Savali a Faiaoga Asiasi

Suesue ma le Maelega i Tusitusiga Paia

Aoao atu mau ma upusii o le a faapea ona fesoasoani ai i uso o loo e asia e malamalama ai i nei mataupu faavae. Ia valaaulia i latou o loo e aoaoina e faasoa mai mea ua latou lagonaina ma aoaoina.

Aisea e Suesue ai Tusitusiga Paia?

Peresitene Howard W. Hunter (1907–95): “Ou te fautuaina atu ia te outou faaaliga a le Atua o tulaga ia e ao ona tatou ola ai, ma e tatau ai foi ona tatou fuatia a tatou filifiliga ma galuega uma lava. O lea la, pe a oo ia te oe le popole ma luitau, ia faafetaiaia e ala i le liliu atu i tusitusiga paia ma perofeta” (“Fear Not, Little Flock,” in 1988–89 Saunoga i le Faigalotu ma le Faeasaite [1989], 112).

Peresitene Ezra Taft Benson (1899–1994): “O le faamanuiaina i le amiotonu, o le mana e aloese ai mai le faaseseina ma teena ai faaosoosoga, taiala i o tatou olaga i aso uma, faamaloloina o le agaga—o nisi nei o folafolaga ua tuuina mai e le Alii ia i latou o e o atu i Lana afioga. … O faamanuiaga faapitoa e na o tusitusiga paia lava e maua ai, e na o le alu atu lava i le afioga a le Alii ma le pipii mau i ai. …

“… Toe faatautino outou lava e suesue i tusitusiga paia. Ia faatofu ai outou lava i aso uma ina ia outou maua le mana o le Agaga e faatasi ma outou i o outou valaauga. Faitau ai i lou aiga ma aoao ai lau fanau ia fiafia ma faapelepele i ai” (“The Power of the Word,” Ensign, May 1986, 82).

Peresitene Spencer W. Kimball (1895–1985): “A oo ina lava lo outou silafia i upumoni o tusitusiga paia, o le a sili atu ona outou mataalia i le tausiga o le tulafono lona lua ma le sili, ia alofa atu i le lua te tuaoi ia pei o oe lava ia te oe. Ia avea [outou] ma tagata atamamai i tusitusiga paia—e le faapea ia ta’u faatauvaaina ai isi, ae ia siitia ai i latou! Ia o ai e sili atu ona manaomia ona ‘faaputuina’ ia upumoni o le talalelei (lea e mafai ona latou tapa i ai i taimi e manaomia ai) nai lo tamaitai ma tina o e o loo faatinoina le tele o le faafailele ma le aoaoina?” (“The Role of Righteous Women,” Ensign, Nov. 1979, 102).

E Mafai Faapefea Ona Ou Faatauaina Tusitusiga Paia?

2 Nifae 4:15: “Aua e fiafia lo’u agaga i tusi paia, ua mafaufau foi i ai lo’u loto ma ua ou tusi ai mo le aoaoina ma le aoga i a’u fanau.”

Julie B. Beck, peresitene aoao o le Aualofa: “O se tasi o auala lelei e amata ai le suesueina o tusitusiga paia o le ‘faatatau’ lea ia i tatou lava (tagai 1 Nifae 19:23). O nisi tagata e amata i le filifilia o se autu i le Topical Guide [Taiala i Autu] lea latou te fiailoaina atili. Pe latou te amata mai foi i le amataga o se tusi o tusitusiga paia ma vaavaai ai mo aoaoga faapitoa. …

“Po o le a lava le ala e amata ai e le tagata ona suesue i tusitusiga paia, o le ki e tatala mai ai le malamalama taua, o le saga suesue pea. Ou te le vaivai lava i le sailia o tamaoaiga o le upumoni i tusitusiga paia, aua latou te aoao mai i le ‘tautino, e tusa ma le manino o upu’ (2 Nifae 32:7). E molimau mai tusitusiga paia ia Keriso (tagai Ioane 5:39). E ta’u mai ai mea uma e tatau ona tatou faia (tagai 2 Nifae 32:3). E ‘faapoto ai i [tatou] e oo i le faaolataga’ (2 Timoteo 3:15).

“O a’u faitauga o tusitusiga paia ma tatalo e o faatasi ma a’u suesuega, ua ou maua ai le malamalama ou te maua ai le filemu ma fesoasoani e tulimata’i atu ai lo’u malosi i mea o le faavavau e tatau ona faamuamua. Ona sa amata ona ou faitau i aso taitasi i tusitusiga paia, ua faapea ona ou iloa ai e uiga i lo’u Tama Faalelagi, o Lona Alo o Iesu Keriso, ma le mea e tatau ona ou faia ia ou faapei ai o i La’ua” (“E Fiafia Lo’u Agaga i Tusi Paia,” Liahona ma le Ensign, Me 2004, 108–9).

Peresitene Thomas S. Monson: “O tusitusiga paia ua teuteuina ai a tatou fatatusi. Ia mautinoa o nei tusi e fafagaina ai o tatou mafaufau ma avea ma taiala i o tatou olaga” (“O Le Malosiaga Maoae o le Aualofa,” Liahona, Ian. 1998, 114).

Ata na saunia e Craig Dimond; pito i tua na saunia e Shannon Gygi Christensen