“Aisea Na Ou Faasinoupuina ai Igoa Sili ona Faigata?,” Liahona, Ape. 2023.
O Leo o le Au Paia o Aso e Gata Ai
Aisea Na Ou Faasinoupuina ai Igoa Sili ona Faigata?
Sa amata ona ou tagi a o o’u malamalama i le tāua e faavavau o le galuega sa ou faia.
Ata pu’e mai faaaloaloga a le tusitala
Ina ua mavae le konafesi aoao i ni nai tausaga ua mavae, sa ma lagonaina ma lo’u toalua, o Yenifer, e tatau ona ma faia ni suiga i lo ma avea ai ma soo. Sa uuna’ia i ma’ua e faia ni mea se tele atu nai lo mea sa ma faia. Sa lē na ona ma manaomia o le suauu i ā ma lamepa—sa ma manaomia nisi suauu se tele.
O se tasi o sini e faatatau i ai sa ou faatuina mo a’u lava ia o le faia lea o nisi auaunaga. Sa ou filifili e fai le galuega o talafaasolopito o aiga, e aofia ai le faasinoupuina o igoa.
Ina ua ou amata, sa vave ona ou iloa o faamaumauga aupito leva, ia e sili ona faigata ona faitau ma malamalama ai, sa sili ona faigata ona faasinoupu. Ae ou te fiafia i luitau, o lea sa ou filifili ai e amata i faamaumauga tuai.
Peitai, e le’i umi, ae ou mafaufau pe aisea ua ou faasinoupuina ai faamaumauga faigata ae e mafai ona ou faasinoupuina nisi vaega o igoa pe a ou faasinoupuina faamaumauga lata mai nei e faigofie ona faitau. A o o’u taumafai e faitau ma malamalama i nisi o faamaumauga o faaipoipoga faigata, sa tigā lo’u ulu.
“Aisea ua ou faia ai faamaumauga sili ona faigata?” Sa ou fesili ifo ai ia te a’u lava ia.
Toetoe lava o le taimi lava lena, sa ou lagonaina ai se leo filemu o faapea mai, “Faafetai lava.”
I ni nai sekone mulimuli ane, sa valaau mai Yenifer ia te a’u i la’u telefoni feaveai e vaai pe o ā mai la’u faasinoupu igoa.
“O le a se mea o loo e faasinoupuina i le taimi nei?” na ia fesili ai.
“O loo o’u faia faamaumauga aupito leva,” sa ou tali atu ai.
“E te iloa o mea aupito faigata na,” o lana tala lea. “Aisea ua e faia ai na mea?”
I lena taimi, sa ou toe maua ai foi se lagona o le lotofaafetai. O tagata sa ou faasinoupuina igoa sa faatalitali mo le silia ma le afe tausaga mo o latou galuega o le malumalu ina ia faia. E pei lava ona ou fiafia auā ua ou mauaina o’u sauniga faaola i le malumalu, latou te mananao foi ia fiafia e ala i le mauaina o ō latou sauniga. O le faasinoupuina o igoa e mafai ai lena mea ona e fesoasoani i tagata e saili mo ō latou tuaa i luga o le initoneti. O le faasinoupuina o igoa o se laasaga muamua lea i le sauniaina o igoa mo le malumalu.
Sa amata ona ou tagi a o o’u malamalama i le tāua e faavavau o le galuega sa ou faia. E toatele tagata ua leva ona faatalitali mo ō latou faamanuiaga o le malumalu. Ou te iloa e tatau ona tatou fesoasoani ia i latou e tusa lava po o le ā le faigata o le galuega.