Taimi o Fetufaaiga

O Iesu Keriso O Lo’u Faaola

Saunia e Cheryl Esplin

“O a’u nei le ala, ma le upu moni, ma le ola: e le alu atu lava se tasi i le Tama, pe a le ui mai ia te au” (Ioane 14:6).

A o le’i auina mai i tatou e le Tama Faalelagi i le lalolagi, sa Ia filifilia Iesu Keriso e avea ma o tatou taitai ma Faaola. Na e filifili e mulimuli ia Iesu Keriso ae e te le’i fanau mai.

Ina ua afio mai Iesu i le lalolagi, na Ia aoao mai le talalelei ma faatulaga Lana Ekalesia Na Ia tausia Lana folafolaga e avea ma o tatou Faaola. Na puapuagatia ma maliu ma na toetu mai ina ia mafai ona tatou toetutu ma toe mafuta faatasi ai ma lo tatou Tama Faalelagi ma o tatou aiga.

Ua aoao mai tusitusiga paia ia i tatou i le tele o faamanuiaga ua mafai ona tatou maua ona o Iesu Keriso. E te manatua le tala i le miti a Liae? Na vaai Liae i se laau. O le laau ua faatusaina i le alofa o le Tama Faalelagi ma Iesu Keriso.

I luga o le laau na i ai ni fua o le a faapea ona maua ai e tagata le fiafia. Na a’i Liae i le fua, ma na faatumulia ai o ia i le olioli tele. Na manao Liae ina ia aai lona aiga atoa i le fua. (Tagai 1 Nifae 8:10–12).

O le fua o le laau ua faatusaina i faamanuiaga ua tatou maua ona o Iesu Keriso ma Lana Togiola. Tatou te tofo i le fua pe a tatou faalagolago atu ia Iesu Keriso, pe a tatou papatisoina ma maua le Agaga Paia, ma pe a tatou ola i le talalelei ma lagona le alofa o lo tatou Faaola.

Gaoioiga

Aveese le itulau U5, ma faapipii i se pepa malo. Oti va o loo i le laau i luga o laina lanupapae, ma oti ese mai le fua o le laau. Mo fua taitasi, ia sue le mau, faailoa mai le faamanuiaga ua tuuina mai e le Tama Faalelagi ia i tatou, ona tusi lea i luga o le laina. Faamau le au o le fua i totonu o le va i luga o le laau.

Moronae 6:8_____________

Mosaea 16:7–8______________

Ioane 14:27_____________

Eperu 12:2_____________

2 Nifae 31:20_____________

3 Nifae 19:21_____________

Ioane 8:12

Moronae 8:17_____________

3 Nifae 27:13_____________

Moronae 7:41_____________

Manatua: O lenei gaoioiga e mafai ona kopiina pe lolomiina mai le Initoneti i le www.lds.org. Mo le Igilisi, kiliki i le Gospel Library. Mo isi gagana, kiliki i le Languages.

Manatu mo Taimi o Fetufaaiga

1. I le muai olaga, sa ou filifili ai e mulimuli ia Iesu Keriso. Fai atu i tamaiti e ta’u mai nisi o filifiliga na latou faia i lena aso (o le a le ofu e fai, o le a le meaai e ai, ma isi lava). Tusi ia tali i luga o le laupapa. Ia faamalamalama atu ua tuuina mai e le Tama Faalelagi ia i tatou le filifiliga saoloto, o le mafai lea ona fai o filifiliga. Ia aoao atu e uiga i le Fono i le Lagi, i le taimi na faailoa mai ai e le Tama Faalelagi Lana fuafuaga. Ia faamatala atu o le faaaogaina o la tatou filifiliga saoloto, o se vaega taua lea o lena fuafuaga. Fesoasoani i tamaiti ia malamalalma na manao Satani e sui le fuafuaga ma aveese ai lo tatou mafai ona filifili. Na manao Iesu Keriso e mulimuli i le fuafuaga a le Tama Faalelagi ma ofo atu e avea ma o tatou Faaola. Ia faamamafa atu i tamaiti e faapea, na latou filifili e mulimuli ia Iesu Keriso (tagai Peraimeri 6, lesona 2). Tusi ni fesili e fesoasoani ai i tamaiti e toe faamanatu mea na latou aoaoina. Tuu ia fesili i totonu o se koneteina. Filifili se tamaitiiti e aumai se fesili mai le koneteina ma tali i ai. Ona tuu atu lea i le tamaitiiti lena e filifili se isi tamaitiiti e ilo mai se fesili ma tali i ai. Ia faaauau pea pe a lava le taimi. Tuuina atu le molimau i le taua o le faaauau pea ona mulimuli ia Iesu Keriso.

2. O le a matou toetutu ma lo’u aiga. A o le’i amataina le taimi o fetufaaiga faatasi ai ma le faamaoniga mai le epikopo po o le peresitene o le paranesi, ia valaaulia se tagata o le uarota ua maliu se tasi e pele ia te ia e tuuina atu lana molimau i le uiga o le Toetu. Tuu ata nei o le Taga Ata a le Ekalesia i se faaputuga i le faasologa lenei, ia pito i luga le ata 227: 227 (Iesu o loo Tatalo i Ketesemane), 228 (O Le Faalataina o Iesu), 230 (O Le Faasatauroga), 231 (Lagomauina o Iesu), 233 (Maria ma le Alii Toetu), 234 (Iesu o Loo Faaali Atu Ona Manua), ma le 316 (Iesu o Loo Aoao Atu i le Itulagi i Sisifo). A o tata le piano, tuu atu i tamaiti e pasi solo se tamai maa. Ta’u atu ia i latou ua faatusa lea i le maa na faataavale ane i luma o le tuugamau o Keriso. A taofi le musika, ona tuu atu lea i le tamaitiiti o loo uuina le maa e tago i le ata o loo pito i luga o le faaputuga, ma faamatala mai pe filifili foi se tasi e fesoasoani atu i ai. Ia faaauau ai mo ata taitasi, ma ia taofi pe a uma le ata 234 e faitau faatasi le Luka 24:39. Fesoasoani i tamaiti ia malamalama, ina ua toetu Iesu, na mafai e le Au Aposetolo ona tagotago i Ona aao e pei foi ona mafai e tamaiti ona fetagofi i o latou lava lima. Ia faaauau mo ata o loo totoe. Ia aoao atu, ona o le Togiola a Iesu Keriso, o i latou uma lava na ola i luga o le fogaeleele o le a toetutu uma. Tuu atu i le malo na valaaulia e tuuina atu lana molimau.

Ata na tusia e Brad Teare