O Le Meaalofa o le Iloa Tusitusi ma Faitautusi
O le ma atalii matua e fiafia tele i le aoga a tamaiti laiti ma na foliga mai na lelei ana taumafaiga i le aoga. Ae i le vasega tasi, na ma iloaina ai sa le’i iloa e ia faitau. E mafai ona ia faitauina ni nai upu iinei ma iina, ae sa tauivi lava ma le amataina o ni meaaoga faitautusi. Na mavae le tele o masina, ae sa leai lava se alualu i luma o tomai faitautusi o le ma atalii. Sa amata ona faateteleina lo ma popole ma lo’u toalua.
I se tasi aso, na ou manatua ai se mea na aoao mai e lo’u peresitene o le misiona i ni tausaga ua mavae. Sa valaauina a’u i se misiona e ese le gagana e faaaoga ai. O le aoaoina o le gagana Rusia o se luitau lea e eseese lava lona maualuga i faifeautalai taitoatasi, ma na fautuaina ai i matou e le matou peresitene o le misiona, ina ia faitau i aso uma le Tusi a Mamona i le faaRusia. Sa ia folafola mai ia i matou o le mana o le Tusi a Mamona o le a fesoasoani ia i matou e mafai ai ona matou talanoa i le faaRusia. Na sa’o lava o ia. Mulimuli ane, na lelei ai lava la’u tautala ma lo’u malamalama i le gagana, ma na faapea foi ona tuputupu ae la’u molimau.
Ua fia tausaga talu ona uma la’u misiona, ae o lenei ua ou toe mafaufau, “Afai na aogā ia te a’u i le faaRusia, aisea la o le a le aogā ai i lo’u atalii i le Igisili?” Ina ua uma ona ou ta’uina atu i lo’u atalii e uiga i la’u tauiviga e aoao le faaRusia faapea ma le fautuaga a lo’u peresitene o le misiona, na ma luiina ai loa ma lo’u toalua o ia e faitau na o ia mai le Tusi a Mamona i aso uma lava. Sa ia faaaluina le taimi e faailoga ai upu Atua ma le Alii pe a tau atu i ai i itulau. E le’i umi ae faasolo atu i le upu Iesu. Na uma lena, ae ona filifilia ni upu sa ia vaai i ai ma fesili mai po o a ia upu. Sa maelega o ia i ana faitauga i aso taitasi, ma e oo atu i le faaiuga o le tausaga ua sili atu le tulaga o lana faitau nai lo le mea na ma faamoemoeina.
O le taimi lenei o loo i le vasega ono le ma atalii. O ia o se tagata faitautusi tulaga ese ma e fesoasoani foi e aoao nai ona tei laiti e toalima e uiga i le meaalofa na ia mauaina e ala i le faitauina o le Tusi a Mamona. Ua taufai atiina ae e le ma fanau uma ni tomai malolosi i le faitau ma se masani o le faitauina o le Tusi a Mamona. O loo ua amata ona latou lagonaina le agaga mamana o lona moni a o tuputupu ae a latou molimau.