Savalia o le Maila Faaopoopo
O nisi taimi o le faia o se taumafaiga laitiiti e maua ai mea tetele.
A o pe a ma le 15 tausaga o Sitaine Afa Anesone, sa le’i malosi o ia i le Ekalesia. Sa faapena foi lona aiga. Sa latou siitia solo i ni nai taimi i eria eseese o Nouei. O le taimi lenei sa latou nonofo ai i Stavanger. O le aai e lona fa le tele i le atunuu ma e tu i le talafatai i sautesisifo. Na alu Sitaine i le lotu i Stavanger mo ni nai taimi ma feiloai ai i isi talavou o le Au Paia o Aso e Gata Ai i le eria. Na tuua e se alii talavou faapitoa se uunaiga malosi ia Sitaine—o lona igoa o To Lase Piseka.
O se tasi o na asiasiga na seāseā ona faia i le lotu na fetaui ai Sitaine ia To Lase. “Pe a ma le lua tausaga na matua ai o ia ia te au, ma sa ia matuā faagaeetiaina lava a’u,” o le tala lea a Sitaine. “Sa ou lagonaina se lagona lelei pe a ma faatasi, ma na ou manatu o ia o se alii lelei.” Ana faapea e le faagaeetia ia Sitaine ia To Lase, atonu e le naunau o ia e faalogo ia te ia ina ua alu atu To Lase i le fale o Sitaine ma se valaaulia faapitoa.
O le valaaulia na oo mai i le ogatotonu o le vaitaimi o le 1970, ina ua faalauiloa mai le polokalama o le seminare i Nouei, ma na valaaulia ai To Lase e avea ma faiaoga muamua lava o le seminare. Talu ai ona sa na o le 18 ona tausaga i le taimi lena, sa fai lava si popole laitiiti o To Lase i le tauaveina o se tiutetauave tele faapea. “Sa fai si ou tatalo soo e uiga i ai,” na ia manatua ai. E tasi le mea na ia mautinoa lava o le, sa manao o ia e aapa atu i le autalavou i lana eria o e na le malolosi i le ekalesia. Fai mai To Lase, “Na vave lava ona ou lagonaina e tatau ona ou alu atu e asiasi ia Sitaine Afa.”
“E masalo o a’u o se tasi lea o igoa na i ai i le lisi,” o le tala lea a Sitaine. Ae ia To Lase, o Sitaine na sili atu nai lo na o se igoa i luga o le lisi. E manatua e To Lase lona faagaeetia i le atamai o Sitaine ma ona uiga filemu ma le naunautai. O lea na tonu ai ia To Lase e fai sana asiasiga patino e valaaulia mai ai Sitaine e auai i le polokalama fou o le seminare.
Na muamua telefoni atu To Lase ma talanoa ai ma matua o Sitaine ina ia mautinoa e i ai o ia i le fale mo le asiasiga. Ina ia oo atu i le fale o Sitaine, sa tatau ai ia To Lase ona alu i se pasi mo le pe tusa ma le 35 minute ina ia oo atu i se vaa. Ona tietie atu ai lea i le vaa mo le umi e 45-minute. Mulimuli ane, na savali atu ai o ia mo se isi 30 minute “Ou te mafaufau lava i lenei mea i taimi uma,” o le tala lea a Sitaine. “O le mea na faia e To Lase o le alu moni lea i le maila faaopoopo.”
E manatua uma e nei alii le agaga na la taufai lagonaina i le taimi o lena feiloaiga i le toeitiiti 35 tausaga ua mavae. A o la saofafai i le potu ai, sa toe faasolosolo mafaufauga o Sitaine i mea sa aafia ai o ia. “Sa ou pisi tele i le soka ma le Sikauti ma le iliina o la’u puusu, ma sa ou faia soo se ituaiga mea. Sa matua ou pisi lava.”
“Na faliu mai To Lase ia te au a o talanoa mai o ia e uiga i le seminare, ma fai mai, ‘Sitaine Afa, e mafai ona e lesitala mo le polokalama o le seminare ma tatou amata suesue faatasi ai i tusitusiga?’ Sa ou saofai i talaane o le magālafu, ma na ou fai atu, ua lelei. O mafaufauga lelei uma, sa tatau ona ou teena lana talosaga aua na leai so’u taimi [mo le seminare]. Ae na ou fai atu ioe. Ma o le mea lena na amataina ai le mea atoa.”
O le “mea atoa” na aofia ai le ala i luga i taeao uma e suesue na o ia i lona fale i tusitusiga paia ma ana lesona o le seminare. Ona faatasitasi lea o le vaega toalaiti o tamaiti aoga e toafa pe toalima i vaiaso taitasi. “Na faifaimalie lava ona ou lagonaina le Agaga i na taeao po, o le faitau na o a’u, ma ou ala ai i taeao uma,” o le tala lea a Sitaine. “Ina ua mavae sina taimi na ou lagonaina na pei e le fetaui le aso pe afai ou te le’i suesue i le taeao. Ma na amata ai ona ou maua se molimau e aunoa ma le iloaina na ou mauaina.”
Na faamatala mai e Sitaine e faapea “ina ua mavae sina taimi, ona ou malamalama ai lea i na lagona. Sa ou lagona le fiafia i mea na ou aoaoina, ma na ou lagonaina le Agaga. Na ou lagonaina na sa’o lenei mea. Ma na ou iloaina o se mea lenei na ou manao e faavae ai lo’u olaga.”
Ae aisea na ioe ai Sitaine ae na ia iloaina lona pisi tele? “Ou te manatu na aoga faatosinaga a le Agaga Paia ia te a’u,” na ia fai mai ai. “Atonu na ou saunia lava. O lea la, ina ua sau To Lase ma le faatuatua, na sau o ia i le maila faaopoopo, ma sa ou sauni e talia lana valaaulia. O le auala lena e galue ai le Alii.”
Pe tusa ma se tausaga pe a mulimuli ane, na tonu ai ia To Lase e alu i se misiona ma na valaauina e auauna atu i Nouei. I lena taimi na faaauau ai lava e Sitaine ona faamalosia lava lana molimau i le talalelei. “Ina ua foi mai To mai lana misiona, o le mea lena na amata ai ona ou mafaufau foi mo se misiona,” o le tala lea a Sitaine. “Na ou faia se faaiuga e tatau ona ou alu ona na ou manao e auauna atu i le Alii, ma na ou mafaufau afai ou te le alu, atonu o le a ou faanoanoa ai i aso uma o totoe o lo’u olaga.”
E manatua e Sitaine, ina ua uma ona talanoa atu i ona taitai perisitua e uiga i le alu atu i se misiona, na ia lagonaina na pei lava e le’i papai ona vae i le eleele a o savali atu o ia i le fale. A o le’i malaga atu o ia i lana misiona (na faia foi i Nouei), na fetaui ai Sitaine i lana avā i le lumanai o Ite, i se konafesi a le autalavou i Osolo. Sa la’ua fetusiai i le taimi o lana misiona, ma ina ua foi mai o ia i le fale, na faapea loa ona la’ua faaipoipo. O le taimi nei ua toafa la la’ua fanau: e toalua tama, o e ua maea ona faaipoipo uma i le malumalu, ma se fanau teine e toalua, o loo latou nonofo pea ma e toaaga foi i le seminare.
“O lena po ina ua sau To Lase i le matou fale—o le mea lena na suia atoa ai lou olaga,” o le tala lea a Sitaine. O le asiasiga lena na amata ai ona ia uia le ala lea na la feiloai ai ma lona faletua, faia se misiona, ma amataina se aiga, na faia ia mea uma ma ona vae na mausali i eleele o le talalelei. “Na avea a’u ma peresitene o le paranesi, peresitene o le itu, epikopo—o ia mea uma ona na sau To Lase i lo’u fale ma ou amataina le polokalama o le seminare.” Ua tulai mai nei mea uma ona sa naunau To Lase e savali i le maila faaopoopo.
Ata na tusia e Gregg Thorkelson
Ata na pueina e Paul VanDenBerghe
Aita Anesone (taumatau) ma lona uso, o Ane, ma ona matua o Ite ma Sitaine.