O Mai e Faalogo i le Siufofoga o se Perofeta
Toefoi Atu ma le Saogalemu i le Tama Faalelagi
Mai se saunoaga i le konafesi aoao ia Aperila 2007
Ua aoao mai Peresitene Uchtdorf e faapea, ona o le Togiola ua mafai ai ona tatou salamo ma maua le faamoemoe i taimi uma.
O Le Vaega Tonu o le Toe Foi Saogalemu
I le taimi o a’u aoaoga faatino ina ia avea ma se kapeteni o vaalele, sa ou aoao pe faapefea ona faafoeina se vaalele i malaga mamao. O malaga e laasia ai vasa tetele, o toafa tetele, ma malaga mai le konetineta i lea konetineta e manaomia ai lava le fuafuaina ma le faaeteete, ina ia mautinoa ua taunuu saogalemu i le taunuuga sa fuafuaina. O nisi o nei malaga e leai se malolo e mafai ona oo atu i le 14 itula ma e toetoe lava atoa le 9,000 maila (14,500 km) e aofia ai.
E i ai se itu taua o se faaiuga i le taimi o na malaga uumi e masani ona iloa o le itu o le toe foi saogalemu. E oo atu i le itu lea o loo lava lelei le suauu o le vaalele e toe liliu ai ma toe foi saogalemu i le malaevaalele na aluese mai ai. O le pasia o le vaega tonu o le toe foi saogalemu, ma ua leai ai foi ma se filifiliga a le kapeteni, o lea e tatau ai lava ona [ia] faaauau pea. O le mafuaaga lena e masani ona ta’ua ai le vaega tonu lenei o le vaega tonu o le le toe foi mai.
E Le Tuai Lava
E manao Satani ina ia tatou mafaufau faapea a tatou agasala ua tatou pasia se “vaega tonu o le le toe foi mai”—e faapea ua fai si tuai ona sui lo tatou auala. O le Togiola a Iesu Keriso o le meaalofa lea a le Atua i Lana fanau ina ia faasa’oina ma faatoilalo ai taunuuga o le agasala. Na afio mai Keriso e laveai i tatou. Afai ua tatou uia se auala sese, o le Togiola a Iesu Keriso e mafai ona aumaia ia i tatou le faamautinoaga o le agasala e le o se vaega tonu o le le toe foi mai. E mafai ona tatou maua se toe foi mai saogalemu pe afai tatou te mulimuli i le fuafuaga a le Atua mo lo tatou faaolataga.
O Loo i Ai i Taimi Uma le Faamoemoe
Po o fea lava tou te iu i ai i lenei malaga o le olaga, po o a lava tofotofoga tou te ono fetaiai, o loo i ai i taimi uma se vaega tonu o le toe foi saogalemu; o loo i ai lava i taimi uma le faamoemoe. O oe o le kapeteni o lou olaga, ma ua saunia e le Atua se fuafuaga e toe aveina atu saogalemu ai oe ia te Ia, i lou faasinomaga paia.
O le meaalofa o le Togiola a Iesu Keriso, ua tatou maua ai i taimi uma, ma nofoaga uma ia faamanuiaga o le salamo ma le faamagaloga. Ona o lenei meaalofa, ua tatou maua uma ai le avanoa tatou te toe foi saogalemu atu ai mai ala faigata o le agasala. O le fiafia i lenei olaga ma le olioli e faavavau i se olaga a sau, o le a avea lea ma o tatou taui pe afai tatou te filifili e talia ma faaaoga lenei meaalofa a lo tatou Tama Faalelagi.
Ata na tusia e Scott Greer