Aoao mai le Perofeta o Iosefa
Sue Barrett, Mekasini a le Ekalesia
O se tasi o a matou afiafi faaleaiga na sili ona matou fiafia i ai, o le faatinoina lea o le tala ia Iosefa Samita ma le Uluai Faaaliga. Sa ou faamatalaina le tala, ona faatino lea e le fanau a la’u fanau, i le faia o vaega a faifeau ma Iosefa Samita. Na ou tusia nisi o laau pepa e faatusa i le togavao ma faapipii i le puipui i le tulimanu o le potu, ma fai ni faailo na faapea mai “Faifeau” mo faifeau, ma tuu se nofoa ma se Tusi Paia mo “Iosefa” e suesue ai.
Sa faapea atu ia faifeau taitasi ia Iosefa, “E sa’o la’u lotu. Sau i la’u lotu, Iosefa.” Ae tali atu Iosefa, “Ou te le iloa,” po o le, “Se’i ou mafaufau i ai.” Ina ua uma ona talanoa atu nei faifeau uma ia te ia, sa saofai loa Iosefa i le nofoa ma faitau leotele le Iakopo 1:5. Ona alu atu lea o ia i le “vao” ma tootuli e tatalo. E leai se tasi na faatinoina vaega a le Tama Faalelagi po o Iesu Keriso, ma sa matou fifilemu uma i le taimi na o atu ai “Iosefa” taitasi i le vao e tatalo. Na tofu le tamaitiiti ma le avanoa e fai ai ma faifeau ma fai ai foi ma Iosefa.
Ona matou talanoa lea po o a mea na aoaoina e Iosefa i le Uluai Faaaliga, le ala tatou te maua ai tali ia tatou tatalo e ui tatou te le vaai i ni faaaliga, ma le auala e mafai ai e tusitusiga paia ona taialaina i tatou.