Aoaoina ma le Au Paia o Aso e Gata Ai
O le mauaina o le malamalama o se gaoioiga paia mo le olaga atoa, e fiafia i ai lo tatou Tama oi le Lagi ma faamemelo i ai Ana auauna.
O le na te osofaia le malo o le malamalama e tatau ona oo atu i ai e pei ona sa sau o Mose i le vao mu; e tu o ia i eleele paia; o le a na maua mea paia,” o le saunoaga lea a Peresitene J. Reuben Clark Jr. (1871–1961), o se sui o le Au Peresitene Sili, i sana saunoaga i le faatautoina o se peresitene fou o le Iunivesite o Polika Iaga. “E tatau ona tatou o mai i lenei sailiga o le upumoni—i itu uma o le malamalama o le tagata po o le a lava, e le gata i le faaaloalo, ae faapea foi ma se agaga tapuai.”1
I le avea ai ma Au Paia o Aso e Gata Ai, tatou te talitonu i le aoaoina, ma o loo i ai sa tatou talitonuga i le auala ma le mafuaaga e tatau ai ona tatou tulitulimatagauina. O o tatou talitonuga faalelotu ua aoao ai i tatou e tatau ona tatou saili ia aoaoina e le Agaga ma o loo i ai sa tatou [tiute] faatausimea e faaaoga o tatou malamalama mo le manuia o tagata.
O La Tatou Sailiga mo le Upumoni
“[O la tatou] ekalesia … o loo uunaia i [tatou] ina ia suesue ma le maelega mo le malamalama,” na aoao mai ai Peresitene Polika Iaga (1801–77). “E leai lava nisi tagata o i ai nei e sili atu ona naunau ia vaai, faalogo, aoao, ma malamalama i le upumoni.”2
O la tatou sailiga mo le upumoni e tatau ona lautele e pei lava o gaoioiga o o tatou olaga ma ia loloto e pei ona faatagaina ai e o tatou tulaga. O se tagata atamai o le Au Paia o Aso e Gata Ai, e tatau ona saili ia malamalama i le taua o faafitauli faalelotu, faaletino, faalevafealoai, ma faaupufai o le aso. O le tele lava o le malamalama tatou te maua i tulafono faalelagi ma mea faalelalolagi, o le tele foi lea o le faatosinaga e mafai ona tatou faia mo le lelei o i latou o loo siomia i tatou, ma o le tatou saogalemu foi lea mai aafiaga faatufanua ma le amioleaga e ono faasese ma faatamaia ai i tatou.
I la tatou sailiga mo le upumoni, e tatau ona tatou sailia le fesoasoani a lo tatou Tama Faalelagi alofa. O Lona Agaga e mafai ona taitaia ma faamalosia ai a tatou taumafaiga e aoao ma faalautele o tatou gafatia e malamalama ai i upumoni. O lenei aoaoina i le Agaga e le faapea e gata ai i potuaoga po o sauniuniga foi mo suega faaleaoaoga. E faatatau i mea uma lava tatou te faia i le olaga ma nofoaga uma tatou te faia ai—i le fale, i le galuega, ma i le lotu.
A o tatou saili ia maua ma faatatau le taitaiga a le Agaga i se lalolagi ua faaosofia i aga ua matele i ai ma mea e tutupu o le aso, e lamatia i tatou e se sologa lofituina o le tele lava o taimi o faamatalaga sese ma le le taua ua aumaia e tekinolosi faaonaponei. Ua lamatia lo tatou avea ma mea e pei ona ta’ua e se tasi tagata o ni “‘tagata panikeke’—e faataape ia mafolafola ma manifinifi a o tatou fesootai ma lena upega tele o faamatalaga lea e mafai ona maua i le na o le oomi o se ki.”3
Ua faapea foi ona osofaia i tatou e tagata e faafoeina talanoaga i luga o le ea, tagata e suesueina aafiaga o televise, mekasini o sitaili, ma tagata e faia faasalalauga, o o latou tulaga le mautonu ma amioga fesiligia e mafai ona faatosinaina ai o tatou manatu ma aafia ai a tatou amioga. Mo se faataitaiga, na saunoa Peresitene Spencer W. Kimball (1895–1985), “E le’i i ai lava se taimi i le lalolagi ua sili ona le mautonu ai [tagata] e uiga i le tiute o [tamaitai ma alii].”4
I le tulaga lenei, o le le mautonu, lotovaivai, po o le le talitonuina e le tagata o ia lava, e mafai ona amata pala ai lo tatou faatuatua ma faaliliueseina ai i tatou mai le Faaola ma mai le fausiaina o Lona malo i luga o le fogaeleele. Afai e taulai atu a tatou filifiliga i faiga matele ma ala o le lalolagi, o le a faapea ona “felafoaiina e pei o peau, ma feaveaiina i matagi uma lava o mataupu, i le pepelo o tagata, i togafiti leaga ua saunia e faasese ai” (Efeso 4:14).
O le le faatosinaina e manatu taatele, ua aoaoina ai e Le Ekalesia a Iesu Keriso o le Au Paia o Aso e Gata Ai mataupu faavae. E matuā maoae lava le eseesega. O faiga ua matele ai, sitaili, ma talitonuga taatele e vave lava ona mou atu ma e na o se taimi puupuu foi e i ai. O mataupu faavae e aoga e fai ma taula o le puipuiga, taitaiga, ma le upumoni. Afai e mausali o tatou tulaga ma taitaiga i aoaoga ma mataupu faavae, e pei o le faatuatua i le Alii o Iesu Keriso ma le mulimuli i le perofeta, o le a tatou maua se taiala faatuatuaina ma le le fesuisuiai mo filifiliga a o tatou olaga.5
E le tatau ona tatou matatau. Na aoao mai Peresitene Henry B. Eyring, Fesoasoani Muamua i le Au Peresitene Sili, e faapea: “Ua silafia e le Alii le mea ua Ia finagalo e te faia ma le mea e tatau ona e iloaina. E agalelei o Ia ma Na te silafia mea uma. O lea, e mafai ona e faamoemoe ma le to’a ua Ia saunia ni avanoa mo oe e te aoao ai e sauniuni ai mo le auaunaga o le a e tuuina atu. O le a e le iloaina atoatoa na avanoa. … Ae a e faamuamuaina mea faaleagaga i lou olaga, o le a faamanuiaina oe ia e lagonaina le taitaiina atu o oe i ni aoaoga faapitoa, ma o le a uunaia foi oe e te galue malosi atu.”6
Agavaa o le Tagata Lava Ia
O a tatou taumafaiga e aoaoina e tatau ona o faatasi ma le agavaa o le tagata lava ia, ina ia mafai ona tatou maua le taitaiga a le Agaga Paia. E tatau ona tatou aloese mai le le mama i feusuaiga, ponokarafi, ma vaisu faapea ma lagona le lelei i isi tagata po o i tatou lava. O le agasala e tuliesea ai le Agaga o le Alii, ma afai e tupu lena mea, e aluese foi le malamalama faapitoa o le Agaga, ma taupulapula ai foi le sulu o le aoaoina.
I faaaliga i onaponei ua tatou maua ai se folafolaga e faapea, afai tatou te manatu tasi i le mamalu o le Atua, lea e aofia ai le agavaa o le tagata lava ia, o le a “faatumuina o [tatou tino] atoatoa i le malamalama, o le a leai foi se pouliuli ia te [i tatou]; o le tino foi ua faatumuina i le malamalama e malamalama i mea uma” (MFF 88:67).
E mafai ona tatou faamaonia lenei mataupu faavae e faavavau e ala i aafiaga patino lata mai nei. Mafaufau i se taimi na e ita, fefinauai, pe tauupu ai. Pe na mafai ona e suesue ma le maelega? Pe na e maua le faamalamalamaina i lena taimi?
O le agasala ma le ita e faapogisaina ai le mafaufau. La te aumaia ai se tulaga e faafeagai ma le malamalama ma le upumoni lea e faauigaina i ai le poto, o le mamalu lea o le Atua (tagai MFF 93:36). O lea la o le salamo, lea e mafai ona faamamaina ai i tatou mai le agasala e ala i le taulaga togiola a Iesu Keriso, o se laasaga taua i le ala o le aoaoina mo i latou uma o e saili i le malamalama ma le upumoni e ala i le mana aoaoina o le Agaga Paia.
O i tatou o ni tagata e le atoatoa, ae e mafai e i tatou taitoatasi ona taumafai ina ia sili ona agavaa mo le mafutaga a le Agaga, lea o le a faapea ona faalauteleina ai o tatou malamalamaaga faaletagata lava ia ma saunia ai i tatou ina ia lelei ona tatou puipuia le upumoni, e tetee atu ai i faaosoosoga masani, ma ia faia ai ni saofaga lelei.
Aoaoga
I a tatou filifiliga faaleaoaoga, e tatau ona tatou saunia e lagolagoina i tatou lava ma i latou o e atonu e faalagolago mai ia i tatou. E alagatatau le i ai o ni o tatou tomai e moomia. O aoaoga e faamalosia mo le saogalemu ma le manuia o le tagata lava ia.
O loo faamoemoe lo tatou Tama Faalelagi tatou te faaaogaina a tatou filifiliga saoloto ma musumusuga e iloilo ai i tatou lava ma o tatou tulaga gafatia ma filifili ai le ala faaleaoaoga e tatau ona tatou mulimuli ai. E faapitoa ona taua lenei tulaga i tagata talavou o e ua maea aoga maualuluga ma auaunaga faamisiona ma o loo feagai nei ma filifiliga e uiga i le faalauteleina o aoaoga ma galuega. Talu ai e fai si eseese o filifiliga e feagai ma alii ma tamaitai, o lea tatou te amata ai i le tagatagai i o tatou aafiaga eseese, ma le talitonuga o o laua aafiaga o aafiaga masani ia o le toatele o le Au Paia o Aso e Gata Ai.
Elder Oaks: E pei o le toatele o alii talavou, o a’u taumafaiga aloaia faaleaoaoga sa matua lofituina, faifaipea, ma na uunaia e le tatau ona faaagavaaina a’u lava ina ia ou tausia ai se aiga. Ina ua uma le kolisi sa faaauau pea ona ou aoga. Sa faatupeina lenei aoga e se galuega faavaitaimi ma ni nonogatupe ae e toe totogiina i siitaga o totogi na maua mai le aoaoina. Na iu ina ou faaipoipo, ma amata ona maua se fanau. O le lagolagosua a se avā ma le tiutetauave o se aiga tuputupu ae, na faaleleia atili ai a’u taumafaiga i le aoga ma ou maua ai se uunaiga malosi ina ia ou faauu ma agai i luma i la’u galuega i le olaga. I le faamaeaina ai o a’u aoaoga aloaia, sa ou tuutoina atu nisi o o’u taimi malolo na maua i le faaauauina o a’u aoaoga i la’u matata faapea ma faitauga faaopoopo lea ua leva ona ou manao i ai i eria o le talafaasolopito o le Ekalesia ma aoaoga faalauaitele.
Sister Oaks: O ala faaleaoaoga ma aafiaga o tamaitai e masani lava ona tele se eseesega mai alii. Sa ou ola ae i se taimi na foliga mai e na o le lua lava filifiliga a se tamaitai e lagolagoina ai i latou—o le faiaoga ma le faatausimai. O lo’u “faafitauli” sa i ai, ou te le’i mafaufau lava i se tasi o na mea. O le tausiga o a’u lava ia i tulaga faaletupe o se mea ou te le’i mafaufauina e mafai pe alagatatau foi. Sa ese lo’u fiafia ou te aoao, ma sa ou iloa galue; o le mea moni; sa ou fiafia e galue. Sa tele ni a’u galuega o le taumafanafana, ma sa lelei a’u taumafaiga i le aoga. Ae ina ua ou malamalama i le mea moni e faapea, e manaomia ona ou lagolagoina atoatoa a’u lava, sa ou fefe, sa toetoe ina a ou le gaoioi, ona o luitau sa le mavaaia ia na foliga mai sa faamalumalu mai i o’u luga. Sa leai ni o’u tomai moni faafaigaluega. O a’u suesuega i mataupu lautele faaleaganuu na tumu ai lo’u agaga, ae o lenei sa manaomia le fafagaina o la’u tusitupe.
Sa ou auai i aoaoga maualuluga atu e aoao ai ni tomai e tausia ai a’u lava. Sa ou fiafia i minute uma o le aoaoina ma le maua ai na le gata i manatu fou ae na ou iloaina ai foi o’u lava tulaga gafatia. O mea sa ou lagonaina ai le matamuli ma le mata’u, ua ou lagonaina ai nei le gafatia ma le finafinau e faafetaiai le olaga na o a’u lava ia.
Fetaulaigaala
Ua tatou iloa e leai se mea e sili ona nunumi ma faaosoita nai lo le leiloaina o le mea e fai i lou lumanai, ae e leai se mea e sili ona patino le tauia nai lo le iloaina o ou lava tomai. Faitau lou faamanuiaga faapeteriaka, mafaufau i ou tomai faalenatura ma taleni, ma ia agai i luma. Laa i le faasitepu muamua, ma o le a faapea ona matala mai ai faitotoa. Mo se faataitaiga, ina ua amata aoaoga a Sister Oaks i tusiga FaaPeretania, sa le’i manatu lava o ia o le a oo atu ai i se fale lomitusi i Boston. Ina ua aoga Elder Oaks i mataupu faatausitusi, na te le’i mafaufauina foi o le a oo atu ai o ia i aoaoga faaletulafono, i le Iunivesite o Polika Iaga, ma sosoo ai ma le Faamasinoga Maualuga a Iuta. Faatasi ai ma le fesoasoani a le Alii, “e galulue faatasi mea uma e lelei ai i [tatou]” (Roma 8:28), ma o aoaoga tatou te maua e oo mai i laasaga e auauai mai, a o fofola mai o tatou olaga i o tatou luma.
E tatau ona tatou filifili ma le faaeteete a tatou aoaoga aua o aoaoga e faavavau lona aogā, ma po o a lava aoaoga aogā po o le poto po o “mataupu faavae o le malamalama” tatou te maua i lenei olaga “o le a tutu mai faatasi ma i tatou i le toetutu” (MFF 130:18).
O se popolega tele ona ua toatele, ae maise lava o tamaitai, latou te masalomia i latou lava ma fesiligia o latou agavaa e manuia ai. I lana saunoaga i tamaitai aoga na suesueina le matematika, faasaienisi, ma le enisinia i a Mati 2005, na saunoa atu ai le peresitene o le IPI o Elder Cecil O. Samuelson Jr. o le Au Fitugafulu e faapea: “Na saunoa mai se tasi o o outou polofesa ia te au … e faapea, o nisi o outou e itiiti lo outou talitonuina o o outou gafatia ma vaaiga i le lumanai nai lo a outou tupulaga tama, e ui lava ina faailoa mai i faamaoniga e le faamaonia lenei mea. E manaomia lo outou iloaina o a outou taleni, tomai, agavaa, ma malosiaga ma ia le faaseseina e uiga i meaalofa ua tuuina mai e le Atua ia te oe.”7
Atonu e maua e tamaitai ni faamatalaga le lelei pe a latou galulue e agai atu i ni matata faafaigaluega. Sa tusi mai mo se fautuaga se tuafafine talavou na silia ma le 20 ma ona tupu ona tausaga, ma sa feagai ma le tausiaina o ia lava. Sa ia faasoa mai e faapea, sa oo atu o ia i se taitai o le ekalesia e uiga i le aoga faaloia, ae sa ia le fautuaina o ia mo lea aoaoga. Tatou te le iloa ona tulaga gafatia po o ona tapulaa; o le fautuaga na ia mauaina atonu na faavae lea i luga o na tulaga po o musumusuga e ese mai i ona tulaga. Ae na mafai ona lagonaina lona naunau i itulau o lana tusi, ma sa manino lava sa tatau ona fautuaina o ia e taumafai ia ausia le atoatoa o lona tulaga gafatia.
Na ta’u atu e Peresitene Thomas S. Monson, i tamaitai o se vaega o lana savali i le taimi o le sauniga aoao a le Aualofa na faia i le aso 29 o Setema e faapea: “Aua tou te tatalo mo ni galuega e fetaui ma o outou tomai, ae tatalo mo ni tomai e fetaui ma a outou galuega. Ona le avea lea o le faatinoga o au galuega ma vavega, a o oe lava o le vavega.”8
Matou te lapatai atu e faapea, faatasi ai ma le tatau ona faamaea aoga ma faatuina se puipuiga i tulaga tautupe, atonu o le a faaosoosoina ai alii po o tamaitai e tuuina atu i le faaipoipoga se faataua maualalo. O se tulaga e faavavau ona le sa’o le tulitulimatagauina o se taumafaiga faalegaluega ma faapea ona le avanoa ai se tagata mo le faaipoipoga, o se mea e faavavau lona aoga, ona e le fetaui ma le taimi o le galuega, o se mea e faalelalolagi lona aoga.
Sa malaga atu se uo ma sana tama teine e vaavaai i aoga maualuluga atu i le itu i sasae o le Iunaite Setete. Na iloa e lana tama teine na maualuga lona uunaiga ma talenia, o le auai atu i le aoga e numera tasi i lana filifiliga, o le a tatau ai ona ia nonoina mai ni tupe se tele mo lana aoga. E masani lava o aoaoga sili ona lelei e matuā aoga ai lava le totogiina, ae o le tulaga lenei, sa tatalo lana tama teine ma lagonaina ai, e ui o se aitalafu tele e le ono taofia mai ai o ia mai le faaipoipo, ae e iu ina taofia mai ai o ia mai le faigaluega ina ia nofo i le fale i lana fanau. Ia atamai. E eseese i tatou uma taitoatasi. Afai e te sailia Lana fautuaga, o le a faailoa atu e le Alii le mea e sili mo oe.
Ia Galala i le Fia Aoaoina
Ua aoao mai Elder Jay E. Jensen o le Au Peresitene o le Au Fitugafulu e faapea, tatou te manaomia i taimi uma “ona faamaai lo tatou aoaoina.”9 O lena maai e tatau ona faamataina e se naunau e aoao, e taialaina e mea o le faavavau e tatau ona faamuamua.
E faaopoopo atu i le faateleina o o tatou tomai faalegaluega, e tatau foi ona tatou naunau e aoao le auala e mafai ai ona atili faamalieina faalelagona, atili faatomaiina i a tatou sootaga patino, ma avea ma ni matua ma ni tagatanuu lelei atu. O loo i ai ni nai mea e sili atu le faamalieina ma mālie nai lo le aoaoina o se mea fou. O le fiafiaga sili, faamalieina, ma taui tautupe e ala mai i lenei mea. O se aoaoga e le faapea e faatapulaa i ni aoaoga aloaia. O le aoaoga i le olaga atoa e mafai ona faateleina ai lo tatou gafatia e talisapaia ma olioli i galuega ma le matagofie o le lalolagi ua siomia ai i tatou. O lenei ituaiga aoaoina e oo atu le mamao i lo tusi ma le faatapulaaina o le faaaogaina o tekinolosi fou, e pei o le Initoneti. E aofia ai taumafaiga fatufatua’i. E aofia ai foi aafiaga ma tagata ma nofoaga: talanoaga ma uo, asiasiga i falemataaga ma koneseti, ma avanoa mo auaunaga. E tatau ona tatou faalauteleina i tatou lava ma olioli i le faigamalaga.
Atonu o le a tatou tauivi ina ia ausia a tatou sini, ae e mafai ona aumaia e a tatou tauiviga se tele o le tuputupu ae e pei o lo tatou aoaoina. O malosiaga tatou te atiina ae i le faatoilaloina o luitau o le a i ai pea ia i tatou i le faavavau a sau. E le tatau ona tatou mata’ua ia i latou o e faigofie ona maua tupe po o punaoa faaleatamai. O le faamoemoega o le tuputupu ae sa le faigofie lava, ma o tagata o e faigofie ona latou maua o latou manaoga, e tatau ona latou iloa lo latou tuputupu ae i isi osigataulaga pe misia le alualu i luma o le faamoemoega lea o le olaga.
O le mea e aupito taua, ua ia i tatou le tiute o le faaauau o a tatou aoaoga faaleagaga e ala i le suesueina o tusitusiga paia ma tusi a le Ekalesia ma le o atu i le lotu ma le malumalu. O le taumamafa i upu o le ola o le a faatamaoaigaina ai i tatou, faateleina ai lo tatou gafatia e aoao ē pele ia i tatou, ma saunia ai i tatou mo le ola e faavavau.
O le sini tupito o se aoaoga, ia avea ai i tatou o ni matua ma ni auauna lelei atu i le malo. I le iuga, o le tuputupu ae, malamalama, ma le poto tatou te maua e faapea ona faalauteleina ai o tatou agaga ma saunia ai i tatou mo le faavavau, ae le o togi i luga o pepa a se kolisi. O mea a le Agaga o mea ia e faavavau, ma o a tatou mafutaga faaleaiga, e faamauina e ala i le pule o le perisitua, o fua aupito taua ia o le Agaga. O le aoaoga o se meaalofa mai le Atua; o se maatulimanu o la tatou tapuaiga pe afai tatou te faaaogaina e faamanuiaina ai isi.
Tauagavale: Ata na pueina e Craig Dimond; taumatau: ata pue na saunia e John Luke, Matthew Reier, ma Christina Smith
Ata pue na saunia e Robert Casey, Marina Lukach, ma Craig Dimond
Ata pue na saunia e Matthew Reier, Craig Dimond, ma Christina Smith
O le aoaoina i le Agaga e le faapea e gata ai i potuaoga po o sauniuniga foi mo suega faaleaoaoga. E faatatau i mea uma lava tatou te faia i le olaga ma nofoaga uma tatou te faia ai—i le fale, i le galuega, ma i le lotu.
O se aoaoga e le faapea e faatapulaa i ni aoaoga aloaia. O le aoaoga i le olaga atoa e mafai ona faateleina ai lo tatou gafatia e talisapaia ma olioli i galuega ma le matagofie o le lalolagi ua siomia ai i tatou.