Fiafia e Aoao
“Ia saili i le aoao, e faapea foi i le suesue ma le faatuatua” (MFF 88:118).
Na teu ma le faaeteete e Russell ana penitala e lua ma lana api i totonu o lana atoaoga. Na ia seluina lona ulu ma siaki ia mautinoa o loo manaia ona lavalava. Ina ua uma ona fusi faatofa atu i lona tina, na tamoe loa o ia i le fale faatalipasi. Na ia lagonaina e pei a pasae lona tino pe afai e le vave sau le pasi. Sa matua fiafia lava o ia e a’e i le aoga mo le taimi muamua.
O tausaga uma lava, na vaavaai atu ai Russell a o savavali atu ona uso ma tuafafine matutua i le fale faatalipasi, lea latou te o ai i le pasi i le aoga. Na manao o ia ina ia latou o faatasi i le pasi. E sili atu foi i lo lena, sa manao na te aoaoina mea na latou aoaoina. Sa manao e aoao atili e uiga i tainasoa. Sa ia fiailoaina pe faapefea ona feoai nofoaafi. Sa manao na te fiailoa faitautusi. Sa ia iloaina lava o le a fiafia o ia i le aoga.
Na ataata le faiaoga o Russell, o Mrs. Wilson, ina ua savali atu o ia i totonu o le potuaoga. Sa ia faasino atu ia Russell le mea na i ai lana kesi. Sa ia faasino atu foi o ia i le mea e tautau ai lana atoaoga.
“Atonu o le a matou aoao muamua e uiga i tainasoa,” o mafaufauga ia o Russell.
“E faafeiloai atu i lo outou o mai i le aoga,” o le tala lea a Mrs. Wilson. “O le a tuu atu le avanoa e faailoa mai ai i tatou lava ma ta’u mai se mea e uiga ia i tatou.”
Na faauu foliga o Russell. “Ia, e tatau ona tatou masani i tagata uma,” o lona manatu lea. “Atonu e uma loa ona matou aoao loa lea e uiga i tainasoa.”
Ina ua oo i le taimi o Russell e faailoa atu ai o ia lava, sa ia faapea atu, “O a’u o Russell. Ou te fiafia lava e aoao i mea uma—ae maise lava i nofoaafi ma tainasoa.”
“Manaia tele lena, Russell,” o le tala lea a Mrs. Wilson. Na ataata Russell. Sa ia mautinoa lava o le a latou aoao e uiga i nofoaafi ma tainasoa i se taimi e le o toe mamao.
Ae na leai. Na ai a latou meaai mama ma taaalo i siepi poloka e pei o lio, tafatolu, ma tafafa.
“Mrs. Wilson, o afea tatou te aoao ai e uiga i tainasoa ma nofoaafi?” o le fesili lea a Russell.
“E le o le taimi lenei, Russell,” na ia fai mai ai. “O le taimi lenei e faitau ai le tala.”
“E faatatau i tainasoa?”
“Leai, Russell.”
Ina ua uma le tala sa latou aoao e uiga i le alafapeta. Ona sosoo lea ma le taimi e o ai i le fale.
Sa le fiafia Russell.
Na faauu o ia i fafo o le faamalama o le pasi. Na tamoe o ia i le fale mai le fale faatalipasi ma pefu atu i totonu o le faitotoa pito i luma. Na tamoe atu o ia i totonu o lona potu ma tanuma’i lona ulu i se palanikeke.
Na sau i totonu tina ma tuu lona lima i le ulu o Russell. “Na faapefea mai lou aso muamua?” na ia fesili ai.
“Leaga. O le a ou le aoaoina lava se mea, ma ou te le toe alu foi [i le aoga]. Na pau lava le mea na matou faia ananei o le taaalo i poloka ma faitau tala.”
“Ia, Russell, o lou aso muamua lenei,” na fai atu ai Tina.
Na nofo a’e i luga Russell ma tilotilo atu i a Tina. “Ou te fia aoao e uiga i tainasoa ma nofoaafi ma faitau—i le taimi nei.”
Na saofai ane Tina i autafa o Russell i luga o le moega. “E le mafai ona e aoaoina mea uma i le taimi e tasi. O le aoaoina e tele se taimi e alu ai. Ma o le tele o mea e te aoaoina i le taimi nei, o le tele foi lena o mea o le a mafai ona e aoaoina i se taimi mulimuli mai.”
“O le a le uiga o lau tala?” na fesili ai Russell.
“Ia, e tatau ona e aoaoina le alafapeta ona faatoa mafai lea ona e aoao e faitau. Ma e tatau ona e aoaoina le faitau ona faatoa mafai ai lea ona e faitau i mea e te fiafia i ai,” na ia fai atu ai.
Sa mafaufau i ai Russell. Atonu o loo i ai nisi mea e aoao i ai nai lo na o tainasoa ma nofoaafi. “Ia, ou te matea o le a ou toe taumafai i le aoga taeao,” na ia fai mai ai.
Na ataata atu Tina ia te ia.
“Ae, Tina, e te manatu e mafai ona aumai se tusi mai le faletusi e uiga i tainasoa?”
“Ou te mautinoa e mafai ona ta faia.”
Ata na tusia e Jim Madsen