Tutuina o le Sulu o le Faamoemoe
Mo le faitau afe o le Au Paia o Aso e Gata Ai i Pasila, o le Tupe Faaagaga mo Aoga o se faamanuiaga e suia ai olaga.
Ina ua leai se galuega a Dilson Maciel de Castro le Itiiti. i São Paulo, na siitia atu i la’ua ma lona toalua i Recife, o se taulaga o se uafu tele i Pasila matuisasae, ina ia latou nonofo faatasi ma ona matua. E ui lava i le poto masani o Dilson i galuega tau i fesootaiga, na pau lava galuega na mafai ona ia maua i Recife o se faasologa o ni galuega eseese e le fesootai ma ona tomai ma e le tumau foi.
“Sa matuā faigata lava ia mea mo i ma’ua i lena taimi,” o le faamatalaga lea a Dilson O o la’ua luitau na sau mai le leaga i le leaga tele ina ua leiloloa uma a la’ua meatotino i se lologa.
I lena tulaga pagatia, na fono ai Dilson, o lē sa auauna atu i le Misiona a Pasila São Paulo i Saute, ma Elder Gutenberg Amorim, o se Fitugafulu Eria ma o le faatonu sili o le inisitituti faalelotu, e talanoa e uiga i se matata ma ni filifiliga faaleaoaoga. A o talanoaina e Dilson mea e fiafia i ai, na ia maua se uunaiga faaleagaga e tatau ona ia aoga faafomai. E faafetai ai i le polokalama a le Ekalesia na faatoa faatinoina o le Tupe Faaagaga mo Aoga (TFA), i le 2003 na liliuina ai e Dilson lena uunaiga i se galuega i le ma’ea ai o se kosi faatausimai mo le 18 masina.
“Ana leai le tupe, semanu e le mafai ona ou aveina ia kosi na ou manaomia,” o le tala lea a Dilson, o lē o loo galue mo le falemai faitele i Recife. E faapena foi i lona toalua o Alexsandra, na semanu e le mafai ona ia maua se nonogatupe e totogi ai le aoga sa ia manaomia e avea ai ma se faiaoga.
“Ma te le’i faigaluega i le ono tausaga ua mavae,” o le tala lea a Dilson. “O le TFA na alagatatau lava mo mea uma ua mafai ona ma ausia. Ua suia ai o ma’ua olaga.”
O Se Tali mai le Alii
A faamatala e tagata o le Ekalesia i Pasila le Tupe Faaagaga mo Aoga, e le mafai ona taofia lo latou faaaogaina o upu e sili ona maualuluga o le: miraculoso, inspirado, maravilhoso. O le mafuaaga ona ua ausia e le tupe le mea na valoia e Peresitene Gordon B. Hinckley (1910–2008) o le a tupu ai: “O le a avea ma faamanuiaga ia i latou uma o le a pa’i atu i o latou olaga—o alii ma tamaitai talavou, o o latou aiga i le lumanai, o le Ekalesia o le a faamanuiaina i ona autaitai i o latou lava lotoifale,” ma o le a siitia ai le “faitau afe mai faataufusi o le mativa ae oo atu i le la susulu o le malamalama ma le faauluolaina.”1
Ina ua fofogaina mai e Peresitene Hinckley le polokalama, a o tauivi taitai o le Ekalesia e pei o Paulo R. Grahl, o le faatonusili i le eria mo seminare ma inisitituti o aoaoga faalelotu i Pasila, ma atugaluga e uiga i le mauaina e tagata o le Au Paia o Aso e Gata Ai i Pasila o ni aoaoga ma ni galuega—ae maise lava o faifeautalai talavou ua maea misiona.
“Ae peitai, e le’i i ai sa matou tali seia oo ina faaali mai e le Alii ia Peresitene Hinckley e tatau ona tatou faatuina lenei tupe maoae,” o le tala lea a Uso Grahl. “O aso la, e toatele o tatou tagata talavou na foi mai mai a latou misiona e aunoa ma le mafai ona sailia ni aoaoga ma ni galuega. O le taimi nei ua latou iloa, a latou foi mai, o loo i ai le tupe pe afai latou te manaomia. O se faamanuiaga sili lea ma aoga mo le autalavou. O loo ofoina mai ai le faamoemoe.”
E tusa ma le 10,000 tagata o le Au Paia o Aso e Gata Ai i Pasila, o loo faalagolago i le taimi nei i nonogatupe mai le TFA e faaauau ai a latou aoga, ma aofia ai ma ituaiga galuega e mafai ona maua. O Pasila e malosi lona tamaoaiga, ma e tele avanoa mo tagata e lelei a latou aoaoga—ae maise lava pe afai o aoaoga e o faatasi ma tomai e atiina ae e tagata talavou i totonu o le misiona.
Tatalaina o Faitotoa
Na saunoa Elder Pedro Penha, o le Fitugafulu Eria ma o le faatonu o le Inisitituti o Aoaoga Faalelotu i Recife i Matu, e i ai i faifeautalai ua maea mai misiona ni agavaa e manaomia e falefaigaluega. “E vave lava ona matala mai faitotoa o avanoa faigaluega ona o o latou aafiaga, faiga masani o suesuega, foliga vaaia, ma le amio lelei,” o lana tala lea. “E vave lava lo latou tuputupu ae, ma o a latou amio e tosina mai ai tagata i le Ekalesia.”
Ina ua ma’ea lana auaunaga i le Misiona a Pasila São Paulo i Matu i le 2002, sa faapea loa ona faaaoga e Ricardo Aurélio da Silva Fiusa se nonogatupe mai le TFA e maua ai sona faailoga e fa tausaga i le faatautaiga o pisinisi.
“Ua fesoasoani le tupe ou te tuputupu a’e ai, saunia mo le galuega ma le faaipoipoga, ma auauna lelei atu ai i le Ekalesia,” o le tala lea a Ricardo. E pei foi o le toatele o i latou na mauaina le TFA, na ofoina atu ia te ia se galuega a o le’i ma’ea le sueina o lona faailoga. “Ua avea lava le tupe [faaagaga mo aoga] ma faamanuiaga i lo’u olaga. Ou te fiafia lava e totogi faalemasina la’u nonogatupe ina ia mafai foi e isi tagata ona faaaoga lea tupe.”
I lana misiona na aoaoina ai e Ricardo le talanoa i tagata, suesue malosi, ma le usitai—o uiga ia ua avea ai o ia ma se tagata aoga ma se tagata faigaluega lelei.
“E toatele o’u polofesa e fai mai sa i ai se mea na ese ia te a’u lea sa le mafai ona latou faamatalaina,” o le tala lea a Ricardo, o lē o loo faigaluega i le fuafuaina ma le faatinoina o galuega faigata mo se kamupani i Port Suape, i saute o Recife. “Sa ou fai atu ia i latou e mafua lea tulaga ona o aoaoga faavae a la’u ekalesia.” O lena tali na oo atu ai i ni avanoa mo Ricardo e talanoa atu ai i ona polofesa faapea ma isi e uiga i le Ekalesia.
Na faaopoopo mai Mauricio A. Araújo, o se tasi o faifeautalai Pasila ua maea lana misiona ua faamanuiaina e le TFA, “O le agai i luma o la’u galuega, ua ou maua ai le tele o avanoa e faatosina mai ai tagata e ala i a’u faataitaiga. O nisi taimi e fai mai ai tagata ia te a’u, ‘E, e ese lava oe. E te faamaoni i lou toalua. E te savali i upu e te tautala ai.’ O le faaaogaina o le TFA ma le faia o la tatou vaega, tatou te maua ai faamanuiaga ma tatou te faamanuiaina ai isi.”
O Mauricio, o le na auauna atu i le Misiona a Pasila Rio de Janeiro i le faaiuga o le vaitaimi o le 1990, na mauaina se faasologa o le siitaga o tulaga faalegaluega talu mai ona ia faamaeaina se polokalama o le pulega mo fesootaiga ma tagata, sa faapea ona faatupeina e le TFA—mai fefaatauaiga i le avea ma le taitai o vaega, i le avea ma se au pulega i le avea ma se tasi o le aufono o faatonu a se kamupani faavaomalo i São Paulo e aoaoina le puleaina o taimi.
“O le Tupe Faaagaga mo Aoga ua musuia e le Atua,” na ia fai mai ai. “O le tupe o le ki lea na ou manaomia e faamaea ai a’u aoaoga ma agai atu i luma i la’u galuega.”
O Se Teugatupe Lelei
E ui lava o Gabriel Salomão Neto e le o se tagata o le Au Paia o Aso e Gata Ai, ae na te lagonaina le faapena foi ona faamanuiaina o ia e le Tupe Faaagaga mo Aoga. “O se mea maoae lenei o loo faia e la outou ekalesia,” na ia fai mai ai, na saunoa ai mo le toatele o falefaigaluega i Pasila.
E i ai se mafuaaga ua faafetai ai le Susuga ia Neto, o se pule ma o se paaga foi e anaina se kamupani tele o masini e faatau ai meaai ma vaiinu i São Paulo. Sa faagaeetia lava o ia i agavaa o le tagata o le Ekalesia o Silvia O. H. Parra, o lē na mauaina se faailoga i le faatautaiga o pisinisi i le fesoasoani a se nonogatupe mai le TFA, o lea sa ia faafaigaluegaina ai o ia e fai ma ana failautusi faapitoa.
“Matou te fiafia lava i le galuega o loo ia faia. O ia o se tagata galue malosi ma e mataalia. Matou te talitonu ia te ia, ma faatuatuaina o ia,” na fai mai ai le Susuga ia Neto. “O le saofaga na faia e la outou ekalesia ia te ia ua matuā aoga lava—mo outou, mo ia, ma mo i matou.”
O le faafetaia o le Tupe Faaagaga mo Aoga ma mo lona auai ai i le Ekalesia, o loo faiaoga ai Silvia i vasega Igilisi i lana uarota i São Paulo mo i latou e auai ma i latou e le auai i le ekalesia. “E pei ona ou mauaina,” na ia fai mai ai, “e faapena foi ona ou manao e foai atu.”
E pei ona faaalia i le faamanuiaina o Silvia, e le na o alii talavou o loo faaaogaina le Tupe Faaagaga mo Aoga i Pasila. Mo mafuaaga faaletamaoaiga, e toatele ai tamaitai o le Au Paia o Aso e Gata Ai i Pasila e tatau foi ona sailia ni galuega.
“O le toatele lava o tamaitai i Pasila e faigaluega, e le faapea ona o le mananao i se taavale fou po o ni lavalava taugata, ae ona o le manaomia o mea masani e faaaoga i le aiga,” na fai mai ai Lorival Viana de Aguirra, o le pule o le ofisa autu o le Ekalesia mo punaoa mo galuega i Curitiba, Pasila i saute. “Latou te mananao i o latou aiga ia aai lelei ma ia lava ni lavalava ma ni aoga lelei a o latou fanau.”
Fiafiaga Sili Atu, Molimau Malolosi Atu
Sa tauivi lava Keite de Lima A. Ahmed ma Viviana Torres Noguera i le tau faasoasoaina o a latou tupe, e ui ina galulue malosi o la’ua taitoalua mo o la’ua auaiga. Mo i la’ua uma, o le TFA o se faamanuiaga sili lea.
Ae peitai, sa faaalia le popole o tagata o le aiga o Keite e le malolosi i le ekalesia, ina ua lesitala o ia mo se polokalama e 18-masina mo se tomai i tulaga o le saogalemu. Ae sa maoae lona taumafai i ana suesuega ma na ofoina atu ai mo ia se galuega tumau i lana matata i le 2007.
“Na sili atu mea na faia e le tupe nai lo le na o le fesoasoani ia te a’u ia maua ni aoaoga ma se galuega; na fesoasoani foi ou te lagona ai le fiafia ia te a’u lava ma ou atili tuputupu ae ai i le to’a i o’u lava tulaga gafatia,” o le tala lea a Keite, o se tasi o tamaitai muamua lava na faafaigaluegaina e faatinoina ni asiasiga, aoaoga faamasani, ma le faatinoina o le saogalemu e se kamupani i São José dos Pinhais, e latalata i Curitiba. “O lenei polokalama musuia ua aumaia ai i lo matou aiga se fiafiaga sili atu ma ni molimau malolosi atu,” na ia fai mai ai.
O matua ma tei o Keite, o e na faagaeetia i lana taumafaiga ma le naunautai, ma le auala ua faamanuiaina ai e le TFA lona aiga, ua faapea ona toe toaaga i le Ekalesia. “Sa faamanatu atu ia i latou e faapea, o le Ekalesia na te siitiaina tagata ma fesoasoani ia i latou ia tuputupu ae i le tele o auala—e le gata i le faaleagaga ae faapea foi i auala taua uma lea e maua ai se olaga atoatoa,” o lana tala lea.
O Viviana ma lona toalua o, Rafael, na siitia atu mai Kolomupia i Manaus, o se nofoaga autu iloga o falegaosi oloa i Pasila i matu, i le 2002 i le sailia o ni avanoa lelei faaletamaoaiga. “O le tatalo, fonotaga faaleaiga, taitaiga mai taitai perisitua, ma vasega o aoaoga mo galuega, na fesoasoani ia i matou e iloa ai le mea na finagalo ai le Tama oi le Lagi mo i matou, ma ia faia ai le filifiliga sa’o i le taimi sa’o,” o le tala lea a Viviana, o lē na lagonaina le uunaia e faaaoga se nonogatupe mai le TFA e aoga ai i pisinisi faavaomalo.
I le 2007 na alu ai Viviana e faigaluega i le vaaiga o oloa e auina mai isi atunuu mo se supamaketi i Manaus. Na manaomia e lona aiga le tupe maua faaopoopo, ae ona sa latalata ina fanau o ia, o lea na tatau ai ona faamavae ma le galuega. O ni nai masina talu ona fanau mai lena tamaitiiti—ae fanau foi le tama lona fa—a le ulugalii, na ofoina atu ia Viviana se galuega e fai ma faatonu o fefaatauaiga faavaomalo a se isi kamupani. O le taimi lenei ua ia iloa tautala faaPotukale, ma o lana gagana moni o le faaSipaniolo na avea ai o ia ma se tagata taua tele i feutagaiga faapisinisi ma tuaoi o Pasila e tautatala i le faaSipaniolo.
“Ina ua ofoina mai ia te a’u le galuega, sa ou fai atu i ai, ‘O a’u e toafa la’u fanau. E le mafai ona o’u tautino atu ou te faigaluega mai le 8:00 i le taeao e oo i le 6:00 i le afiafi,’” o le tala lea a Viviana. “Na fai mai lo’u pule, e matuā tele lona talitonuina o o’u gafatia, ma faapea mai, ‘Ou te manaomia se tasi ou te faalagolago i ai. Galue i le fale.’ O lena mea na ou te’i ai.”
O le faaaogaina o le Initoneti ma se komepiuta, sa faigaluega atu ai Viviana i le fale ao ō lana fanau matutua i le aoga ae moe lana pepe. Se’i vagana lava ni taimi e seasea ona tupu e alu ai o ia i le ofisa.
E faafetaia e Rafael ia faamanuiaga o le aiga i se mea e sili atu nai lo na o se tulaga na tupu faafuasei. “O faamanuiaga ua matou mauaina na maua mai mai se vaega o filifiliga ma le agaga tatalo ma mai faatinoga na mafai ona faia e ala i meafaigaluega na saunia e le Ekalesia,” o lana tala mai lea.
O Le Malamalama o le Faamoemoe
Na saunoa Gilmar Dias da Silva, o le faatonu o le TFA i Pasila, o nisi o tagata o le Au Paia o Aso e Gata Ai i Pasila, e feagai ma luitau faalegaluega i le ma’ea ai o a latou aoaoga, “ae o le toatele lava o o matou tagata auai i le TFA o loo alualu i luma i a latou galuega ma faaleleia atili o latou olaga. O le matuā faamanuiaina lava o le tupe iinei.”
O lena faamanuiaina, e tusa ai ma le saunoaga a Peresitene Thomas S. Monson, “ua tutuina ai le malamalama o le faamoemoe i fofoga o i latou o ē na lagonaina le leai o se faamoemoe mo i latou e faaleleia ai o latou tulaga ae o lea ua maua nei se avanoa mo se lumanai manuia.”2
Ata na pueina e Michael R. Morris
Anavatau a le TFA na saunia e Beth M. Whittaker
Faatasi ai ma le fesoasoani mai le Tupe Faaagaga mo Aoga, na liliuina ai e Dilson Maciel de Castro le Itiiti se uunaiga faaleagaga i se galuega, ma avea ai ma se tausimai i Recife, Pasila. Lalo: O se vaaiga i Recife mai le aai faakolone o Olinda.
Mai luga: Atualuma o faleoloa i Largo da Ordem, nofoaga lauiloa o Curitiba. O le Tupe Faaagaga mo Aoga o le ki lea i le alualu i luma faaleaoaoga ma faalegaluega o Ricardo Aurélio da Silva Fiusa; Mauricio A. Araújo, o loo faaalia lona taitaia o se fonotaga faapisinisi ma se uso o le Au Paia o Aso e Gata Ai o Renato A. Romero (tauagavale) ma João B. Moreira (ogatotonu); ma Silvia O. H. Parra, o loo i le ata ma Adan Tallmann, o le failautusi a le eria mo seminare ma inisitituti o aoaoga faalelotu.
Luga: O Keite de Lima A. Ahmed o loo talanoaina mataupu tau i le saogalemu faatasi ma Lorival Viana de Aguirra, o le pule o le nofoaga autu o le Ekalesia mo punaoa o galuega i Curitiba. Lalo: O Viviana Torres Noguera o loo faigaluega mai i lona fale i Manaus. Ata faaopoopo: O Viviana ma lona toalua o Rafael, ma le la fanau.