lava taitaiga, ae o le mea moni lava o se meafaigaluega moni i le aao o le Alii e faia ai se galuega mo Ia i luga o le fogaeleele.” Na toe manuia le tamaitiiti, ma le aiga—i se tasi taimi “sa o ni tagata ua leiloloa, ma matamuli”—sa susulu mai ai le “malosi ma [le] malamalama o Keriso [i] o latou mata.”¹¹ O le asō, e silia ma le 11,000 faifeautalai e tausia i latou e manaomia le fesoasoani i atunuu e 188.¹²

O Se Galuega Faifai Pea a le Alii

I aso nei, o loo faaauau pea ona faia e faifeautalai auauna atu le galuega a le Alii i ni auala eseese. O na avanoa e mafai ona aofia ai le lagolagoina o manaoga faaleuelefea, fesoasoani i tagata taitoatasi ma aiga i o latou alalafaga, fesoasoani i polokalama ma faagaoioiga a le Ekalesia i le lotoifale, tausia o fale ma fanua, fesoasoani i fesootaiga, fatuina o mea e manaomia e isi, faavasegaina o igoa ma le faia o galuega o talafaasolopito o aiga, faipaaga ma faalapotopotoga agaalofa, ma le tele o isi mea. E masani lava, o nei faifeautalai e mafai foi ona auauna atu i le tele o tofiga i a latou misiona atoa a o latou auai i le galuega a le Alii.

O saofaga a augatupulaga o faifeautalai auauna atu e tutu soosoo tauau ma taumafaiga a faifeautalai talai i le fausiaina o le Ekalesia ma le malo o le Atua. O a latou galuega e fesuisuia’i ma felavasa’i, siitia ma faamanuiaina ai fanau a le Atua i vaega uma o o latou olaga. E maua e faifeautalai faamanuiaga i fuataga tutusa mo lo latou naunautaiga i le mea moni e tasi le galuega: fesoasoani i le Alii o Iesu Keriso i le galuega o le faaolataga ma le faaeaga a o Ia “aumaia le tino ola pea ma le ola faavavau o le tagata” (Mose 1:39).