2009
Iakopo 1:5–6
Aperila 2009

O lea mataupu ma lea mataupu

Iakopo 1:5–6

Ua aoao mai e le Aposetolo o Iakopo ia i tatou le ki i le mauaina o le poto mai le Atua.

5 Ae afai ua leai se poto i so outou, ina ole atu ia i le Atua, o le foai tele mai i tagata uma ma le le toe tautaua; ona foaiina mai ai lea ia te ia.

6 A ia ole atu ma le faatuatua, aua lava nei masalosalo. aua o le masalosalo e tusa ia ma le peau o le sami ua sousou i le matagi ma felafolafoaiina.

Ole Atu i le Atua

O le faitauina o lenei fuaiupu na taitaiina atu ai Iosefa Samita e tatalo i le Vao Paia, lea na ia maua ai le Uluai Faaaliga (tagai Iosefa Samita—Talafaasolopito 2:11–17). E mafai ona e mafaufau i faataitaiga mai lou aiga po o ou lava aafiaga lea na maua ai e se tagata na sailia le poto se tali i lana tatalo? Tusi e uiga i ai i lau api o talaaga.

Foai i Tagata Uma

“O se avanoa mo fanau a le Atua le o atu i le Atua ma maua ai faaaliga. … E le faailoga tagata le Atua; ua ia i tatou uma avanoa tutusa.”

O Le Perofeta o Iosefa Samita, Aoaoga a Peresitene o le Ekalesia: Iosefa Samita (kosi aoaoina a le Perisitua Mekisateko ma le Aualofa, 2007), 139.

Tele

Tele—saoloto, agalelei, anoanoai.

Tautaua

Tautaua—faitioina, otegia, aoaia. I nisi faaupuga, o le a tali mai le Atua ia te oe ma o le a le toatama’i lava ia te oe mo le tatalo atu ma le faamaoni ia te Ia mo se tali i se fesili.

O Le A Foaiina Mai

E faafofoga ma tali mai le Tama Faalelagi i au tatalo. O Ana tali e oo mai i Lana lava taimi ma i ni auala eseese—mo se faataitaiga, i tulaga o lou olaga, e ala i galuega alofa a isi, pe ala mai foi i le leo lemu ma le itiiti o le Agaga Paia. O nisi nei o auala e mafai ona e sauniuni ai e maua le taitaiga e ala i le Agaga (mai le “Faaaliga,” Faamaoni i le Faatuatua [2004], 63–65):

  • Tatalo mo le taitaiga.

  • Ia faaaloalo.

  • Ia lotomaulalo.

  • Tausi poloaiga.

  • Ai ma inu ma le tatau i le faamanatuga.

  • Suesue i tusitusiga paia i aso uma.

  • Faaavanoa se taimi e mafaufau loloto ai.

  • Pe a sailia se taitaiga faapitoa, suesue le mataupu i lou mafaufau.

  • Ia saili ma le onosai i le finagalo o le Atua.

Ole Atu i le Faatuatua

“Na faapea mai le Perofeta [Iosefa Samita] ina ua uma ona ia faitauina le fuaiupu lenei, na ia iloa lava e tatau ona ia tofotofoina le Alii ma ole atu ia te Ia po o le filifili foi e tumau ai pea i le pogisa e faavavau. … Na ia faitauina le mau, sa malamalama o ia i le mau, ma faatuatua i le Atua lona Tama Faavavau; ma o lea sa ia tootuli ai ma tatalo, ma le iloa o le a tuuina mai e le Atua ia te ia le malamalama lea o loo ia matuā sailia. Na aoao mai e le Perofeta o Iosefa Samita ia i tatou le mataupu faavae o le faatuatua—e ala i faataitaiga.”

Peresitene Thomas S. Monson, “O Le Perofeta o Iosefa Samita: O Se Faiaoga e Ala i Faataitaiga,” Liahona, Iuni 1994, 5; Ensign, June 1994, 4.

Faamatalaga mai le Uso Iosefa, na saunia e David Lindsley; ata na pueina e David Newman