E Le’i Aoina
Ina ua oo mai le taimi ou te faauu ai mai le kolisi, na ou iloa ai o mataupu faavae o le talalelei na faamanuiaina ai lo’u olaga faalelalolagi—faapea foi ma lo‘u olaga—faaleagaga.
E oo lava foi a o avea a’u ma se tamaitai talavou, o le tele lava o o’u valaauga i le Ekalesia na aafia ai le aoaoina o tamaiti Peraimeri, ma o lenei mea na faaosofia ai la’u filifiliga e saili mo se faailoga i aoaoga tulagalua. Ae o le filifilia o se matata e aoga faapitoa ai sa le na o le pau lea o le auala na aafia ai a’u aoga i aoaoga a le Ekalesia. Na matuā manino lava lena tulaga a o ou sauni e faauu.
O le galuega faatino na tatau ona ou faamaeaina o se pepa mulimuli lea o le a faapea ona ou puipuia i se suega tautala i luma o ni faamasino se toatolu. O faamasino e toatolu o nisi ia o faiaoga na faiaoga i a’u vasega.
Na ma’ea lelei la’u pepa, ma na ou faaaluina se vaega o le afiafi a o le’i faia le suega tautala i le aiga o la’u uo tama. Ina ua ou tuumuli ou te alu i le fale, na fai mai lona tina, e faamoemoe o le a lelei mea uma ma sii mai le mau, “Ae afai ua saunia outou o le a outou le matatau ai lava” (MFF 38:30).
Na oo mai le aso na sosoo ai. Na fepasia’i solo nisi o mea e manatua i lo’u mafaufau. Na ou manatuaina lo’u filifili ai e tuua le taulaga lea na ou ola ae ai ina ia faaauau a’u aoga; na ou manatuaina osigataulaga uma na faia e lo’u aiga ina ia faatupeina ai. E le mafai ona ou faia se mea e faanoanoa ai i latou. E tatau lava ona manuia la’u suega faaiu.
Sa faapea foi ona faatalitali tamaiti o le matou vasega mo le faia o a latou suega. Sa matou taufai popole uma lava i fesili o le a tuuina mai e faamasino, ae sa ou lagonaina le toafilemu aua na ou tatalo mo se fesoasoani ma na ou iloaina na silafia e le Atua le taumafaiga na ou faia e faatulaga, fai a’u sailiga, ma tusi la’u pepa.
Na oo mai lo’u taimi. Ina ua uma ona faamatala atu la’u pepa i le laulau o faamasino, ona amata loa lea ona ou tali i fesili. Ina ua maea ni fesili e uiga i le autu na ou talanoaina, na fesili mai se tasi o faamasino, “O le a se tele o le galuega na e faia i lenei pepa?”
“E telē tele,” na ou tali atu ai. “Na ou tuu atoa i ai lo’u malosi aua na ou manao ina ia avea o se fatufatuga fou.”
“Na e aoina [i le tusiga o lau pepa]?”
“E leai, e le masani ona ou ala i le leva o le po i le faiga o ni meaaoga,” na ou fai atu ai. “Ou te faatulagaina lo’u aso ina ia mafai ona uma a’u meaaoga.”
Na manino le faaalia o le tetei i foliga o faamasino. Na toe faapea mai le faamasino lava lea, “E matuā ese lava lou tautino mai e te le’i aoina i le faiga o lau pepa. Ua matou iloa na aoina tamaiti o le tou vasega, mo ni po se tele.”
Na fai mai se tasi o faamasino, “Se’i ou faamatala atu ia te outou e uiga i le tamaitiiti aoga lenei. E i ai lava lona taimi mo mea uma. Ua mafai ona ou fai atu ai aua ou te iloa o ia. E i ai ona taimi mo ana suesuega, ana uo, lona aiga, ma e alu foi i le lotu.”
“E mo’i?” na toe te’i foi le isi faamasino. “O le a le lotu e te alu i ai?”
“O a’u o se tagata O Le Ekalesia a Iesu Keriso o le Au Paia o Aso e Gata Ai.”
“Oi, ioe, ou te iloa le lotu lena,” na fai mai ai le isi.
“Ma ua aoaoina i matou ina ia matou vave momoe ina ia matou malolosi i le isi aso e sosoo ai.”
Na ou lagonaina le toafilemu ma le saogalemu i le talanoa ai e uiga i le talalelei, e ui ina sa ou te’i i le fesili mai e uiga i tapuaiga i se taimi o suega o tomai.
“Na tusia lau pepa ma se lagona maoae. Ua maoae tele. Ou te manatu foi la ua mafua lenei mea ona o masani na aoaoina malie atu ia te oe e lau ekalesia.”
“Ioe,” na ou fai atu ai. “Na aoaoina a’u i le lotu i le auala e aoao atu ai i tamaiti, ma ua matuā fesoasoani tele lea i lo’u faailoga.”
“O lau faatinoga e pei lava o se i’a i le sami,” na talasua mai ai se tasi o faamasino. “Matou te faamoemoe o le a le muta ai lou alu i le lotu, aua ua e nofoaitalafu ai iina i le tele o tulaga faatonuina ua e mauaina.”
E le’i umi ae faamatuuese atu a’u mai le potu ina ia mafai ona faia se faaiuga a faamasino. E lua minute mulimuli ane, na toe valaauina mai ai a’u i totonu.
“Sa le’i faigata ia i matou ona maua se maliliega. I le iloiloga o lau amio tausaafia, o ou togi maoae, ma le pepa na e puipuia ananei, o le matou faaiuga ua autasi ai e te faauu, ma le viia tele. Faamalo atu!”
Ina ua ou ta’uina atu i lo’u aiga [lea faaiuga], sa latou fetagisi i le olioli.
Ou te molimau atu a poloaiina i tatou e le Tama Faalelagi “ia vave momoe, ina ia outou le vaivai; ia alapo, ina ia faafouina o outou tino ma o outou mafaufau” (MFF 88:124), na Ia faia lea ma le faamoemoe e faamanuiaina ai i tatou. Ou te faafetai ia te Ia mo le faatagaina o le talalelei e aumai ia i tatou le fiafia i itu uma o o tatou olaga.
Ata pue na saunia e Christina Smith