Uo i le Uo
O Folafolaga a se Perofeta
“Ina saili nei poloaiga, aua ua moni ia ma faamaoni lava, ma o valoaga uma ma folafolaga o i ai o le a faataunuuina” (MFF 1:37).
I lo’u olaga atoa na ou aoaoina ai pe a tatou mulimuli i aoaoga a o tatou perofeta, tatou te maua faamanuiaga folafolaina. I le konafesi aoao o Aperila 1986, na folafola mai ai e Peresitene Ezra Taft Benson (1899–1994) e faapea, afai o le a faitauina faatasi e le aunoa e aiga ia tusitusiga paia, o le a faapea ona faatumulia i le Agaga o latou fale.1
Na ma filifili ma lo’u toalua pele ma te mulimuli i lena fautuaga. Sa ma faatuina se sini ia faitau se mataupu i le aso mai le Tusi a Mamona faatasi ma le ma fanau e toatolu o—Siaosi, 10; Susi, 9; ma Lui, 3. Sa matou faitau i aso uma, e tofu i matou ma le fuaiupu e tasi i le taimi. E ui ina sa le’i iloa e Lui faitau i lena taimi, ae sa manao lava e auai. Sa nofo o ia i luga o o’u vae, e faasaga mai ia te a’u, ma se Tusi a Mamona i lo ma va. A oo i lo’u taimi ou te faitau ai, ma te mulimuli faatasi i lo’u tamailima a o ou tusi atu i upu taitasi, ma e toe ta’u leotele e Lui ia upu uma ou te faitauina a o ia tilotilo atu i na upu e u i luga lalo.
A o le’i atoa lelei lona lima tausaga, na fesili mai ai Lui, “O le a le taimi ou te faitau ai?”
Na ma faamalamalama atu i ai, a matua o ia ona alu lea i le aoga e aoao ai ia iloa faitau.
Na tali mai o ia, “o lea ua ou iloa faitau!”
I lo’u maofa, na ou tuuina atu ai ia te ia se Tusi a Mamona. Sa ia susueina le tusi e faau i luga lalo, ma tilotilo i le pito i luga, ma amata loa ona faitau lelei mai. Sa aoao o ia e faitau e ala i le mulimuli i le faitauga o le Tusi a Mamona!
Ina ua atoa lona ono tausaga, na i ai nisi taimi sa ma o ai ma Lui e asiasi i tagata o le Ekalesia. Na ou fai atu ia te ia e fetufaai atu lana molimau faapea ma se savali puupuu mai se mau na ou aoaoina ia te ia. Soo se taimi lava na te faitauina ai le Tusi a Mamona, na te uuina e faau i luga lalo ona tilotilo lea i le pito i luga.
Ou te molimau atu ia te outou, afai e amata ona e faitauina tusitusiga paia mai le taimi a o e laitiiti, o le a faapea ona e malamalama lelei i folafolaga a le Alii ma o le a e iloa ai mea o loo ia faamoemoeina mai ia te oe. O le a i ai se aso e avea ai oe ma se mātua ma maua sau lava fanau laiti. Aoao i latou e faitau tusitusiga paia, ma o le a e vaai ai i se faataunuuga o le folafolaga o loo i le Faataoto 22:6: “A’oa’o ia i le tama e tusa ma lona ala: a oo ina toeaina lava o ia, e le te’a ese ai.”
O loo faamaeaina e Lui i le taimi nei ana aoaoga i le iunivesite ma faigaluega tumau. E tusa lava pe o le a le tuai e taunuu mai ai o ia mai le galuega, aoga, po o se tofiga i le Ekalesia, na te faitauina lava se mataupu mai le Tusi a Mamona a o le’i moe. Ua faataunuuina moni folafolaga a le perofeta: o se taunuuga o le matou faitauina o lenei tusi paia, ua matuā faamanuiaina ai lava lo matou aiga ma ua sili atu foi ona matou lotogatasi.
Ou te valaaulia outou ia faitau tusitusiga paia i aso uma. Afai e mafai, ia faitau faatasi ma lou aiga. Ou te uunaia outou alii ia saunia e auauna atu i ni misiona. Ou te valaaulia outou uma ina ia i ai se sini ia faamauina i le malumalu mo le faavavau atoa. Ma le mea mulimuli, ou te manao ia outou manatua le fautuaga musuia a Peresitene Gordon B. Hinckley (1910–2008), o le na saunoa mai ia i tatou: “E te manaomia aoaoga uma e mafai ona e maua. … Pe o le lipeaina o pusaaisa, po o se galuega a se fomai tipitipi atamai, e tatau lava ona outou aoaoina outou lava.”2
Lau fanau pele, ia faalogo i o outou faiaoga, ia usitai i totonu o le potuaoga, ma fai le mea sili tou te mafaia, ma ia aoao mea uma tou te mafaia. O loo teuina e le Alii ni faamanuiaga se tele mo outou ma o outou aiga. O lo tatou tiute o le “mulimuli i le perofeta; na te iloa le ala.”3
I le pe tusa o le 16 o ona tausaga, a’o le’i leva ona uma lona papatisoga.
O lona atalii o Lui i le fa o ona tausaga.
Ata pue mai faaaloaloga a Elder Octaviano Tenorio; ata na tusia e Robert A. McKay